Tag: گرمی

کراچی: شہر قائد میں آج موسم آج گرم اور مرطوب رہے گا، دن کے اوقات میں گرمی کی شدت میں اضافے کا امکان ہے۔

محکمہ موسمیات کے مطابق کراچی میں درجہ حرارت 35 سے 38 ڈگری سینٹی گریڈ تک جانے کا امکان ہے، جب کہ موجودہ درجہ حرارت 29 ڈگری سینٹی گریڈ ہے۔

محکمہ موسمیات کا کہنا ہے کہ گرمی کی شدت 30 ڈگری سینٹی گریڈ تک محسوس کی جا رہی ہے، کم سے کم درجہ حرارت 27.5 ڈگری سینٹی گریڈ ریکارڈ ہوا، کراچی میں ہوا میں نمی کا تناسب 67 فی صد ہے۔

جنوب مغربی سمت سے ہلکی رفتار سے ہوائیں چل رہی ہیں، کراچی کا فضائی معیار بہتر ہے، دنیا کے آلودہ ترین شہروں میں کراچی آج 42 ویں نمبر پر آیا، ایئر کوالٹی انڈیکس کے مطابق ہوا میں آلودہ ذرات کی مقدار 56 پرٹیکیولیٹ میٹرز ریکارڈ کیا گیا ہے۔

ملک بھر کا موسم

محکمہ موسمیات کے مطابق آج ملک کے بیش تر علاقوں میں موسم خشک جب کہ وسطی اور جنوبی علاقوں میں گرم رہے گا، بالائی پنجاب، بالائی خیبر پختونخوا، اسلام آباد، گلگت بلتستان اور کشمیر میں مطلع جزوی ابر آلود رہنے کا امکان ہے، چند مقامات پر تیز ہواؤں، جھکڑ اور گرج چمک کے ساتھ بارش کا امکان ہے۔

جنوبی پنجاب اور بالائی سندھ میں آندھی اور جھکڑ چلنے کا بھی امکان ہے، اسلام آباد میں مطلع جزوی ابر آلود رہنے کے علاوہ آندھی، جھکڑ چلنے اور گرج چمک کے ساتھ بارش کا امکان ہے۔

خیبر پختونخوا کے بیش تر اضلاع میں مطلع ابر آلود رہے گا، وزیرستان، ڈیرہ اسماعیل خان، ٹانک میں آندھی اور جھکڑ چلنے، گرج چمک سے بارش کا امکان ہے، بنوں، کوہاٹ، کرم، خیبر، باجوڑ، چترال میں بھی آندھی اور جھکڑ چلنے اور گرج چمک سے بارش کا امکان ہے۔ سوات، دیر، کوہستان، مالاکنڈ، شانگلہ، بونیر، مانسہرہ، ایبٹ آباد، صوابی، نوشہرہ اور پشاور میں چند مقامات پر آندھی اور جھکڑ چلنے اور گرج چمک کے ساتھ بارش کی توقع ہے۔

پنجاب کے بیش تر بالائی اضلاع میں مطلع ابر آلود رہے گا، مری، گلیات، راولپنڈی، اٹک، جہلم، چکوال، میانوالی، بھکر، منڈی بہاؤالدین، لاہور اور گوجرانوالہ میں آندھی، جھکڑ چلنے اور گرج چمک سے بارش کی توقع ہے۔ بلوچستان اور سندھ کے بیش تر اضلاع میں موسم خشک اور گرم رہے گا، بالائی سندھ میں آندھی اور جھکڑ چلنے کا بھی امکان ہے۔ کشمیر اور جی بی میں مطلع جزوی ابر آلود رہنے کے علاوہ چند مقامات پر تیز ہواؤں اور گرج چمک کے ساتھ بارش کا امکان ہے۔