برگر دنیا کا مشہور ترین کھانا ہے جس کی کئی اقسام بازاروں میں دستیاب ہیں جن میں چکن، بیف اور زنگر برگر زیادہ رغبت سے کھائے جاتے ہیں جبکہ اس کے برعکس عام بازاروں میں دستیاب بن کباب کی اہمیت سے بھی انکار نہیں کیا جاسکتا۔
اے آر وائی نیوز کے پروگرام باخبر سویرا میں خاتون شیف ثمرین جنید نے برگر اور بن کباب کی اقسام اور ان کی افادیت کے بارے میں تفصیلی گفتگو کی اور اسے بنانے کا طریقہ بھی بیان کیا۔
انہوں نے کہا کہ شہر کی سڑکوں کے کنارے ٹھیلوں اور دکانوں پر ملنے والے ’’بن کباب‘‘ اس فاسٹ فوڈ ’’برگر‘‘ سے تھوڑے سے مختلف ہوتے ہیں، حالانکہ ان کا ذائقہ بھی اپنی مثال آپ ہوتا ہے جن میں دیسی اشیاء استعمال کی جاتی ہیں۔
انہوں نے بتایا کہ برگر اور دیگر فاسٹ فوڈ اجزاء میں اکثر نمک چینی اور پروسیسڈ کیمیکلز شامل کیے جاتے ہیں جن کا تعلق صحت کے مسائل جیسے موٹاپا، ذیابیطس اور دیگر بیماریوں سے بھی ہے۔
ان کا کہنا تھا کہ ان دونوں میں بنیادی فرق یہ ہوتا ہے کہ برگرز میں چکن، بیف اور زنگر اور دیگر شامل ہیں ان کے اندر چیز اور مایونیز اور کیچپ سمیت ساسز ڈالے جاتے ہیں جبکہ بن کباب میں دیسی اسٹائل سے بنی ہوئی چٹنی اور پیاز کا استعمال کیا جاتا ہے۔
مزیدار ’گرلڈ سینڈوچ‘ بنانے کا طریقہ
اس موقع پر انہوں نے مزیدار ’گرلڈ سینڈوچ‘ بنانے کا طریقہ بھی بتایا جس کے اجزاء میں ڈبل روٹی کے پیس، چکن قیمہ، ادرک، لہسن، سیاہ مرچ ، نمک اور کیچپ شامل ہیں۔
انہوں نے بتایا کہ ان سب چیزوں کو ترتیب وار ملا کر یک جان پیسٹ بنالیں اور ڈبل روٹی کے دو ٹکڑوں کے درمیان چکن قیمے والا پیسٹ رکھ کر ٹکڑے جوڑ دیں اور باربی کیو اسٹک کے ساتھ ملا کر توے پر فرائی کرلیں۔
