ARYNews.tv | Urdu – Har Lamha Bakhabar

Tag: گرمی

  • گرمی کا اثر کم کرنے والے فرحت بخش مشروبات

    گرمی کا اثر کم کرنے والے فرحت بخش مشروبات

    کراچی سمیت ملک بھر میں گرمی کی لہر جاری ہے چونکہ گرمی کا موسم ہے اور جسم سے پانی بذریعہ پسینہ خارج ہو جاتا ہے اس لئے شدت کی پیاس لگتی ہے تو پیاس کی شدت کو کم کرنے اور جسم میں نمکیات کی مقدار کو برقرار رکھنے کیلئے گھر میں بنے مشروبات میں لیموپانی اور لسی پینا انتہائی مفید ہوتا ہے تاکہ جسم کو تقویت بھی پہنچے اور پانی کی کمی بھی پوری ہو۔

    شدید گرمی کا اثر کم کرنے اور ترو تازہ رہنے کیلئے فرحت بخش مشروبات جو آپ گھر پرباآسانی بناسکتے ہیں۔

    لسی

    گرمی کے موسم میں دہی کا استعمال نہایت مفید ہوتا ہے،  ٹھنڈی ٹھنڈی اور مزے دار لسی سے نہ صرف ہاضمہ درست رہتا ہے بلکہ لسی گرم ہوا سے بھی محفوظ رکھتی ہے۔

    اجزا

    آدھا لیٹر – دودھ

    دہی – ایک کلو

    پانی – آدھا لیٹر

    چینی – حسب ضرورت

    برف کے کیوب – چند عدد

    گلاب اور دارچینی کا عرق – چند قطرے

    ترکیب

    برف کے علاوہ سب چیزوں کو بلینڈ کر لیں اور بعد میں برف کے کیوب ڈال کر پیش کریں، نمکین لسی بنانے کے لیے چینی کی بجائے نمک لے لیں۔

    لیموں پانی یا سکنجبین

    لیموں کی سکنجبین موسمِ گرما کے لیے بہترین مشروب ہے،  گرمی میں لیموں کی سکنجبین پینے سے معدہ کی تلخی ،پسینہ کی کثرت اور نقاہت جیسے مسائل پیدا نہیں ہوتے اور پہلا ہی گھونٹ جسم میں سکون کی لہر دوڑا دیتا ہے۔

    اجزا

    لیموں – 2 عدد

    چینی – حسب ضرورت

    پانی – حسب ضرورت

    ترکیب

    لیموں کو نچوڑ کر رس نکال لیں پھر اس میں چینی اور پانی ملا کر اچھی طرح مکس کریں اور آئس کیوب ڈال کر پیش کریں، مزیدار سکنجبین تیار ہے۔

    تربوز کا شربت

    تربوز کا شربت موسم گرما میں جسم میں پانی کی کمی پوری کرنے کے لیے تربوز بہترین پھل ہے، تربوز کے شربت کا ایک گلاس آپ کو فوری توانائی فراہم کرتا ہے۔

    اجزا

    تربوز – دو کپ (ٹکڑوں میں

    پانی – حسبِ ضرورت

    لیموں کا رس – ایک کھانے کے چمچ

    لال سیرپ – ایک چائے کا چمچ

    چینی – حسبِ ضرورت

    برف کے ٹکڑے – حسبِ ضرورت

    لیموں اور پودینے کے پتے – گارنشنگ کے لئے

    ترکیب

    بلینڈر میں تربوز شامل کرکے تھوڑے سے پانی کے ساتھ بلینڈ کرلیں۔ ھر اسے کسی برتن میں نکال کر چھان لیں اور لیموں کا رس، لال سیرپ اور چینی شامل آخر میں لیموں، پودینے کے پتے اور برف کے ٹکڑوں کے ساتھ گلاس میں ٹھنڈا ہونے کے لئے رکھ دیں۔ تربوز کا شربت تیار ہے۔

