Tag: گلگت بلتستان

گلگت بلتستان: ضلع غذرمیں گلیشیئر پھٹنے سے سیلاب نے پھر تباہی مچادی، متعدد دیہات زیرآب آنے سے درجنوں افراد پھنس گئے تاہم پچاس سے زائد افراد کو ریسکیو کرلیا گیا ہے۔

تفصیلات کے مطابق گلگت بلتستان کے ضلع غذر کے علاقے تلی داس میں رات گئے گلیشیئر پھٹنے سے شدید سیلابی صورتحال پیدا ہوگئی، جس کے باعث متعدد دیہات زیرآب آگئے اور درجنوں افراد پھنس گئے۔

ترجمان گلگت بلتستان حکومت فیض اللہ فراق نے بتایا کہ اب تک 50 سے زائد افراد کو بحفاظت ریسکیو کر لیا گیا ہے، تاہم متاثرین کو شدید مالی نقصان اٹھانا پڑا ہے۔

فیض اللہ فراق کا کہنا تھا کہ گلیشیئر پھٹنے سے دریائے غذر کا بہاؤ رک گیا ہے اور پانی جھیل کی شکل اختیار کر چکا ہے، جس کے باعث متصل دیہات مزید زیرآب آنے کا خطرہ بڑھ گیا ہے، تاہم پولیس اور مقامی رضاکاروں کی طرف سے بروقت اطلاع پر قیمتی انسانی جانیں بچ گئیں۔

وزیراعلیٰ گلگت بلتستان حاجی گلبر خان نے تمام صورتحال کا نوٹس لیتے ہوئے ریسکیو کارروائیوں کی براہِ راست نگرانی شروع کر دی ہے اور متعلقہ اداروں کو متاثرہ دیہات میں فوری اقدامات کی ہدایت دی اور کہا ضرورت پڑنے پر پاک فوج سے بھی مدد طلب کی جائے گی۔

سیکریٹری داخلہ اورڈی جی جی بی ڈی ایم اے کو دریائےغذر کے قریب موجود آبادیوں میں حفاظتی اقدامات یقینی بنانے کی ہدایات کی گئی ہے۔

ریسکیو 1122 اور گلگت بلتستان ڈیزاسٹر مینجمنٹ اتھارٹی (GBDMA) کے اہلکار جائے وقوعہ پر موجود ہیں اور امدادی سرگرمیاں جاری ہیں۔

پولیس ذرائع کے مطابق رکا ہواپانی آہستہ آہستہ سیلابی بند سے گزرنے لگا ہے جو خوش آئند ہے ،اگر پانی ایک دم سیلابی بند کو توڑ دے تو دریا کے راستے میں موجود نشیبی آبادیاں زیر آب آسکتی ہیں۔

گلگت بلتستان : گلگت بلتستان میں تیز بارش، سیلاب اور لینڈسلائیڈنگ سمیت مختلف حادثات میں دس افراد جان سے گئے۔

تفصیلات کے مطابق گلگت بلتستان میں بھی سیلاب نے تباہی پھیلا دی۔ تیزبارش، سیلاب اور لینڈسلائیڈنگ سمیت مختلف حادثات میں دس افراد جان سے گئے جبکہ غذر میں ریلے میں بہنے والے چار افراد کی لاشیں نکال لی گئیں۔

اسکردو میں بھی ریلے کی زد میں آکر درجنوں مکان اور باغات تباہ ہوگئے۔ کمنگو میں بھی درجنوں مکان منہدم ہوگئے۔

شگر میں رابطہ پل، زرعی اراضی سیلاب سے متاثر ہے جبکہ گانچھےمیں ریلے سے بڑے پیمانے پرتباہی ہوئی، لینڈ سلائیڈنگ سےدیوسائی، جگلوٹ اسکردو روڈ بند ہوگئی جبکہ فصلوں، مکان، اسکول اور زرعی اراضی کو شدید نقصان پہنچا۔

حکومت گلگت بلتستان نےمختلف مقامات پر ایمرجنسی نافذ کردی تاہم سیلاب سے فائبرکٹ جانےکےباعث رات سے موبائل سروسزبند ہے۔

چلاس میں بٹوگاہ، تھورنالہ، بونرنالہ، بابوسر پرسیلابی صورتحال ہے، پولیس کا کہنا ہے ضلع میں دو افراد لاپتا ہیں جبکہ دو زخمی ہوئے۔

سونیوال کوٹ میں رہائشی مکانات میں دریائے سندھ کا پانی داخل ہوگیا اور بہاؤ میں اضافےسے مزید مکانات کےلپیٹ میں آنے کا خدشہ ہے

اسلام آباد (12 اگست 2025): وزیراعظم شہباز شریف نے گلگت بلتستان میں ماحول دوست بجلی منصوبہ ایک سال میں مکمل کرنے کی ہدایت کی ہے۔

اے آر وائی نیوز کے مطابق وزیرِ اعظم محمد شہباز شریف کی زیرِ صدارت گلگت بلتستان میں 100 میگا واٹ سولر منصوبے پر جائزہ اجلاس اسلام آباد میں ہوا۔ وزیرِ اعظم نے یہ ماحول دوست بجلی منصوبہ ایک سال میں مکمل کرنے کی ہدایت کی اور کہا کہ وہ اس منصوبے کی خود نگرانی کریں گے۔

اجلاس میں اجلاس میں وفاقی وزرا احسن اقبال، احد خان چیمہ، سردار اویس خان لغاری، وزیر اعظم کے کوارڈینیٹر مشرف زیدی، قابل تجدید توانائی شعبے کے ماہر ڈاکٹر جروین ڈریسمَن (Dr. Gerwin Dreesmann) اور متعلقہ اعلی حکام نے شرکت کی اور وزیراعظم کو منصوبے پر پیش رفت اور لائحہ عمل سے آگاہ کیا گیا۔

اجلاس کو بتایا گیا کہ منصوبے کے تحت گلگت میں 6، اسکردو میں 8 اور دیامر میں 6 سولر پارکس بنائے جائیں گے۔ اسی طرح گلگت میں 234، اسکردو میں 179 اور دیامر میں 68 عمارتوں پر سولر کی تنصیب یقینی بنائی جائے گی۔

اجلاس میں بتایا گیا کہ اس منصوبے کو بین الاقوامی معیار کا بنانے کے لیے اس میں بیٹریوں کی تنصیب سے بیک اپ کو یقینی بنانے کے ساتھ ساتھ اسکی ریئل ٹائم مانیٹرنگ کا بھی نظام بنایا جا رہا ہے۔

وزیراعظم نے اپنے حالیہ دورہ گلگت بلتستان میں 100 میگا واٹ کے سولر پلانٹ کا اعلان کیا تھا۔ اجلاس میں بتایا گیا کہ ایکنک سے منظوری کے بعد منصوبے کی تعمیر پر کام کی رفتار کو مزید تیز کر دیا گیا ہے۔

شہباز شریف نے منصوبے کی تعمیر کیلیے قائم اسٹیئرنگ کمیٹی کی صدارت وزیرِ بجلی سردار اویس خان لغاری کو سونپ دی۔

اجلاس سے خطاب کرتے ہوئے وزیراعظم نے کہا کہ گلگت سے اندھیروں کو دور کرنے کیلیے یہ منصوبہ انتہائی اہمیت کا حامل ہے۔ منصوبے پر خرچ ہونے والی تمام لاگت وفاقی حکومت دے گی۔ منصوبے کا سارا انفراسٹرکچر کلائیمیٹ ریزیلئینٹ بنایا جائے۔

شہباز شریف کا کہنا تھا کہ یہ منصوبہ گلگت بلتستان کے لوگوں کو کم لاگت اور ماحول دوست بجلی فراہم کرے گا اور انہیں 18 سے 20 گھنٹے بجلی کی لوڈشیڈنگ سے بھی نجات ملے گی۔

گلگت: گلگت بلتستان کے شیشپر گلیشیئر سے آنے والے سیلابی ریلے نے تباہی مچا دی، مٹی کا تودہ گرنے سے دو افراد جاں بحق ہوگئے۔

تفصیلات کے مطابق گلگت بلتستان کے شیشپر گلیشیئر سے آنے والے سیلابی ریلے نے حسن آباد میں تباہی مچا دی۔

گلیشیئر کے مسلسل پگھلنے سے دریائے ہنزہ میں پانی کی سطح بلند ہو گئی، جس کے نتیجے میں دریائی کٹاؤ سے متعدد مکانات تباہ اور کئی ایکڑ زرعی زمین زیر آب آ گئی۔

گلگت میں فیری میڈوز ٹریک کی بحالی کے دوران مٹی کا تودہ گرنے سے دو افراد جاں بحق اور دو زخمی ہو گئے تاہم زخمیوں کو قریبی اسپتال منتقل کر دیا گیا۔

ترجمان گلگت بلتستان حکومت فیض اللہ فراق کے مطابق حالیہ سیلاب کے دوران مختلف حادثات میں مجموعی طور پر پندرہ افراد جاں بحق ہوئے۔ دریائی کٹاؤ اور لینڈ سلائیڈنگ کے باعث بند ہونے والی شاہراہ قراقرم کی بحالی کا کام تیزی سے جاری ہے۔

موسم کی صورتحال کے حوالے سے محکمہ موسمیات نے پیش گوئی کی ہے کہ ملک کے بیشتر میدانی علاقوں میں گرمی اور حبس برقرار رہے گا جبکہ پنجاب، خیبر پختونخوا، اسلام آباد، آزاد کشمیر اور گلگت بلتستان میں گرج چمک کے ساتھ بارش کا امکان ہے۔