Tag: گلوکارہ برسی

گلوکارہ مالا کی مدھر اور رسیلی آواز میں ایک گیت بہت مقبول ہوا تھا جس کے بول ہیں، ’’دل دیتا ہے رو رو دہائی کسی سے کوئی پیار نہ کرے، بڑی منہگی پڑے گی یہ جدائی کسی سے کوئی پیار نہ کرے‘‘ اور مالا کو اس گیت پر فلمی صنعت کا سب سے معتبر نگار ایوارڈ بھی دیا گیا تھا۔ آج گلوکارہ مالا کی برسی ہے۔

مالا کی آواز میں یہ سدا بہار گیت 1963 میں ریلیز ہونے والی فلم ’’عشق پر زور نہیں‘‘ میں شامل تھا اور شاعر تھے قتیل شفائی۔ مالا نے پسِ پردہ گلوکاری کا آغاز معروف موسیقار ماسٹر عبداللہ کی فلم ’’سورج مکھی‘‘ سے 1962 میں کیا تھا۔ مالا کا اصل نام نسیم نازلی تھا۔ فلمی موسیقار شمیم نازلی ان کی بڑی بہن تھیں اور وہی نسیم کی فنِ موسیقی میں اوّلین استاد بھی تھیں۔ فلمی دنیا میں نسیم نازلی نے ’’مالا‘‘ کے نام سے شہرت اور مقبولیت پائی۔ وہ 9 نومبر 1942ء میں پیدا ہوئی تھیں۔ نسیم بیگم نے دو شادیاں کی تھیں اور دونوں ہی ناکام رہیں۔ فلمی دنیا میں مالا نے المیہ اور طربیہ دونوں طرح‌ کے گیت گائے۔ انھوں نے اردو اور پنجابی زبانوں میں‌ اپنی آواز کا جادو جگایا۔ 1965 میں فلم ’’نائلہ‘‘ کے گیت ’’اب ٹھنڈی آہیں بھر پگلی جا اور محبت کی پگلی‘‘ پر انھیں دوسری مرتبہ نگار ایوارڈ دیا گیا۔ مالا نے اپنے وقت کے بڑے اور نام ور موسیقاروں کے ساتھ کام کیا اور آخری مرتبہ ان کی آواز فلم ہنڈریڈ رائفلز کے لیے ریکارڈ کی گئی تھی جو 1981 میں ریلیز ہوئی۔ مالا بیگم نے فلم ارمان، احسان، دوراہا، دل میرا دھڑکن تیری، ہمراز، پھول میرے گلشن کا، پردہ نہ اٹھاؤ، فرنگی، انسانیت، مسٹر بدھو، ہل اسٹیشن، مہمان، اک نگینہ، سنگ دل اور چھوٹے صاحب نامی فلموں کے لیے گیت گائے جو بہت مقبول ہوئے۔ مالا نے اپنے وقت کے نام ور گلوکاروں کے ساتھ دو گانے بھی ریکارڈ کروائے۔

1990 میں آج ہی کے دن پاکستانی فلم انڈسٹری کی اس سریلی گلوکارہ نے لاہور میں اپنی زندگی کا سفر تمام کیا۔ تاہم مالا بیگم کی قبر کے کتبے پر یوم وفات 5 مارچ درج ہے۔

برصغیر میں کلاسیکی فنِ موسیقی میں کئی گھرانوں کی شخصیات ممتاز ہوئیں اور ان کے علاوہ کئی پیشہ وَر رقاصہ اور گلوکار بھی اپنے فن و کمال کے سبب مشہور ہوئیں۔ یہ طوائف، مغنّیہ اور بائی کے لقب سے پہچانی جاتی تھیں۔ زہرہ بائی انبالے والی انہی میں سے ایک تھیں جنھوں نے ریڈیو اور فلم کے ساتھ نجی محافل میں اپنی آواز کا جادو جگایا اور خوب داد پائی۔

بیسویں صدی کے آتے آتے ہندوستان میں نہ تو بادشاہت رہی تھی اور نہ ہی وہ راجہ، سلطان اور نواب جو ان بائیوں کا گانا سن کر اپنا دل بہلاتے اور ان پر اپنی دولت لٹاتے۔ اسی طرح پکّے راگ راگنیوں اور کلاسیکی موسیقی کا ذوق رکھنے والے بھی نہیں رہے تھے۔ مگر انیسویں صدی کے آخری برسوں تک یہ سلسلہ کسی نہ کسی صورت ضرور قائم رہا۔ زہرہ بائی کا سنہ پیدائش 1918ء ہے، اور وطن انبالہ۔ اس دور میں طوائفوں کے نام کی مماثلت بھی لوگوں کو الجھن میں ڈال دیتی تھی۔ اگرچہ زہرہ بائی کی ہم نام معروف طوائف دنیا میں نہیں رہی تھیں، لیکن ہندوستان بھر میں موسیقی اور گلوکاری میں ان کا بہت چرچا تھا۔ وہ آگرہ والی تھیں اور اسی لیے زہرہ بائی کے ساتھ لاحقہ آگرہ والی لگا رکھا تھا ان کے بعد آنے والی یہ زہرہ بائی انبالہ والی کہلائیں۔ وہ 1930 سے اگلی ایک دہائی تک مصروف گلوکارہ رہیں‌ اور انھیں چالیس کی دہائی کے وسط کی سب سے مقبول پلے بیک سنگر کہا جاتا ہے۔