    لیموں اور پودینے کا شربت

    اجزاء

    سوڈا واٹر – ایک بوتل

    کٹی ہوئی کالی مرچ – ایک چٹکی

    برف – ایک پیالی

    پودینے کی پتیاں – ایک پیالی

    براؤن چینی – ایک کھانے کا چمچ

    کالا نمک – آدھا چائے کا چمچ

    لیموں کا رس – چار کھانے کے چمچ

    پودینے کے پتے – سجانے کے لیے

    ترکیب

    بلینڈر میں تمام اجزاﺀ یکجان کرلیں، اسے گلاسوں میں ڈالیں اور پودینے کے پتوں سے سجا کر پیش کریں۔

    کیری کا شربت

    کچے آم کا شربت بھی خاصا فرحت بخش ہوتا ہے۔

    اجزاء

    کیری – ایک کلو

    چینی – تین پاؤ

    پیلا رنگ – ایک چٹکی

    مینگو ایسنس – دو سے تین قطرے

    ترکیب

    کیری دھو کر چھلکے سمیت ابال لیں، اب چھلکا اتار کر گودا نکال لیں۔ پھر چینی اور پیلا رنگ ڈال کر پکائیں، گاڑھا ہونے پر مینگو ایسنس شامل کرکے اتاریں اور پیش کریں۔

    فالسے کا شربت

    کٹھے میٹھےفالسے گرمیوں میں فرحت بخشتے ہیں اور گرمی دور کرتے ہیں۔

    اجزا

    فالسہ – 1 پاؤ

    چینی – حسب پسند

    نمک – حسب ذائقہ

    ترکیب

    فالسے کو دھو کر ایک گلاس پانی کے ساتھ بلینڈر میں بلینڈ کر لیں، پھر اسے چھلنی یا باریک رومال کی مدد سے اچھی طرح چھان لیں ۔1 کپ پانی میں حسب پسندچینی اور نمک حل کریں ۔ چھنےہوئے فالسے کے رس میں حسب ضرورت ٹھندا پانی اور چینی والا پانی شامل کر لیں، پسند کریں تو ذرا سی کالی مرچ بھی شامل کر لیں۔​

    فالسے کو پانی کے ساتھ بلینڈ کر نے کے بعد چھان کر آئس کیوبز ڈالیں، ٹھنڈا ٹھنڈا فالسے کا شربت تیار ہے۔

    کھجور کا شیک

    اجزاء

    کھجور – پانچ عدد نرم

    دودھ – ایک گلاس

    الائچی – ایک عدد

    شہد – ایک چمچ

    ترکیب

    کھجور اگر سخت ہو تو اس کو آدھ گھنٹہ پانی میں بھگو دیں، اس کے بعد گٹھلی نکال دیں اور چھلکا اگر سخت ہے تو اتار دیں۔ الائچی کے دانے نکال کر باریک کوٹ لیں۔ اب کھجوروں شہد اور دودھ کو بلینڈر میں ڈال کر دو منٹ تک مکس کریں، گلاس میں نکال کر الائچی کا سفوف شامل کریں اور ٹھنڈا کر کے پیش کریں۔

    بادام کا شربت

    اجزا

    بادام پاﺅڈر – ایک کپ

    دودھ – دو کپ

    کریم – دو کھانے کے چمچ

    چینی – آدھا کپ

    روز واٹر – دو کھانے کے چمچ

    آئس کیوب – ایک کپ

     

    ترکیب

    شربت بادامی بنانے کےلئے سب سے پہلے بلینڈر میں تمام اجزاءڈال کر اچھی طرح بلینڈ کر لیں اور گلاس میں نکال کر آئس کیوب ڈال کر ٹھنڈا ٹھنڈا سرو کریں۔

    خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہچانے کے لیے سوشل میڈیا پر شیئر کریں۔

  • کراچی میں آج شدید گرمی کا امکان

    کراچی میں آج شدید گرمی کا امکان

    کراچی: صوبہ سندھ کے دارالحکومت کراچی میں آج سورج آگ برسائے گا۔ درجہ حرارت 43 ڈگری سینٹی گریڈ تک جانے کا امکان ہے۔

