کراچی : میئر کراچی مرتضیٰ وہاب نے نامکمل گلستان جوہر انڈر پاس کا افتتاح کردیا، 1100 میٹر طویل انڈرپاس عوام کیلئے کھول دیا گیا۔
تفصیلات کے مطابق میئر کراچی مرتضیٰ وہاب نے نامکمل گلستان جوہر انڈر پاس عوام کے لئے کھول دیا، میئرکراچی اورڈپٹی میئر نےموٹر سائیکل پرانڈر پاس کامعائنہ بھی کیا۔
اس موقع پر میڈیا سے گفتگو کرتے ہوئے کہا کہ کراچی کے تین اہم منصوبوں پر2.1ارب روپےکی لاگت آئی، گلستان جوہر چورنگی پر انڈرپاس کا آج افتتاح کر رہے ہیں، انڈرپاس 1100میٹر لمبا اور 19میٹر چوڑا ہے، چیئرمین بلاول بھٹو، مراد علی شاہ اور ناصر شاہ کاشکرگزار ہوں۔
مرتضیٰ وہاب کا کہنا تھا کہ یہ علاقہ کنٹونمنٹ بورڈفیصل کاہے لیکن پیپلزپارٹی بلاتفریق کام کرنے پریقین رکھتی ہے، اختیارات کا رونانہیں روتی۔
میئر کراچی نے کہا کہ یہ انڈرپاس کھولنا ضروری تھا تاکہ سروس لین پر کام کرسکیں ، جوہر چورنگی انڈر پاس کے اطراف سروس لین بھی ٹھیک کرکے دیں گے۔
ان کا کہنا تھا کہ اگلے60روزمیں بہت سارےمنصوبے مکمل ہونے کےقریب ہیں، اب ایک کےبعد ایک افتتاحی فیتےکٹیں گے۔
مرتضیٰ وہاب نے بتایا کہ ماضی میں جو لوگ تھے اگر وہ کام کرتے تویہ حالات نہ ہوتے، ت سے صرف ’’تنقید‘‘نہیں ’’ترقی ‘‘اور ’’تعمیر‘‘بھی ہے۔
انھوں نے بتایا کہ سفاری پارک اور چڑیاگھر کراچی میں ترجیحی فہرست میں ہیں ، سفاری پارک اور چڑیاگھر کی بہتری کیلئے ٹیم بیرون ملک سےآرہی ہے۔
میئر کراچی کا کہنا تھا کہ ناتھاخان پل پرکام چل رہاہےمیرے لئ ےکہناآسان تھاکہ اختیارات نہیں لیکن ناتھاخان کےنیچےکےانڈرپاس پرکل سےکام شروع کردیا جائے گا۔