گلگت: گلگت بلتستان کی کابینہ تشکیل دے دی گئی، کابینہ 12 وزیروں اور 2 مشیروں پر مشتمل ہے۔
تفصیلات کے مطابق گلگت بلتستان کی بارہ وزیروں اور دو مشیروں پر مشتمل کابینہ تشکیل دے دی گئی، نوٹیفکیشن کے مطابق نئی کابینہ میں شمس لون وزیر داخلہ، انجینئر انور وزیر زراعت نامزد کیے گئے ہیں۔
فتح اللہ پی این ڈی کے وزیر، دلشاد بانو کو ویمن ڈویلپمنٹ کی وزارت تفویض کی گئی، حاجی حمید وزیر بلدیات، امجد زیدی وزیر تعمیرات مقرر کیے گئے، جب کہ غلام محمد وزیر سیاحت و خوراک، اور مشتاق احمد کو وزیر برقیات مقرر کیا گیا۔
سہیل عباس وزیر قانون و صحت، حاجی رحمت خالق وزیر ایکسائز، غلام شہزاد آغا وزیر تعلیم، انجینئر اسماعیل وزیر خزانہ، حاجی شاہ بیگ مشیر جنگلات، اور ثریا زمان مشیر آئی ٹی مقرر کی گئی ہیں۔
گلگت بلتستان کے وزرا اور مشیروں پر مشتمل کابینہ کی حلف برداری آج ہوگی، حلف برداری کی تقریب دن 12 بجے گورنر سیکریٹریٹ میں منعقد ہوگی، کابینہ میں پیپلز پارٹی، مسلم لیگ ن اور جے یو آئی کے اراکین شامل ہیں۔