    تفصیلات کے مطابق موسم گرما کے آغاز سے ہی کراچی سخت گرمی کی لپیٹ میں ہے تاہم آج اس گرمی میں مزید اضافہ ہوجائے گا۔ محکمہ موسمیات کا کہنا ہے کہ آج درجہ حرارت 41 سے 43 ڈگری سینٹی گریڈ تک جانے کا امکان ہے جبکہ آئندہ دو روز میں گرمی کی شدت میں مزید اضافے کا بھی امکان ہے۔

    محکمہ موسمیات کا کہنا ہے کہ مئی سال کا گرم ترین مہینہ شمار کیا جاتا ہے اور ہر سال کی طرح اس سال بھی مئی کا مہینہ شہر قائد پر سورج پوری آب و تاب کے ساتھ گرمی برسائے گا اور گرمی کی شدت میں اضافہ ہوتا رہے گا۔

    ڈی جی محکمہ موسمیات کا کہنا ہے کہ سمندری ہوائیں نہ چلنے سے کراچی میں گرمی کی شدت ہے۔ کراچی میں گرمی کی لہر ہفتے تک برقرار رہے گی تاہم اگلے 2 روز میں کراچی میں پارہ بتدریج کم ہوگا۔

    ماہرین کا کہنا ہے کہ درجہ حرارت بڑھنے سے پریشانی کی کوئی بات نہیں اس کے باوجود شہری احتیاط کریں اور شام 4 بجے تک اپنے گھروں یا دفاتر سے بلا ضرورت باہر نہ نکلیں۔

    مزید پڑھیں: شدید گرمی کے موسم میں احتیاطی تدابیر اختیار کریں

    مارہین کے مطابق باہر نکلنے کی صورت میں اپنے سر کو اچھی طرح ڈھانپ لیں۔ ڈاکٹرز نے بڑھتی ہوئی گرمی کے پیش نظر شہریوں کو پانی و مشروبات کے زیادہ استعمال کا مشورہ دیا ہے۔

    کراچی کے علاوہ سندھ کے بیشتر علاقوں میں شدید گرمی کی لہر برقرار ہے جبکہ پنجاب کے مختلف شہروں میں قدرت مہربان ہے۔ پنجاب کے مختلف شہروں میں بارش اور خوشگوار ہواؤں کا سلسلہ جاری ہے۔

    خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہچانے کے لیے سوشل میڈیا پر شیئر کریں۔

  • کراچی والے تیار ہوجائیں ، مئی میں ہیٹ ویو کا خدشہ

    کراچی والے تیار ہوجائیں ، مئی میں ہیٹ ویو کا خدشہ

    کراچی : محکمہ موسمیات نے خبردار کیا ہے کہ مئی میں سخت گرمی پڑ سکتی ہے اور ہیٹ ویو کا خدشہ بھی ہے، اس لیے کراچی کی عوام تیار رہیں اور احتیاطی تدابیر اختیار کریں۔

    تفصیلات کے مطابق کراچی والے شدید گرمی کے لئے تیار ہوجائیں، چیف میٹرولوجسٹ عبدالرشید نے مئی میں ہیٹ ویو کا خدشہ ظاہر کرتے ہوئے کہا کہ مئی میں سخت گرمی ہوگی، متعلقہ اداروں ہیٹ ویو کےحوالے سے آگاہ کردیا ہے۔

    محکمہ موسمیات کا کہنا ہے کہ آج شہر کا درجہ حرارت پینتیس ڈگری سینٹی گریڈ رہے گا لیکن محسوس اڑتیس ڈگری ہوگا، ہوا کےکم دباوٴ کےباعث گرمی کی شدت زیادہ محسوس کی جائےگی۔

    کراچی کا موجودہ درجہ حرارت32ڈگری اور ہوا میں نمی کاتناسب51فیصد ہے۔

    طبی ماہرین کا بھی کہنا ہے کہ کراچی میں آئندہ چند روز میں گرمی کی شدت میں اضافے کے پیش نظر شہریوں کو احتیاطی تدابیر اختیار کرنے کی ہدایت کی ہے۔

