Tag: گرد آلود ہوائیں

کراچی: محکمہ موسمیات کا کہنا ہے کہ آج ہفتے کو ملک کے بیش تر میدانی علاقوں میں موسم شدید گرم اور مرطوب، بعد از دوپہر گرد آلود ہوائیں، جھکڑ چلنے کا امکان ہے۔

تفصیلات کے مطابق پنجاب، اسلام آباد، پوٹھوہار، بالائی کے پی، بلوچستان، کشمیر میں آندھی اور گرج چمک کے ساتھ بارش کا امکان ہے، جب کہ بالائی اور وسطی پنجاب، اسلام آباد، بالائی کے پی، جی بی، کشمیر میں دن کا درجہ حرارت 4 سے 6 ڈگری سینٹی گریڈ زیادہ رہے گا۔

محکمہ موسمیات کے مطابق سندھ، جنوبی پنجاب اور بلوچستان میں دن میں درجہ حرارت 2 سے 4 ڈگری سینٹی گریڈ معمول سے زیادہ رہنے کا امکان ہے، اسلام آباد میں دن میں موسم شدید گرم اور مرطوب رہے گا، جب کہ شام یا رات میں آندھی اور گرج چمک کے ساتھ بارش ہو سکتی ہے۔

کے پی کے بیش تر اضلاع میں موسم شدید گرم اور مرطوب، بعد از دوپہر میدانی علاقوں میں آندھی اور جھکڑ چلنے کا امکان ہے، چترال، دیر، سوات، مانسہرہ، ایبٹ آباد، پشاور، مردان، کرم، بنوں، لکی مروت میں بارش ہو سکتی ہے۔

پنجاب کے بیش تر اضلاع میں موسم شدید گرم اور مرطوب رہے گا، اٹک، چکوال، جہلم، راولپنڈی، میانوالی، سرگودھا، حافظ آباد، منڈی بہاؤ الدین، سیالکوٹ میں بارش کا امکان ہے، نارووال، لاہور، گوجرانوالہ، گجرات، شیخوپورہ، مری، گلیات میں بھی گرج چمک سے بارش کا امکان ہے۔

ملتان، بہاولپور، بہاولنگر، ساہیوال، ڈی جی خان، بھکر اور فیصل آباد میں گرد آلود ہوائیں اور جھکڑ چلنے کا امکان ہے، بلوچستان کے بیش تر اضلاع میں موسم گرم اور خشک، مشرقی اور جنوب مغربی علاقوں میں شدید گرم رہے گا۔ سندھ کے بیش تر اضلاع میں موسم شدید گرم اور مرطوب، بعد از دوپہر گرد آلود ہوائیں چلنے کا امکان ہے۔

اس دوران کراچی سمیت ساحلی علاقوں میں بوندا باندی ہو سکتی ہے، کشمیر میں چند مقامات پر تیز ہواؤں اور گرج چمک کے ساتھ بارش کا امکان ہے جب کہ گلگت بلتستان میں موسم شدید گرم اور خشک رہے گا۔