لاہور: ساندہ پولیس نے کراچی میں ٹارگٹ کلنگ میں ملوث ٹارگٹ کلر اور اس کے ساتھی کو گرفتار کرلیا،تفصیلات کے مطابق ساندہ پولیس نے خفیہ اطلاع پر اویس نامی شخص کے گھر پر چھاپہ مار کر ٹارگٹ کلر فیصل بلوچ اور اس کے ساتھی کوگرفتار کیا ۔
پولیس کے مطابق فیصل بلوچ ٹارگٹ کلنگ کے واقعات میں ملوث ہے اور ڈیڑھ ماہ قبل کراچی سے لاہور آکر ساندہ میں رہ رہا تھا۔ ملزم کو تفتیش کے بعد کراچی پولیس کے حوالے کردیا جائے گا۔
لاہور: قانون نافذ کرنے والے ادارے نے ایک گھر پر چھاپہ مار کر خاتون سمیت 5 غیر ملکی افراد کو حراست میں لے لیا۔
قانون نافذ کرنے والے ادارے نے ایک اطلاع پر والٹن روڈ پیر کالونی میں ایک گھر پر چھاپہ مارا اور خاتون اور 2 بچوں سمیت 5 غیر ملکی افراد کو حراست میں لے لیا۔ ملزمان کی رہائشگاہ سے ایک لیپ ٹاپ اور دیگر سامان بھی قبضے میں لیا گیا ہے۔
حراست میں لئے گئے افراد کو تفتیش کیلئے نامعلوم مقام پر منتقل کر دیا گیا ہے۔ اہل علاقہ کے مطابق غیر ملکی افراد نے گھر کرایے پر لے رکھا تھا اور ان کی مشکوک سرگرمیاں تھیں۔
ایبٹ آباد: حساس اداروں نے کارروائی کرکے خطرناک غیر ملکی دہشت گرد کو گرفتارکرلیا ہے۔
ایبٹ آباد کے علاقے میاں دی سیری میں حساس اداروں نےکارروائی کرکے خطرناک غیر ملکی دہشت گردکو گرفتار کرلیا اور تفتیش کےلئے نامعلوم مقام پر منتقل کردیا ہے، ذرائع کے مطابق دہشت گرد کے قبضے سے اسلحہ وگولہ بارود بھی ملا ہے۔
لاہور: عوامی تحریک کے سربراہ ڈاکٹر طاہر القادری نے وزیرداخلہ چوہدری نثار کی پریس کانفرنس پر شدید ردعمل کا اظہار کیاہے۔
پاکستان عوامی تحریک کے سربراہ ڈاکٹر طاہرالقادری کا کہنا تھا کہ پاکستان عوامی تحریک نے ریاستی اداروں پر نہ کبھی پہلے دھاوا بولا نہ آئندہ دھاوا بولیں گے ،دھاوابولنے والے خود حکمران ہیں۔
اس سے قبل وفاقی وزیر داخلہ چوہدری نثار کا کہنا ہے پی ٹی آئی کے تیس نومبر کے جلسے میں کوئی رکاوٹ نہیں ڈالی جائے گی، ان کا کہنا تھا حکومت پر دھاوا بولا گیا تو قانون حرکت میں آئے گا۔
وزیر داخلہ کا مزید کہنا تھا کہ یہ کہاں کا قانون ہے کہ جو آپ سے اختلاف رکھے اسے چور اور ڈاکو کہنا شروع کر دیا جائے۔جو لوگ انقلاب لانا چاہتے ہیں وہ انقلاب نہیں بگاڑ لا رہے ہیں، تحریک انصاف کے انقلاب کے حوالے سے ان کا کہنا تھا کہ بغیر لائسنس کسی کو گالی دینا کہاں کا انقلاب ہے۔
لاہور: صوبائی وزیرداخلہ کرنل ریٹائرڈ شجاع خانزادہ اور پنجاب حکومت کے ترجمان زعیم قادری نے کہا ہے کہ تیس نومبر کو عمران خان کے دھرنے کے لیے کسی قسم کی رکاوٹ نہیں ڈالی جائے گی
