کراچی : سندھ رینجرز نے مختلف علاقوں میں کارروائی کرتے ہوئے مختلف جرائم میں ملوث 7 ملزمان کو گرفتار کر کے اسلحہ، مسروقہ سامان اور منشیات برآمد کر لی ہیں.
تفصیلات کے مطابق جرائم کی بیخ کنی اور کراچی میں قائم امن کے استحکام کے لیے سندھ رینجرز کی جانب سے چھاپا مار کارروائی زمان ٹاؤن، عوامی کالونی اور لیاری کے علاقوں میں کی گئی جہاں 7 ملزمان کو حراست میں لیا گیا ہے.
ترجمان رینجرز کے مطابق چھاپا مار کارروائی میں زمان ٹاؤن سے ملزم محمد وقار عرف وکی کو گرفتار کیا گیا ہے جو ڈکیتی اور رہزنی سمیت مخلتف جرائم کی مختلف متعدد وارداتوں میں ملوث ہے.
ترجمان رینجرز کے مطابق اسی طرح عوامی کالونی سے 3 اسٹریٹ کرمنلز سیف علی، ذوہیب احمد اور احسان خان کو حراست میں لے کر اسلحہ سمیت مسروقہ سامان برآمد کرلیا ہے.
علاوہ ازیں خفیہ اطلاعات پر زمان ٹاؤن سے 2 ملزمان مٹھل علی اور عباس کو چھینی ہوئی گاڑیوں سمیت گرفتار کرلیا ہے جو ملک میں گاڑیاں چھیننے اور ان کی اسمگلنگ کرنے والے گروہ کے کارندے تھے.
ترجمان رینجرز کے مطابق زمان ٹاؤن سے ہی ایک منشیات فروش کو بھی گرفتار کیا گیا ہے جس کے قبضے سے منشیات سمیت دیگر نشہ آور اشیاء بھی برآمد ہوئی ہیں.
ترجمان رینجرز کا کہنا تھا کہ گرفتار ملزمان کو مزید قانونی چارہ جوئی کے لیے ایف آئی اے، انسداد منشیات فورس اور متعلقہ تھانوں کے حوالے کردیا جائے گا.
