کوئٹہ: بلوچستان کے شہر اوستہ محمد میں گرلز کالج کی بلڈنگ نہ ہونے کے باعث لڑکیاں سیشن کورٹ کی خستہ حال عمارت میں تعلیم حاصل کرنے پر مجبور ہیں۔
تفصیلات کے مطابق ضلعی ہیڈکوارٹر اوستہ محمد میں گزشتہ 30 سالوں سے تکمیل کی منتظر گرلز کالج بلڈنگ کا منصوبہ ایک بار پھر کھٹائی میں پڑ گیا ہے۔
پانچ لاکھ کی آبادی والے شہر میں گرلز کالج کی کلاسز کئی سالوں تک پہلے گرلز ہائی اسکول کی تنگ و تاریک خستہ حال کمروں میں شام کے اوقات میں لی جاتی تھیں، اب بلوچستان ہائی کورٹ کی جانب سے عطیہ کردہ سیشن کورٹ کی پرانی اور خستہ حال چھوٹی سی بلڈنگ میں ہو رہی ہیں۔
نا گفتہ بہ حالات میں تعلیم حاصل کرنے والی طالبات کا کہنا ہے کہ سہولتوں کی عدم دستیابی کے سب انھیں اعصاب شکن حالات کا سامنا ہے۔
سائن آف گرلز کالج کی پرنسپل کا کہنا تھا کہ کالج کی کلاسوں میں جگہ کی کمی کے باعث کئی بچیاں دلبرداشتہ ہو کر گھر بیٹھنے پر مجبور ہیں، عمارت نہ ہونے کے سبب اوستہ محمد کے شہریوں میں احساس محرومی بڑھ رہا ہے۔