پاکستان کے سابق کرکٹر محمد عامر کے وکٹ لینے کے بعد جشن منانے کے انداز پر افغان کرکٹر گلبدین نائب نے انھیں تنقید کا نشانہ بنایا ہے۔
آئی ایل ٹی ٹوئنٹی میں دبئی کیپٹلز اور ڈیزرٹ وائپرز کے درمیان ہونے والے فائنل میچ میں پاکستانی کے سابق لیفڈ ہینڈ پیسر محمد عامر نے گلبدین نائب کو جلد آؤٹ کردیا تھا، اب ان کے ردعمل کے بارے میں افغان کرکٹر نے بات کی ہے۔
اس ہائی اسٹیک مقابلے میں جب محمد عامر اپنا دوسرا اوور کرانے آئے تو انھوں نے گلبدین نائب کو صرف 5 رنز پر ایل بی ڈبلیو کردیا۔
وکٹ لینے کے بعد محمد عامر نے منفرد انداز میں جشن منایا انھوں نے گلبدین نائب کے سگنیچر انداز کی نقل کی، ایک ایک ایسا اقدام تھا جس نے شائقین اور کرکٹ ماہرین کی توجہ اپنی جانب مبذول کرالی اور اس پر کافی بات بھی کی گئی۔
افغانستان کے گلبدین نائب نے کرکٹ میں عزت کی اہمیت پر زور دیتے ہوئے کہا کہ میں نے ہمیشہ کہا ہے کہ کرکٹ ایک جنٹیلمین گیمز ہے اور اس میں آپ کو ایک دوسرے کی عزت کرنی چاہیے۔
گلبدین نے کہا کہ اگر آپ کسی کو عزت نہیں دیں گے تو پھر کوئی بھی آپ کی عزت نہیں کریگا، وہ اچھی طرح جانتے ہیں کہ ان کے اس انداز کے بعد انھوں نے کتنی عزت کمائی ہے۔
انھوں نے کہا کہ ایک کرکٹر کے طور پر ایک انسان کے طور پر آپ کو ہر کسی کی عزت کرنی چاہیے، خیال رہے کہ اس مقابلے میں دبئی کیپٹلز کی ٹیم فاتح رہی تھی اور اس نے آئی ایل ٹی ٹوئنٹی میں پہلا ٹائٹل اپنے نام کیا تھا۔