    سندھ پنجاب اور بلوچستان کے مختلف اضلاع گرمی کے نشانے پر ہے، چلچلاتی دھوپ اور لو کے تھپیڑوں سے شہری نڈھال ہیں،گذشتہ روز جیکب آباد میں درجہ حرارت سینتالیس شہید بینظیر آباد ، دادو، موہنجوداڈو، سبی اورخانپور میں چھیالیس ڈگری سینٹی گریڈ ریکارڈ کیا گیا۔

    دوسری جانب محکمہ موسمیات کے مطابق آئندہ چوبیس گھنٹے کے دوران ملک کے بیشتر علاقوں میں موسم گرم اور خشک رہیگا تاہم پنجاب اور خیبرپختونخوا کے بارانی علاقوں میں گرد آلود ہوائیں چلنے کا امکان ہے۔

    مزید پڑھیں :  ہیٹ ویو سے بچاؤ کے طریقے

    محکمہ موسمیات کا کہنا ہے کہ کشمیر اور اس سے ملحقہ پہاڑی علاقوں میں بعض مقامات پر تیزہواؤں اور گرج چمک کیساتھ ہلکی بارش کا امکان ہے، اسلام آباد، لاہور، فیصل آباد، ملتان سمیت وسطی اور جنوبی پنجاب کے بیشتر علاقوں میں موسم گرم اور خشک رہنے کی توقع ہے۔

    واضح رہے کہ 2015 جون میں کراچی میں پڑنے والی شدید گرمی سے ایک ہزار سے زائد افراد لقمہ اجل بن گئے تھے۔

    خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔

  • گرمی کی شدت میں کمی کے لیے سفید سڑکوں کا منصوبہ

    گرمی کی شدت میں کمی کے لیے سفید سڑکوں کا منصوبہ

    کیا آپ نے کبھی ایسی سڑکیں دیکھی ہیں جن کا رنگ سفید ہو؟ ہوسکتا ہے آپ نے دیکھی ہوں مگر آپ یقیناً اس بات سے ناواقف ہوں گے کہ یہ سڑکیں کسی شہر کا درجہ حرارت کم کرنے اور سخت گرمیوں میں اسے ٹھنڈا رکھنے میں مددگار ثابت ہوسکتی ہیں۔

    ہم جانتے ہیں کہ سیاہ سمیت تمام گہرے رنگ سورج کی روشنی کو اپنے اندر جذب کرتے ہیں۔ یہی وجہ ہے کہ موسم گرما میں گہرے رنگ نہ پہننے کی تاکید کی جاتی ہے تاکہ پہننے والے کو گرمی کم لگے۔

    اس کے برعکس سفید اور دیگر ہلکے رنگ سورج کی روشنی اور گرمی کو روک کر اسے واپس پھینک دیتے ہیں۔ اسی لیے گرمی سے بچنے کے لیے ہلکے رنگ کے کپڑوں کا استعمال کیا جاتا ہے۔

    یہی طریقہ کار اب سڑکوں پر بھی استعمال ہو رہا ہے۔

    سیاہ تارکول سے بنی سڑکیں گرمی کو بے تحاشہ جذب کرتی ہیں۔

    آپ نے اکثر سخت گرمیوں میں سڑک پگھلنے کے واقعات بھی سنے ہوں گے۔ اس کی وجہ یہی ہے کہ سیاہ رنگ گرمی کو اپنے اندر محفوظ کرلیتا ہے جس کے بعد سڑک پگھلنے لگتی ہے۔

    اس کی جگہ سفید سڑکیں نہ صرف گرمی کی شدت کو کم کرتی ہیں بلکہ زیادہ درجہ حرارت کے باعث ہونے والے توانائی کے زیادہ استعمال کی بھی بچت کرتی ہیں۔

    سفید سڑکوں کا تصور اب دنیا کے کئی شہروں میں فروغ پارہا ہے۔ لاس اینجلس میں 35 فیصد سڑکوں پر سفید چونا پھیلا دیا گیا جس کے بعد شہریوں کو گرمی میں واضح کمی محسوس ہوئی۔

