Tag: گروہ پکڑا گیا

  • افغان شہریوں کو پاکستانی دستاویزات جاری کرنے والا گروہ پکڑا گیا

    افغان شہریوں کو پاکستانی دستاویزات جاری کرنے والا گروہ پکڑا گیا

    ایف آئی اے پشاور زون نے بڑی کاروائی کرکےافغان شہریوں کو پاکستانی دستاویزات جاری کرنے والا گروہ گرفتار کرلیا۔

    ایف آئی اے اینٹی کرپشن سرکل پشاور نے افغان شہریوں کو جعلی پاکستانی دستاویزات فراہم کرنے والے گروہ کے 4 ملزمان کو گرفتار کیا ہے۔

    ترجمان کا کہنا ہے کہ گرفتار ملزمان میں سید صداقت شاہ، نادر خان، عارف خان، اور عالم زیب شامل ہیں ملزمان اسٹیشنری شاپ کی آڑ میں جعلی دستاویزات بنانے میں ملوث ہیں۔

    ترجمان کے مطابق ملزمان کو چھاپہ مار کارروائی میں پشاور سے گرفتار کیا گیا ہے، ابتدائی تفتیش کے مطابق منظم گروہ افغان شہریوں کے لیے جعلی پاکستانی شناختی کارڈز اور پاسپورٹس کی تیاری میں ملوث تھا۔

    ایف آئی اے ترجمان کا کہنا ہے کہ چھاپہ مار کاروائی میں موقع سے جعلی پیدائشی اور وفات کے سرٹیفکیٹس برآمد ہوئے ہیں، چھاپہ مار کاروائی میں ڈپٹی کمشنر پشاورکے نام سے جعلی مہریں بھی برآمد ہوئی ہیں۔

    ترجمان کے مطابق ملزمان سے جعلی پولیس کلیئرنس سرٹیفکیٹس اور نادرا پراسیسنگ سے متعلق اسٹامپ پیپرز بھی برآمد ہوئی ہیں۔ ملزمان کو گرفتار کر کے تفتیش کا آغاز کر دیا گیا ہے ملزمان کے دیگر ساتھیوں کی گرفتاری کے لئے چھاپہ مار کاروائیاں جاری ہیں۔

  • دلہنوں کے قیمتی لباس چوری کرنے والا گروہ پکڑا گیا

    دلہنوں کے قیمتی لباس چوری کرنے والا گروہ پکڑا گیا

    راولپنڈی : دلہنوں کے جوڑے چوری کرنے والے ملزمان پکڑے گئے، ایک کروڑ روپے مالیت کے لہنگے،غرارے اوردوسرے جوڑے برآمد کرلیے گئے، ملزمان انتہائی مہنگے کپڑے سستے داموں فروخت کردیا کرتے تھے۔

    تفصیلات کے مطابق راولپنڈی میں دلہنوں کے لاکھوں روپے کے جوڑے کوڑیوں کے مول بکنے لگے، تھانہ صادق آباد پولیس نے خفیہ اطلاع پر کارروائی کرکے بوتیک سے دلہنوں کے قیمتی لباس چوری کرنے والے گینگ کو پکڑ لیا، جن کے قبضے سے مسروقہ عروسی لباس برآمد کر لیے۔

    بوتیک کے مہنگے ترین کپڑے بوریوں میں سے نکلے۔ پولیس نے ملزمان کو میڈیا کے سامنے پیش کردیا، ملزمان نے ایک پلازہ کی بارہ دکانوں میں نقب لگا کر قیمتی جوڑے چوری کیے۔

    برآمد کیے گئے قیمتی جوڑوں کی مالیت ایک کروڑ روپے سے زائد بتائی جارہی ہے۔ ایس پی ملک اقبال نے میڈیا کو بتایا کہ واردات میں ملوث چار ملزمان کو گرفتار کیا گیا ہے، جوڑوں کی برآمدگی اورچوروں کی گرفتاری پرمقامی تاجر نے تھانہ صادق آباد پولیس کو ایک لاکھ انعام دینے کا اعلان کیا۔

    ایس پی اقبال ملک کو ایک لاکھ کی اتنی خوشی ہوئی کہ جلدی میں ویڈیو بنانے والے شخص کو پچاس روپے دینے کا اعلان کردیا، پولیس کا کہنا ہے کہ چور مہنگےعروسی جوڑے چوری کرکے سستے داموں بیچا کرتے تھے۔