کراچی : ایف پی سی سی آئی نے گلف ممالک میں پاکستانی ورکرز کو ویزوں میں مشکلات کے حوالے سے خبردار کردیا۔
تفصیلات کے مطابق گلف ممالک میں پاکستانی ورکرز کو ویزے ملنے میں مشکلات نے خطرے کی گھنٹی بجا دی ہے۔
سینئر نائب صدرایف پی سی سی آئی ثاقب فیاض نے کہا ہے کہ ورکرزکوویزوں میں مشکلات سے ترسیلات زرمیں کمی ہوگی، رواں برس ترسیلات زر میں 20 سے 25 فیصد کمی ہوگی۔
ثاقب فیاض کا کہنا تھا کہ خلیجی ممالک میں پاکستانی ورکرز کو ویزہ ملنے کی صورتحال کافی سنگین ہوگئی ہے، خلیجی ممالک نے یقین دہانی کرائی تھی ایف پی سی سی آئی کے لیٹر پر ورکرز کو ویزے ملیں گے۔
مائیکرو فنانس: ملازمت سے تنگ ہیں تو یہ جان لیں
انھوں نے بتایا کہ صورتحال یہ ہےکہ ایف پی سی سی آئی کے لیٹر پر بھی 50 فیصد ویزے مسترد ہو رہے ہیں، 8 مہینوں میں ایکسپورٹ 22 ارب ڈالر، اور امپورٹ 37 ارب ڈالر رہی۔
سینئرنائب صدرایف پی سی سی آئی کا کہنا تھا کہ اتنا بڑا تجارتی خسارہ ترسیلات زر سے پورا ہو رہا ہے ، رواں برس لیبر ویزوں میں مسائل سے معیشت کیلئے مسائل بڑھ جائیں گے ، وزارت خارجہ امور سے مطالبہ کرتے ہیں کہ مسئلے پر فوری قابو پائے۔
