کراچی : سول ایوی ایشن اتھارٹی کی جانب سے پاکستان انٹرنیشنل ایئرلائنز کےتمام اے ٹی آرطیاروں کو چانچ پڑتال کےلیےگراؤنڈ کردیاگیا۔

تفصیلات کےمطابق پی آئی اے کی جانب سے جاری ہونے والی پریس ریلیز میں ترجمان دانیال گیلانی کا کہنا تھا کہ طیاروں کی چیکنگ کےعمل کی تکمیل تک تمام 10 اے ٹی آرطیارے گراؤنڈ رہیں گے۔

پی آئی اے کےترجمان کےمطابق عارضی طور پراے ٹی آر آپریشن معطل ہونے سے ملک کے چھوٹےایئرپورٹس کے لیے پروازیں متاثر ہوں گی،جن میں گوادر، تربت، پنجگور، موہنجو دڑو، ژوب، بہاولپور، ڈیرہ غازی خان، ڈیرہ اسمٰعیل خان، چترال اور گلگت شامل ہیں۔

PIA's flight operation to smaller airports would be affected as all 10 ATRs have been grounded for shakedown test by CAA. Plz c statement pic.twitter.com/l2CsUkxMdu

— Danyal Gilani (@Danyal_Gilani) December 12, 2016

ترجمان پی آئی اےدانیال گیلانی کے مطابق سول ایوی ایشن کی جانب سےطیاروں کی کلیئرنس کے بعد اے ٹی آرآپریشن شروع کردیا جائے گا۔

پی آئی اے نے مسافروں کو ہونے والی زحمت پر معذرت کرتے ہوئے ان سے درخواست کی کہ وہ ایئر پورٹ روانگی سے قبل اپنی مطلوبہ پرواز کے لیے پی آئی اے کال سینٹر سے ضرور رابطہ کر لیں۔

دوسری جانب اے ٹی آر طیارے گراؤنڈ ہونے سے درجنوں پروازیں منسوخ ہوگئی ہیں جس کی وجہ سے مسافروں کو شدید مشکلات کا سامنا ہے،مسافروں کا کہنا ہے کہ ایئر لائن کی جانب سے اٹھائے گئے اقدام کی پیشگی اطلاع نہیں دی گئی۔

مزید پڑھیں: پی آئی اے طیارے کو حادثہ، 47 افراد سوار، تمام شہید

واضح رہے کہ 7دسمبر کو پی آئی اے کا چترال سے اسلام آباد آنے والا اے ٹی آر مسافر طیارہ حویلیاں کے قریب گر کر تباہ ہونے سے جہاز کے عملے سمیت 47 افراد جاں بحق ہوگئے تھے۔