Tag: گلستان جوہر

کراچی: شہر قائد کے علاقے گلستان جوہر میں زہریلی چیز کھانے سے 3 بچے جاں بحق ہو گئے جب کہ ان کی ماں کی حالت نازک ہے۔

تفصیلات کے مطابق آج گلستان جوہر کراچی میں خاتون اور 3 بچوں کے کوئی زہریلی چیز کھانے کا واقعہ پیش آیا تھا، نجی اسپتال انتظامیہ کا کہنا ہے کہ جب انھیں اسپتال لایا گیا تو بچے مردہ حالت میں تھے۔

پولیس کا کہنا ہے کہ جاں بحق بچوں کی شناخت ارشان، میشال اور زیدان کے ناموں سے ہوئی ہے، اسپتال انتظامیہ کے مطابق بچوں میں 2 لڑکے اور ایک لڑکی تھی، پولیس کے مطابق بچوں کی والدہ کا نام نورین عمران ہے، متاثرہ خاندان گلستان جوہر بلاک 19 کا رہائشی ہے۔

پولیس کا کہنا ہے کہ خاتون نورین کی حالت تشویش ناک ہے، نجی اسپتال کے ترجمان نے بھی کہا کہ جب خاتون کو لایا گیا تھا تو ان کی سانسیں چل رہی تھیں، پولیس نے کہا 4 سے 7 سال کی عمر کے تینوں بچوں کا اسپتال پہنچنے سے پہلے ہی انتقال ہو گیا تھا۔

پولیس حکام کے مطابق متاثرہ خاندان کے گھر کا پتا بھی خاتون ہی نے بتایا ہے، ایک ٹیم فوری طور پر وہاں بھیجی گئی ہے، تاکہ اصل معاملہ واضح ہو۔

ایس ایس پی ایسٹ نے بتایا کہ واقعہ فوڈ پوائزننگ کا معلوم ہوتا ہے، ساجد سدوزئی کے مطابق بلاک 19 میں واقع فلیٹ میں اینٹی سیپٹک اسپرے کیا گیا تھا۔

کراچی: شہر قائد کے علاقے گلستان جوہر میں پولیس کی فائرنگ سے ایک شخص ہلاک ہو گیا، جس کی شناخت صفدر کے نام سے کی ہوئی ہے، پولیس کا کہنا ہے کہ مرنے والا شخص واردات کر کے فرار ہو رہا تھا۔

اے آر وائی نیوز کے مطابق کراچی میں گلستان جوہر تھانے کے قریب فائرنگ سے ایک شخص کی ہلاکت کی اطلاع ملی تھی، بعد ازاں معلوم ہوا کہ ہلاک ہونے والا ڈاکو ہے، جس کی شناخت صفدر کے نام سے ہوئی۔

ایس ایس پی ایسٹ ساجد سدوزئی کا کہنا تھا کہ ہلاک ملزم دیگر ساتھیوں کے ہمراہ فیروزآباد سے لوٹ مار کر کے نکلا تھا، ملزمان فیروزآباد میں 60 ہزار کی ڈکیتی کر کے یونی ورسٹی روڈ کی جانب فرار ہو رہے تھے، تاہم یونی ورسٹی روڈ پر پولیس نے مشتبہ ملزمان کو روکنے کی کوشش کی، جس پر انھوں نے فائرنگ کر دی۔

ایس ایس پی کے مطابق ملزمان کی فائرنگ کے جواب میں پولیس اہل کاروں کی فائرنگ سے موٹر سائیکل سوار ملزم زخمی ہوا، جو بعد ازاں زخموں کی تاب نہ لا کر دم توڑ گیا، جب کہ ایک ملزم موٹر سائیکل پر اور دیگر کار میں فرار ہونے میں کامیاب ہو گئے۔

پولیس کا کہنا ہے کہ مذکورہ ملزمان ڈکیتی کے لیے کار اور موٹر سائیکل استعمال کرتے تھے، ہلاک ملزم صفدر کا سابقہ مجرمانہ ریکارڈ بھی حاصل ہو گیا ہے، ملزمان کا تعلق گھروں میں ڈکیتی کرنے والے گروپ سے ہے۔

ایس ایس پی نے بتایا کہ ملزمان نے فیروزآباد میں ایک گھر سے 60 ہزار روپے اور 8 تولے سونا لوٹا تھا، متاثرہ خاندان نے مرنے والے ڈاکو کو شناخت کر لیا ہے۔ پولیس کے مطابق سائٹ سپر ہائی وے تھانے میں ملزم کے خلاف دو مقدمات درج ہیں، کل بھی گلشن میں انھوں نے ڈکیتی کی تھی جس کے متاثرین نے بھی ملزم کو شناخت کر لیا ہے۔