جبکہ طاہرالقادری کو وطن واپسی پر گرفتار بھی نہیں کیا جائے گا،ایوان وزیراعلیٰ لاہور میں میڈیا سے گفتگو کرتے ہوئے وزیر داخلہ شجاع خانزادہ نے کہا کہ سانحہ ماڈل ٹاؤن پر قائم نئی جے آئی ٹی انصاف کے تمام تقاضے پورے کرے گی۔
اس سلسلے میں وہ وزیراعظم سمیت کسی سے بھی تحقیقات کرسکتی ہے، انہوں نے کہا کہ عمران خان کے تیس نومبر کے دھرنے کے لیے پنجاب اور لاہور سے نکلنے والے جلوسوں کو نہیں روکا جائے گا۔
جبکہ ڈاکٹر طاہر القادری کی وطن واپسی پر نہ تو انہیں گرفتار نہیں کیاجائے گا اور نہ ان پر پابندی عائد کی جائے گی، زعیم قادری کا کہنا تھاکہ آئی ڈی پیزپرتشدد اوران کے خلاف مقدمات کے اندراج نے عمران خان کا اصل چہرہ قوم کے سامنے رکھ دیا ہے۔
کراچی: گزشتہ رات بلدیہ کے علاقے سے حراست میں لئے گئےمشتبہ ڈاکو،کے الیکٹرک کےملازمین نکلے،ابتدائی تفتیش کےبعد رہاکر دیے گئے۔
کراچی کے علاقے بلدیہ ٹاؤن میں گزشتہ رات علاقہ مکینوں نے پانچ مشتبہ ڈاکورینجرز کے حوالےکئے تھے جو تفتیشی مرحلے کے بعد کے الیکٹرک کے ملازمین نکلے،علاقہ مکینوں کا کہناہے کہ پکڑے گئے افراد کافی عرصے سے مشتبہ کارروائیوں میں مصروف تھے تاہم ترجمان کےالیکٹرک نے موقف دیتے ہوئے کہاکہ ملازمین کو غلط فہمی کی بنیاد پرتشدد کا نشانہ بنایا اور رینجرز کے حوالے کیاگیا، رینجرز حکام نے بھی ابتدائی تفتیش کے بعد پانچوں افراد کو بے گناہ قرار دیتے ہوئے رہا کردیا۔
کراچی: حساس اداروں نے اسلام آباد اور لاہور سے چار دہشتگردگرفتار کر کےدس محرم کوتخریب کاری کامنصوبہ ناکام بنا دیا، یوم عاشورپر ملک بھر میں سخت ترین سیکورٹی اقدمات کئے گئے ہیں۔
اسلام آباد میں پولیس نے دو دہشت گردوں کو گرفتار کیا ہے، جو دس محرم کوراولپنڈی کے راجہ بازار میں مرکزی جلوس کو نشانہ بنانا چاہتے تھے جبکہ لاہور سے بھی دو افراد کو حراست میں لیا گیا ہے جن پر شبہ ہے کہ وہ واہگہ دہشتگردی میں ملوث ہیں۔حساس اداروں کے مطابق افغانستان میں موجودہ کالعد م تحریک طالبان کےافغانستان میں موجود کمانڈر گل امان محسود نے یوم عاشور پر اپنے ساتھیوں کو ڈیرہ اسماعیل خان ، بنوں او ر کراچی میں دہشت گرد ی کی ذمہ داری سونپی ہے۔
طالبان نے واہگہ میں خودکش حملے کی منصوبہ بندی جنداللہ کے تعاون سے کراچی میں کی، یوم عاشور پر اسلام آباد کراچی ، لاہور ، پشاور، اور دیگر شہر وں میں سخت ترین سیکورٹی انتظامات کئے گئے ہیں،حساس شہروں میں جلوسوں کی فضائی نگرانی کیلئے بارہ مقامات پر ہیلی کاپٹر تعینات کئے گئےہیں۔ جبکہ سراغ رساں کتوں ، گھڑ سوار دستوں واک تھرو گیٹس اور میٹل ڈیٹیکٹرز سے بھی مدد لی جائے گی ، ماتمی جلوسوں کے راستوں میں آنے والے اہم مقامات کی خصوصی نگرانی کی جائے گی،اور خود کش حملہ آوروں کی ممکنہ آمد کو روکنے کیلئے عمارتوں پر اسنائپرز تعینات کئے جائیں گے۔