زہرہ بائی انبالہ والی نے اپنے شوق سے موسیقی اور گلوکاری کو اپنایا۔ ان کا خاندان گلوکاری کو بطور پیشہ اپنائے ہوئے تھا، تاہم انھوں نے آگرہ گھرانے سے باقاعدہ موسیقی کی تربیت حاصل کی تھی۔ بچپن میں ان کی تعلیم و تربیت ان کے دادا غلام حسین خان اور اس کے بعد استاد ناصر حسین خان کے زیرِ‌ سایہ ہوئی۔ زہرہ بائی انبالہ والی 14 سال کی عمر میں ہی باقاعہد گانے لگی تھیں۔

انبالے والی زہرہ بائی نے اپنے کیریئر کا آغاز آل انڈیا ریڈیو سے بطور گلوکارہ کیا تھا۔ وہ بنیادی طور پر کلاسیکی اور نیم کلاسیکی موسیقی پیش کرتی تھیں۔ بعد میں وہ فلمی صنعت کے لیے اپنی آواز کا جادو جگانے لگیں اور 1950ء میں یہ سلسلہ ترک کر دیا۔ زہرہ بائی انبالہ والی 1990ء میں‌ آج ہی کے دن وفات پاگئی تھیں۔

زہرہ بائی انبالے والی کو زیڈ اے بخاری کی جوہر شناس نظروں نے پہچان کر ریڈیو پر متعارف کروایا تھا۔ وہ اُن دنوں آل انڈیا ریڈیو کے ڈائریکٹر جنرل تھے۔ وہاں استاد فیاض احمد خاں جیسے نامور لوگ بھی موسیقی کے شعبے سے منسلک تھے۔ ریڈیو سے وابستہ ہونے کے بعد ہی ان کی شہرت فلمی دنیا تک پہنچی۔ زہرہ بائی نے ایک گرامو فون کمپنی کے لیے بھی اپنی کھنک دار آواز میں ریکارڈنگ کروائی۔ ریڈیو پر بھی وہ بہت مصروف رہیں۔ زہرہ بائی انبالہ والی نے ٹھمری، دادرا، بھیرویں، خیال، غزل اور گیت سب گائے۔ 1944 میں بننے والی فلم ’’رتن‘‘ کے گیتوں نے زہرہ کو لازوال شہرت دی اور اس کے گیت امر ہوگئے۔ آج بھی ان فلموں کے سدا بہار گیت شائقین ذوق و شوق سے سنتے ہیں۔ ’’رتن‘‘ کے بعد ’’انمول گھڑی‘‘ 1946 میں، ’’میلہ‘‘ 1948 میں ’’جادو‘‘ 1951 میں ریلیز ہوئی تھیں جب کہ 1945 میں وہ مشہورِ زمانہ فلم بنی جس کا نام ’’زینت‘‘ تھا۔ اس کی ایک ’’آہیں نہ بھریں‘ شکوے نہ کیے کچھ بھی نہ زباں سے کام لیا ‘‘ بہت مقبول ہوئی تھی جسے زہرہ بائی، نور جہاں اور کلیانی نے گایا تھا۔

مشرقی پنجاب کے شہر انبالے میں جنم لینے والی زہرہ بائی کی آواز کا جادو سر چڑھ کر بولا اور ماہرینِ فن کے مطابق ان کی صاف، نکھری ہوئی آواز میں قدرتی طور پر ایک چاشنی تھی جو سننے والوں کو متاثر کرتی تھی۔ زہرہ کا شمار ان گلوکاراؤں میں ہوتا ہے جن کی آواز کی رینج بہت زیادہ تھی۔ لیکن انھوں نے ہمیشہ مدھم اور نچلے سُروں میں گایا۔ ان ایک گیت جو بہت مقبول ہوا، یہ تھا۔

پسِ دیوارکھڑے ہیں، تیرا کیا لیتے ہیں
دیکھ لیتے ہیں، تپش دل کی بجھا لیتے ہیں

’’کھڑی نیم کے نیچے…‘‘ وہ گیت تھا جسے تھر کی کوئل مائی بھاگی کی آواز میں ہر اس شخص نے بھی سنا جو معنی و مفہوم سے ناآشنا اور اس زبان سے ناواقف تھا۔ مائی بھاگی کی آواز کا لوچ، ترنم اور گیت کے بولوں کے مطابق مسرت کی چہکار یا درد انگیزی ایسی ہوتی کہ سننے والے اس کے سحر میں کھو جاتے تھے۔ آج مائی بھاگی کی برسی منائی جارہی ہے۔

