ماحولیاتی تبدیلی کے باعث دنیا کے سب سے ٹھنڈے علاقے سائبیریا میں گرمی کے سابقہ ریکارڈ ٹوٹ گئے۔
سائبیریا جو دنیا میں اپنے شدید ٹھنڈے ماحول کے باعث جانا جاتا ہے، مگر ماحولیاتی تبدیلی کے باعث یہاں گرمی کے تمام سابقہ ریکارڈ ٹوٹ گئے ہیں۔
کلائمیٹولوجسٹ میکسی ملیانو ہیریرا نے غیر ملکی میڈیا کو بتایا کہ تین جون سائبریا کی تاریخ کا گرم ترین دن رہا، جہاں زالٹورو ووسک نامی علاقے میں درجہ حرارت 37.9 سینٹی گریڈ ریکارڈ کیا گیا۔
غیر ملکی میڈیا رپورٹ کے مطابق اس کے علاوہ بیوو میں 39.6 سینٹی گریڈ، برنول میں 38.5 ریکارڈ کیا گیا، مقامی حکام نے میڈیا کو بتایا کہ ہمارے پاس گذشتہ پانچ سے سات دہائیوں کے درجہ حرارت کا ریکارڈ موجود ہے، مگریہ غیر معمولی ہے اور اس نے علاقے کی تاریخ بنادی ہے۔
عالمی موسمیاتی سائنس ادارہ میں ماحولیاتی نگرانی اور پالیسی سروسز کے چیف عمر بڈور نے غیر ملکی میڈیا کو بتایا کہ زمین پر سب سے تیزی سے گرم ہونے والے علاقوں میں سے ایک سائبیریا بھی ہے۔
یوروپی یونین کی کلائمیٹ چینج سروس کی ڈپٹی ڈائریکٹر سمانتھا برگیس نے دعویٰ کیا کہ اس علاقے میں کچھ ہیٹ ویو بھی دیکھی گئی ہیں، اس ہیٹ ویو کا لوگوں اور فطرت پر بڑا اثر پڑتا ہے اور جب تک ہم گرین ہاؤس گیسوں کے اخراج میں تیزی سے کٹوتی نہں کرتے ہیں، تب تک یہ بار بار ہوتا رہے گا۔
یاد رہے کہ سال دو ہزار بیس میں سائبریا کے شہر ویرکھویسک میں درجہ حرارت 38 سینٹی گریڈ تک پہنچ گیا تھا اور اس علاقے میں ہیٹ ویو بھی ہوا تھا۔