کراچی : شہرمیں امن وامان برقرار رکھنے کےلئے قانون نافذ کرنے والے اداروں کی کارروائیاں جاری ہیں، کھارادربارہ امام بارگاہ کے قریب سے مشکوک شخص کو گرفتار کرلیا گیا۔
شہر قائد میں جرائم پیشہ عناصر کے خلاف قانون نافذ کرنے والے اداروں کی ٹارگٹڈ کارروائیاں جاری ہیں۔ پولیس نے کھاردار بارہ امام بارگاہ کے قریب سے ایک مشکوک شخص کو حراست میں لے لیا،
جس کو مزید تفتیش کے لئے نامعلوم مقام پر منتقل کردیا گیا ہے۔پولیس کا کہنا ہے کہ مشکوک شخص نے پولیس کو دیکھ کر بھاگنے کی کوشش کی تھی۔ خفیہ ادارے کے اہلکاروں نے کنواری کالونی میں مقابلے کے بعد متعدد خطرناک اور سنگین جرائم میں ملوث ملزمان کو گرفتار کیا۔
ملزمان کے قبضے سے بھاری اسلحہ اور بارودی مواد برآمد ہوا۔ رینجرز نے شہر کے مختلف علاقوں میں ٹارگٹڈ کارروائیاں کرتے ہوئے پانچ ملزمان کو گرفتار کرلیا ۔
ترجمان رینجرز کے مطابق کارروائیاں لیاقت کالونی،کھڈا مارکیٹ اور موسٰی لین میں کی گئیں۔گرفتار ملزمان کا تعلق لیاری گینگ وار سے ہے۔
کراچی: سی آئی ڈی پولیس نے سانحہ کارساز کے دو منصوبہ سازوں کو گرفتار کرنے کا دعویٰ کیاہے۔
کراچی کے علاقے شاہ لطیف ٹاؤن میں سی آئی ڈی پولیس نے کامیاب کاروائی کے دوران سانحہ کارساز اور سابق صدر آصف علی زرداری کے سیکورٹی انچارج بلال شیخ پر حملے میں ملوث کالعدم تحریک طالبان کے دو کارندے گرفتار کرلئے، ایس پی عثمان باجوہ کا کہنا ہے کہ گرفتار ملزمان نے اہم انکشافات کیے ہیں ۔
ایس پی عثمان باجوہ۔۔ گرفتارملزمان کی نشاندہی پرمختلف علاقوں میں کالعدم ٹی ٹی پی کے مزید کارندوں کی گرفتار ی کیلئے سی آئی ڈی پولیس کی خصوصی ٹیمیں تشکیل دے دی گئیں۔
کراچی : مزار قائد کے قریب سے پولیس نے ایک مشتبہ شخص کو حراست میں لے لیا۔ ملزم طاہر شاہ نامی اس شخص سے پولیس کا جعلی کارڈ بھی برآمد ہوا ہے۔
تفصیلات کے مطابق کراچی میں جناح گراؤنڈ میں ہونے والے پیپلز پارٹی کے جلسے کے لئے جہاں فول پروف سیکیورٹی کے انتظامات کئےگئے ہیں، وہیں ارد گرد مشکوک سرگرمیوں میں ملوث افراد پر کڑی نظر بھی رکھی گئی ہے۔
پولیس نے مزار قائد کے قریب سے ایک مشتبہ شخص کو حراست میں لے لیا ہے۔ موٹر سائیکل وی بی آر 4248پر سوار اس شخص کے پاس سے پولیس کا جعلی کارڈ اور ایک نجی کمپنی کا کارڈ بھی برآمد ہوا ہے۔
ظاہر شاہ نامی مشتبہ شخص خود کو نجی کمپنی کا ملازم بتارہاہے۔ پولیس نے ملزم کو تفتیش کیلئے نامعلوم مقام پر منتقل کردیا ہے۔