    پاکستان کے گرمی سے متاثرہ بڑے شہروں خصوصاً کراچی اور لاہور میں بھی ایسی سڑکیں گرمی کو کم کرنے اور ہیٹ ویو کے دنوں میں تباہ کن نقصانات سےبچنے میں مدد دے سکتی ہے۔

    خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہچانے کے لیے سوشل میڈیا پر شیئر کریں۔

  • کراچی میں آج درجہ حرارت 38ڈگری سینٹی گریڈ تک جانے کا امکان

    کراچی میں آج درجہ حرارت 38ڈگری سینٹی گریڈ تک جانے کا امکان

    کراچی :محکمہ موسمیات نے خبردار کیا ہے  شہر قائد میں آج گرمی کی شدت میں اضافہ ہونے کا امکان ہے، درجہ حرارت 38ڈگری سینٹی گریڈ تک جا سکتا ہے۔

    تفصیلات کے مطابق کراچی میں گرمی کی نئی لہر کا آغاز ہوگیا ، جس سے گرمی کی شدت میں اضافہ متوقع ہے، آج درجہ حرارت 38ڈگری سینٹی گریڈ تک ہونے کا امکان ہے۔

    محکمہ موسمیات کا کہنا ہے کہ آج سے جمعرات تک سورج آگ برسائے گا، درجہ حرارت معمول سے چار سے پانچ درجے زیادہ رہنے کا امکان ہے جبکہ خشک ہوا کے باعث گرمی زیادہ محسوس کی جارہی ہے۔

    کراچی کاموجودہ درجہ حرارت36 ڈگری سینٹی گریڈہے جبکہ ہوامیں نمی کاتناسب 27 فیصدہے۔

    اس سے قبل محکمہ موسمیات نے پیش گوئی کی تھی کہ 15اپریل کے بعد کراچی کے موسم میں تبدیلی کا امکان ہے ۔

    مزید پڑھیں : خبردار ! 15 اپریل کے بعد کراچی کے موسم میں تبدیلی کا امکان

    پی ڈی ایم اے کا کہنا تھا کہ اپریل اورمئی کے دوران ملک بھرمیں گرمی برقرار رہے گی اور بارشیں معمول سے کم ہونے کاامکان ہے جبکہ آندھی اور جھکڑ چلیں گے، آندھی اور جھکڑ سے گندم کی کٹائی اور تھریشنگ متاثر ہوگی۔

    یاد رہے ایک ہفتے قبل کراچی میں شدید گرمی کی لہر جاری تھی ، جس نے شہریوں کا برا حال کردیا تھا اور درجہ حرارت 40 ڈگری تک جا پہنچا تھا۔

    دوسری جانب اسلام آباد اور پشاور سمیت ملک کے کئی شہروں میں موسلادھار بارش کے بعد  گرمی کا زور ٹوٹ گیا جبکہ بعض علاقوں کی ندی نالوں میں طغیانی آگئی ہے۔

    سندھ کے بیشتر شہروں میں موسلا دھار بارش نے موسم خوشگوارکردیا، سکھر ، گھوٹکی ، نواب شاہ ، دادومیں اور گردونواح میں بادل جم کربرسے۔

    محکمہ موسمیات کا کہنا ہے کہ آئندہ چوبیس گھنٹے کے دوران کراچی سمیت سندھ کے بیشتر علاقوں میں موسم گرم اور خشک رہے گا۔

    لاہور، راولپنڈی، گوجرانوالہ، فیصل آباد، سرگودھا، اسلام آباد، مالاکنڈ، ہزارہ، پشاور، مردان، کوہاٹ، فاٹا، گلگت بلتستان،کشمیر، بنوں، ڈی آئی خان، ڈی جی خان، ملتان اور ساہیوال میں چند مقامات پر تیزہواؤں اور گرج چمک کیساتھ بارش کا امکان ہے۔

    گزشتہ روز سب سے زیادہ درجہ حرارت شہید بینظیر آباد میں چھیالیس ڈگری سینٹی گریڈ ریکارڈ کیا گیا۔