مائی بھاگی نے صحرائے تھر کے شہر ڈیپلو میں 1920 کے لگ بھگ آنکھ کھولی تھی۔ والدین نے بھاگ بھری نام رکھا۔ ان کے والد مقامی رسم و رواج کے مطابق شادی بیاہ، میلوں اور غم کی تقریبات میں‌ سہرے اور نوحے گاتے اور اس سے روزی روٹی کا بندوبست کرتے تھے۔ وہ اپنی بیٹی کو آٹھ دس سال کی عمر ہی سے اپنے ساتھ میلوں اور شادی بیاہ کی تقریبات میں لے جانے لگے جہاں مائی بھاگی ان کے ساتھ ڈھول بجا لیتی تھیں اور پھر فنِ گلوکاری کی طرف مائل ہوئیں جس کی تربیت اور تعلیم بھی والدین سے حاصل کی۔

وہ بڑی ہوئیں تو والد کی اجازت سے گاؤں اور قریبی علاقوں میں‌ تقریبات پر لوک گیت اور سہرے گانے کے لیے جانے لگیں۔ تھر کی مائی بھاگی ناخواندہ اور شہری زندگی کے طور طریقوں سے ناآشنا تھیں، لیکن خداداد صلاحیتوں کی مالک مائی بھاگی نے نہ صرف ملک گیر شہرت حاصل کی بلکہ برصغیر میں‌ جہاں‌ جہاں‌ لوک موسیقی سے محبت کرنے اور اسے سمجھنے والے موجود ہیں، مائی بھاگی کو سنا اور سراہا گیا۔ وہ اپنی سادہ دلی اور انکساری کی وجہ سے بھی لوگوں‌ کے دلوں میں‌ جگہ پاتی تھیں‌ اور انھیں بہت عزّت اور احترام کی نظر سے دیکھا جاتا تھا۔ سولہ برس کی عمر میں ان کی شادی ہوتھی فقیر سے ہوگئی تھی جو تھرپارکر کے ضلع اسلام کوٹ کے مشہور لوک فن کار تھے۔

مائی بھاگی نے جلد ہی اپنے گیتوں کی موسیقی اور دھنیں بھی خود مرتب کرنا شروع کردی تھیں۔ انھوں نے ڈھاٹکی، مارواڑی اور سندھی زبانوں کے گیتوں کو اپنی آواز دی۔ مائی بھاگی نے تھر کے ایک اور مشہور گلوکار استاد مراد فقیر کے ساتھ بھی سرائیکی، مارواڑی، سندھی زبانوں‌ کے لوک گیت گائے۔

ان کی قسمت کا ستارہ 1963 میں اس وقت چمکا جب انھوں نے اپنے والد کے ساتھ ماروی کے میلے میں کئی قابلِ ذکر اور بڑی شخصیات کے درمیان اپنی آواز کا جادو جگایا اور تھر کی اس آواز نے حاضرین کو مسحور کر دیا۔ وہاں ریڈیو پاکستان حیدرآباد سینٹر کی ٹیم بھی موجود تھی جس نے مائی بھاگی کی آواز کو ریکارڈ کرلیا اور بعد میں جب ریڈیو پر سامعین نے انھیں سنا تو مائی بھاگی کی شہرت ہر طرف پھیل گئی۔ تب 1966 میں ریڈیو پاکستان کے لیے مائی بھاگی کی آواز میں چند لوک گیت ریکارڈ کروائے گئے اور وہ ملک گیر شہرت یافتہ گلوکاروں کی صف میں‌ آ کھڑی ہوئیں۔

مائی بھاگی نے جب شاہ کار لوک گیت ’’کھڑی نیم کے نیچے…..‘‘ گایا تو ہر طرف ان کی دھوم مچ گئی۔ بعد میں ریڈیو پر ان کے متعدد گیت نشر ہوئے اور جلد ہی صحرا کی یہ گلوکارہ کراچی میں پی ٹی وی پر نظر آئی۔ پہلی مرتبہ لوگوں نے مائی بھاگی کو اسکرین پر دیکھا۔ ریڈیو اور ٹی وی کے لیے درجنوں گیت گانے والی مائی بھاگی کو سندھ میں ہونے والی مختلف موسیقی کی محفلوں اور شادی بیاہ کی تقریبات میں بھی مدعو کیا جاتا تھا اور وہ عام لوگوں‌ میں بھی خاصی مقبول تھیں-

9 جولائی 1986 کو مائی بھاگی فریضۂ حج کی ادائیگی کے لیے حجاز کو روانہ ہونے والی تھیں، مگر 7 جولائی کو ان کی سانسوں کی مالا ہی ٹوٹ گئی اور انھیں دوسروں کے کاندھے پر اپنی آخری آرام گاہ کا سفر طے کرنا پڑا۔

حکومتِ پاکستان نے مائی بھاگی کو تمغۂ حسنِ کارکردگی سے نوازا تھا۔