میر علی : شمالی وزیرستان میں ایک اور گرلز اسکول کو بارودی مواد سے اڑا دیا گیا، دھماکے سے قریبی گھر کو بھی شدید نقصان پہنچا۔
تفصیلات کے مطابق شمالی وزیرستان میں میرعلی کے گاؤں زیرکی میں گورنمنٹ گرلزمڈل اسکول کو بارودی مواد سے اڑا دیا گیا۔
ضلعی انتظامیہ کا کہنا ہے دھماکے سے قریبی گھر کو بھی شدید نقصان پہنچا، واقعہ گزشتہ رات پیش آیا تھا تاہم کسی جانی نقصان کی اطلاع نہیں ملی۔
وزیر تعلیم فیصل ترکئی نے میرعلی شمالی وزیرستان میں گورنمنٹ گرلز ہائی اسکول کو دھماکے سے اڑانے کا نوٹس لےلیا۔
فیصل ترکئی نے بتایا کہ اسکول میں 255 طالبات زیرتعلیم تھیں، 7 کمرے مکمل منہدم ہوگئے ہیں تاہم ڈائریکٹر ایجوکیشن اورمتعلقہ ڈپٹی کمشنرکو تحقیقات کی ہدایت کی ہے۔
ان کا کہنا تھا کہ اسکول کودوبارہ جلد فعال کیا جائے گا، قبائلی اضلاع میں تعلیمی سرگرمیوں پرخصوصی توجہ دے رہے ہیں، ایسے واقعات سے ہمارے حوصلے پست نہیں ہوتے، تعلیمی اصلاحات جاری رہیں گی۔
وزیر تعلیم نے مزید کہا کہ خواتین کی تعلیم اولین ترجیح ہے، کوئی سمجھوتا نہیں کیا جائے گا۔