    خبر کے بارے میں اپنی رائے کا اظہار کمنٹس میں کریں‘ مذکورہ معلومات کو زیادہ سے زیادہ لوگوں تک پہچانے کے لیے سوشل میڈیا پر شیئر کریں۔

  • کراچی میں درجہ حرارت38تک پہنچنے امکان، شدت42 ہوگی

    کراچی میں درجہ حرارت38تک پہنچنے امکان، شدت42 ہوگی

    کراچی: شہر آج پھر گرمی کی لپیٹ میں ہیں تاہم ہیٹ اسٹروک کا کوئی خدشہ نہیں، محکمہ موسمیات کا کہنا ہے کہ درجہ حرارت38تک پہنچنے امکان ہے جبکہ گرمی کی شدت42 ہوگی۔

    تفصیلات کے مطابق کراچی والے گرمی سے نڈھال ہیں ، جھلسا دینے والی دھوپ نے ہر کسی کو پریشان کر دیا، محمکہ موسمیات نے خبردار کیا ہے کہ کراچی میں گرمی کی لہر آئندہ چند روز برقرار رہے گی اور رواں ہفتے گرم ہوائیں چلتی رہیں گی اور پارہ 40ڈگری سینٹی گریڈ رہنے کا امکان ہے جبکہ گرمی44ڈگری سینٹی گریڈ تک محسوس ہوگی۔

    محکمہ موسمیات کا کہنا ہے شہر میں آج درجہ حرارت اڑتیس تک پہنچنے امکان ہے جبکہ شدت بیالیس درجے کی ہوگی۔ تاہم درجہ حرارت بڑھنے سے ہیٹ اسٹروک کا کوئی خدشہ نہیں۔

    کراچی کا موجودہ درجہ حرارت 37 ڈگری سینٹی گریڈ جبکہ ہوا میں نمی کا تناسب 14فیصد ہے۔

    ڈائریکٹر محکمہ موسمیات کے مطابق کراچی میں گرمی کی شدت 2روز تک برقرار رہے گی، درجہ حرارت45ڈگری سےزیادہ ہوتوہیٹ اسٹروک کاامکان ہوتا ہے، آئندہ 2روز بعد گرمی کی شدت میں کمی ہوگی۔

    محکمہ موسمیات کا کہنا ہے کہ رواں موسم گرما میں کراچی سمیت سندھ بھر میں گرمی کی شدت میں اضافے اور کمی کا سلسلہ برقرار رہے گا

    کراچی میں اتوار اور پیر کو زیادہ درجہ حرارت انتالیس ڈگری سینٹی گریڈ ریکارڈ کیا گیا۔

    دوسری جانب میئرکراچی کی ہدایت پر کے ایم سی کے اسپتالوں میں ہیٹ ویو کے خدشے کے پیش نظر اقدامات کئے جارہے ہیں، سینئرڈائریکٹرمیڈیکل اینڈہیلتھ سروسز نے اسپتال منتظمین کو مراسلہ جاری کیا ہے ، جس میں اسپتالوں کوہیٹ اسٹروک مینجمنٹ سینٹر قائم کرنےکی ہدایت کی گئی ہے۔

    مراسلہ میں کہا گیا ہے کہ 13 اسپتالوں میں ہیٹ اسٹروک سینٹر قائم کئےجائیں۔

    ڈاکٹرز نے بڑھتی ہوئی گرمی کے پیش نظر شہریوں کو احتیاط برتنے، غیر ضروری طور پر گھروں سے باہر نہ نکلنے اور پانی زیادہ پینے کا مشورہ دیا ہے۔

    خبر کے بارے میں اپنی رائے کا اظہار کمنٹس میں کریں‘مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔

  • کراچی میں آج ہیٹ اسٹروک کا خدشہ

    کراچی میں آج ہیٹ اسٹروک کا خدشہ

    کراچی: صوبہ سندھ کے دارالحکومت کراچی میں آج درجہ حرارت 41 ڈگری سینٹی گریڈ تک جائے گا جس کی وجہ سے ہیٹ اسٹروک کا خدشہ ہے۔

