اسلام آباد: ریلوے کی جانب سے گرمی کی چھٹیوں کے لیے چلائی جانے والی خصوصی ٹرینوں کی مدت میں اضافہ کر دیا گیا ہے، یہ ٹرینیں اب دس جولائی تک چلیں گی۔
تفصیلات کے مطابق پاکستان ریلوے نے سمر ووکیشن ٹرینوں کا نیا شیڈول جاری کر دیا ہے، ان خصوصی ٹرینوں کا شیڈول 30 جون تک تھا، جس میں دس دن کی توسیع کر دی گئی ہے۔
ترجمان ریلوے نے نئے شیڈول کے حوالے سے کہا کہ پاکستان ریلوے کے چیف ایگزیکٹو آفیسر کی طرف سے منظوری کے بعد توسیع شدہ شیڈول جاری کیا گیا ہے۔
ریلوے ترجمان کے مطابق موسم گرما کی تعطیلات میں مسافروں کا اضافی رش ہے، جس کی وجہ سے ووکیشن ٹرینوں کی مدت میں توسیع کی ضرورت محسوس کی جا رہی تھی۔
شیڈول کے مطابق سمر ٹرینیں کراچی سے 2 ، 6 اور 10 جولائی کی رات 8 بجے راولپنڈی کے لیے روانہ ہوں گی، جب کہ راولپنڈی سے سمر ٹرینیں 4 اور 8 جولائی کو دوپہر 2 بج کر 30 منٹ پر کراچی روانہ ہوں گی۔
ترجمان پاکستان ریلوے نے ان خصوصی ٹرینوں کے اسٹیشنز کے حوالے سے بتایا کہ کراچی سے جانے والی سمر ٹرینیں حیدر آباد، روہڑی، خان پور، بہاول پور اور خانیوال اسٹیشن پر رکیں گی۔
ان خصوصی ٹرینوں کے اسٹیشنز میں ساہی وال، اوکاڑہ، رائے ونڈ، لاہور اور گوجرانوالہ اسٹیشنز بھی شامل ہیں، ان کے علاوہ سمر ٹرینیں وزیر آباد، گجرات، لالہ موسیٰ اور جہلم اسٹیشن پر بھی رکیں گی۔
ریلوے کے ترجمان نے کہا کہ سمر ٹرینوں کی بکنگ کے طریقہ کار کو آسان بنایا گیا ہے، بکنگ ریلوے کی ویب سائٹ اور موبائل ایپ سے بھی کی جاسکتی ہے۔
واضح رہے کہ پاکستان ریلوے کی جانب سےعید اور محرم کے مواقع پر بھی خصوصی ٹرینیں چلائی جاتی ہیں تاکہ دوسرے شہروں کے مسافروں کو تعطیلات پر سہولت میسر ہو۔
خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔
