سردیوں کے حوالے سے پاکستان کا اہم سیاحتی مقام مری ملکہ کوہسار بھی ماحولیاتی تبدیلی کی زد پر ہے، جہاں ماضی کی طرح برفباری اس قدر نہ ہونے اور خشک سالی کی وجہ سے ملک بھر سے آئے سیاح کسی حد تک مایوس نظر آ رہے ہیں، تاہم صوبائی ڈیزاسٹر منجمنٹ اتھارٹی کا کہنا ہے کہ مری میں بارش اور برف باری کا سلسلہ بدستور جاری ہے۔
ایک اور اہم ترین سیاحتی مقام گلیات میں برفباری نے رنگ جما دیا ہے، نتھیا گلی، ٹھنڈیانی، چھانگلہ گلی، اور ایوبیہ برف سے ڈھک گئے ہیں، ہاں لیکن یاد رہے کہ برف باری سے مری روڈ سمیت رابطہ سڑکوں پر پھسلن ہو گئی ہے، اس لیے سیاحوں کو انتظامیہ کی جانب سے محتاط رہنے کی ہدایت کی گئی ہے۔
شمالی بلوچستان یخ بستہ ہواؤں کی لپیٹ میں ہے، کوئٹہ، زیارت، چمن اور ژوب میں سردی کی شدت میں اضافہ ہو گیا ہے، قلات میں درجہ حرارت منفی ا8 تک گر گیا ہے، جب کہ کوئٹہ کی ٹھنڈی ہواؤں نے پھر کراچی کا رخ کر لیا ہے۔
پراونشل ڈیزاسٹر منجمنٹ اتھارٹی کے مطابق مری اور گرد و نواح میں آئندہ 24 گھنٹے مزید بارش و برف باری کے امکانات ہیں، گزشتہ رات سے اب تک مری میں 2.5 انچ برف باری ریکارڈ کی گئی ہے، مری میں سڑکوں پر پھسلن سے بچاؤ کے لیے نمک کا چھڑکاؤ کیا جا رہا ہے۔
ڈی جی پی ڈی ایم اے نے مری انتظامیہ کو الرٹ رہنے کی ہدایت کی ہے، اور کہا ہے کہ کسی قسم کی غفلت کا مظاہرہ نہ کیا جائے، شاہراہوں پر ٹریفک کی روانی کو یقینی بنایا جائے، ان کا کہنا تھا کہ مری میں سیاحوں کی رہنمائی کے لیے 13 فیسیلی ٹیشن سینٹر قائم ہیں۔
کراچی میں آئندہ 24 گھنٹوں میں موسم کیسا رہے گا؟
ادھر کراچی میں ہوائیں چلنے سے موسم پھر ٹھنڈا ہو گیا ہے، اور کم سے کم درجہ حرارت 11.5 ڈگری سینٹی گریڈ ریکارڈ کیا گیا ہے، محکمہ موسمیات کے مطابق سردی کی حالیہ لہر کل تک جاری رہے گی، لاہور سمیت پنجاب کے میدانی علاقوں میں دھند نے پھر ڈیرے ڈال لیے ہیں اور موٹر وے مختلف مقامات سے بند کر دی گئی۔