    تفصیلات کے مطابق محکمہ موسمیات کا کہنا ہے کہ آج کراچی کا درجہ حرارت (دوپہر 12 بجے) 36 ڈگری سینٹی گریڈ ہے تاہم دن گزرنے کے ساتھ ساتھ یہ 41 ڈگری سینٹی گریڈ تک چلا جائے گا۔

    محکمہ موسمیات کے مطابق ہوا میں نمی کا تناسب 12 فیصد ہے۔ نمی کا تناسب کم ہونے سے گرمی کی شدت زیادہ محسوس ہوگی۔

    درجہ حرارت 41 ڈگری سینٹی گریڈ تک جانے کے باعث شہر میں ہیٹ اسٹروک کا خدشہ ہے۔

    ہیٹ اسٹروک کے پیش نظر ماہرین نے شہریوں کو حفاظتی تدابیر اپنانے اور غیر ضروری طور پر باہر نکلنے سے گریز کی ہدایت کی ہے۔

    مزید پڑھیں: ہیٹ اسٹروک میں احتیاطی تدابیر اختیار کریں

    خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہچانے کے لیے سوشل میڈیا پر شیئر کریں۔

  • آسٹریلیا میں گرمی کا 80 سالہ ریکارڈ ٹوٹ گیا

    آسٹریلیا میں گرمی کا 80 سالہ ریکارڈ ٹوٹ گیا

    کینبرا: آسٹریلیا میں گرمی کا 80 سال کا ریکارڈ ٹوٹ گیا۔ سب سے زیادہ گرمی سڈنی میں پڑی جہاں 47 ڈگری سینٹی گریڈ درجہ حرارت ریکارڈ کیا گیا۔

    آسٹریلیا خط استوا کے شمال میں واقع ہے اس لیے دنیا کے دیگر ممالک کے برعکس یہاں اپریل سے ستمبر تک سردی اور اکتوبر سے مارچ تک گرمی پڑتی ہے۔

    اس سال اب تک سب سے زیادہ گرمی آسٹریلیا کے شہر سڈنی میں ریکارڈ کی گئی جہاں پارہ 47 اعشاریہ 3 ڈگری سینٹی گریڈ تک چلا گیا۔

    محکمہ موسمیات کے مطابق سنہ 1939 کے بعد سڈنی میں ریکارڈ کی جانے والی یہ شدید ترین گرمی ہے۔ گرمی کی شدید لہر نے شہریوں کو جھلسا کر رکھ دیا۔

    سڈنی کے مغربی علاقے پینرتھ میں سورج کی تپش سب سے زیادہ رہی۔

    محکمہ موسمیات کی جانب سے شہریوں کو غیر ضروری طور پر گھروں سے نہ نکلنے جبکہ سیاحوں کو خاص طور پر احتیاط برتنے کی ہدایت کردی گئی ہے۔

    سڈنی میں جگہ جگہ ایمبولینس بھی کھڑی کردی گئی ہیں تاکہ گرمی سے بے حال شہریوں کو کسی ہنگامی صورتحال میں فوری ابتدائی امداد دی جاسکے۔

    اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی فیس بک وال پر شیئر کریں۔

  • پاکستان اور بھارت میں ناقابل برداشت جان لیوا ہیٹ ویوز کا خدشہ

    پاکستان اور بھارت میں ناقابل برداشت جان لیوا ہیٹ ویوز کا خدشہ

    نیویارک: پاکستان اور بھارت میں غیر معمولی موسم گرما اب عام بات بن گیا ہے تاہم ماہرین نے خدشہ ظاہر کیا ہے کہ رواں صدی کے خاتمے تک اس خطے میں ایسی ہیٹ ویوز آئیں گی جو نہایت خطرناک، جان لیوا اور ناقابل برادشت ہوں گی۔

    امریکا کے میساچوسٹس انسٹیٹیوٹ آف ٹیکنالوجی (ایم آئی ٹی) کی جانب سے کی جانے والے تحقیق میں بتایا گیا کہ سنہ 2100 تک جنوبی ایشیا قیامت خیز گرمیوں کی زد میں آجائے گا۔

