لاہور : آئی جی پنجاب انعام غنی کا کہنا ہے کہ گریٹراقبال پارک میں خاتون کوہراساں کرنے کے واقعے میں مزید 36 ملزمان کو گرفتار کرلیا گیا ہے اور اب تک 66افرادکو گرفتار کیاجا چکاہے۔
تفصیلات کے مطابق گریٹراقبال پارک میں خاتون کوہراساں کرنے کے معاملے میں لاہور پولیس نےمزید36 ملزمان کوگرفتارکر لیا، آئی جی پنجاب انعام غنی نے کہا کہ اب تک 66افرادکو گرفتار کیاجا چکاہے، تمام ملزمان کو ویڈیو اور تصاویر میں شناخت ہونے پر گرفتار کیا گیا۔
انعام غنی کا کہنا تھا کہ گرفتار تمام ملزمان کی پہلے نادرا سے شناخت کروائی گئی ہے، نادرا سے شناخت کے بعد ملزمان کی باضابطہ گرفتاری ڈالی گئی، جبکہ 100سے زائد افراد کو مشکوک جان کر حراست میں لیا گیا تھا۔
دوسری جانب ی آئی جی شارق جمال نے بھی تصدیق کی ہے کہ گریٹر اقبال پارک واقعے میں 66ملزمان گرفتار ہوچکےہیں جبکہ انویسٹی گیشن پولیس نے 300سے زائد افراد سے پوچھ گچھ کی۔
شارق جمال کا کہنا تھا کہ ابتدائی تفتیش کے لیے 100سےزائدافراد کو تحویل میں لیاگیا اور تمام افراد کی جیو فینسنگ اورفیس میچنگ کروائی گئی جبکہ موبائل فرانزک سےملزمان کی موجودگی کاتعین کرکے 66 افراد کو گرفتار کیا گیا۔
ڈی آئی جی نے بتایا کہ 40 گرفتارملزمان کو شناخت پریڈ کے لیے بھیجا جارہا ہے، شناخت پریڈ کا عمل مکمل ہونے پر مزید تفتیش کو آگے بڑھایا جائےگا اور مقدمے میں ملوث دیگر ملزمان کوبھی جلد گرفتار کرلیا جائے گا۔
