کراچی: محکمہ موسمیات کا کہنا ہے کہ شہر میں آج بھی موسم گرم اور خشک رہے گا، سمندری ہوائیں بحال ہونے کے باعث گرمی کی شدت میں کمی واقع ہوجائے گی۔
اے آر وائی نیوز کے مطابق ملک کے بالائی علاقوں میں تو ٹھنڈ کا آغاز ہوچکا ہے مگر کراچی سمیت سندھ کے مختلف شہروں میں بدستورگرمی کا راج برقرار ہے۔
محکمہ موسمیات کا کہنا ہے کہ شہر میں آج مطلع گرم و مرطوب اور صبح کے وقت دھند چھا سکتی ہے، دھند چھانے کے سبب حد نگاہ متاثر ہوسکتی ہے۔
بیان کے مطابق جمعرات کو موسم گرم اور خشک رہنے اور دھند چھانے کا امکان ہے، ساتھ ساتھ بلوچستان کی شمالی مغربی صحرائی ہوائیں چل سکتی ہے، شہر قائد میں گرمی کا راج برقرار ہے۔
آج زیادہ سے زیادہ درجہ حرارت 36 اور کل یعنی جمعرات کو 38 ڈگری سے تجاوز کرسکتا ہے۔ دیہی سندھ کے شہید بے نظیر آباد میں پارہ تین ڈگری اضافے سے اکتالیس ڈگری سینٹی گریڈ ریکارڈ ہوسکتا ہے۔
محکمہ موسمیات کے مطابق اسلام آباد اور گردونواح میں موسم خشک اور مطلع جزوی ابر آلود رہنے کا امکان ہے، پنجاب کے بیشتر اضلاع میں موسم خشک رہنے کا امکان ہے۔
لاہور فضائی آلودگی کا گڑھ بن گیا، آج بھی دنیا کے آلودہ ترین شہروں میں سرفہرست
مری،گلیات اور گردونواح میں مطلع جزوی ابرآلودر ہے گا، صبح کے اوقات میں لاہور، شیخو پورہ، نارووال، فیصل آباد میں اسموگ رہنے کا امکان ہے۔