    تحقیق کے مطابق پاکستان کا جنوبی علاقہ، شمالی بھارت اور بنگلہ دیش اس سے سب سے زیادہ متاثر ہوں گے۔

    ماہرین کے مطابق گرمی کی یہ شدت اس قدر ہوگی کہ گھر سے باہر دھوپ میں نکلنا ایک نا ممکن عمل بن جائے گا۔

    تحقیق میں بتایا گیا کہ اس جان لیوا گرمی سے دریائے سندھ کا زرخیز علاقہ اور بھارت میں دریائے گنگا بھی متاثر ہوں گے جو دونوں ممالک میں غذائی پیداوار کا سب سے اہم اور بڑا ذریعہ ہیں۔

    مزید پڑھیں: ہیٹ ویو کو ہوّا مت بنائیں

    ایم آئی ٹی کے ایک پروفیسر کے مطابق یہ صرف ہیٹ ویو نہیں ہوگی جو لوگوں کی ہلاکت کا باعث بنے گی، بلکہ اس کے باعث ہونے والی قلت آب، خشک سالی اور غذائی پیداوار میں کمی لوگوں کی زندگیوں کے لیے خطرناک ثابت ہوں گی۔

    ماہرین کا کہنا ہے کہ گرمی کی شدت میں اضافے کا عمل شروع ہوچکا ہے اور یہ اگلی آنے والی دہائیوں میں مزید شدت اختیار کرجائے گا اور رواں صدی کے اختتام تک یہ گرمیاں ناقابل برداشت صورت اختیار کرلیں گی۔

    یاد رہے کہ قیامت خیز ہیٹ ویوز پاکستان کے لیے نئی نہیں، اور سنہ 2015 میں صوبہ سندھ کا دارالحکومت کراچی خطرناک ہیٹ ویو کا سامنا کر چکا ہے جس میں 1 ہزار سے زائد افراد اپنی جانوں سے ہاتھ دھو بیٹھے تھے۔

    اس ہیٹ ویو نے بھارت کو بھی متاثر کیا تھا اور دونوں ممالک میں تقریباً ساڑھے 3 ہزار افراد شدید گرمی کے باعث لقمہ اجل بن گئے تھے۔

    اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی فیس بک وال پر شیئر کریں۔

  • سوئمنگ ٹب میں ناچتا گوریلا

    سوئمنگ ٹب میں ناچتا گوریلا

    شدید گرمیوں کے موسم میں ٹھنڈے پانی سے نہانا اور اس سے کھیلنا نہایت فرحت بخش احساس ہے جو بچوں اور بڑوں کو ہی نہیں بلکہ جانوروں کو بھی خوشی کا احساس دیتا ہے۔

    گرمی سے پریشان یہ گوریلا بھی پانی کے ٹب میں نہایت مگن ہو کر رقص کر رہا ہے جو دیکھنے والوں کے چہرے پر مسکراہٹ بکھیر دے گا۔

    امریکی ریاست ٹیکسس کے شہر ڈلاس میں واقع چڑیا گھر میں یہ گوریلا انٹرنیٹ پر نہایت مقبول ہورہا ہے جو پانی کے ٹب میں ناچ رہا ہے۔

    اسے دیکھ کر بظاہر یوں محسوس ہوتا ہے کہ سخت گرمی کے بعد ٹھنڈے پانی کے اس ٹب نے اسے جتنی راحت بخشی، آج سے قبل کسی شے نے نہیں دی ہوگی۔

    ویڈیو میں ٹب میں گول گول رقص کرتا یہ گوریلا یقیناً دنیا کا سب سے خوش رہنے والا جانور معلوم ہوتا ہے۔

    چڑیا گھر کی انتظامیہ کا کہنا ہے کہ اس طرح کی خوشگوار حرکات نہ صرف خود ان جانوروں بلکہ قریب موجود دیگر جانوروں پر بھی جسمانی و ذہنی طور پر مفید اثرات مرتب کرتی ہیں۔

    اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی فیس بک وال پر شیئر کریں۔