موسم سرما جیسے جیسے قریب آتا ہے تو مرد وخواتین خصوصاً بچے مختلف قسم کے امراض میں مبتلا ہونے لگتے ہیں۔
سردیوں میں ناک بہنا، زکام، کھانسی، بخار، سانس کا تیز چلنا عام علامات ہیں لیکن ان سب پر مناسب توجہ دی جائے تو اس پر باآسانی قابو پایا جاسکتا ہے۔
موسم کی تبدیلی کے ایام میں جسم میں بہت ساری تبدیلیاں جنم لیتی ہیں اسی میں گلا بھی شامل ہیں۔ لوگوں بڑی تعداد گلے کی مناسب دیکھ بھال اور اس کی صحت کا خیال نہیں رکھتی جب تک کہ اس میں خراش یا نگلنے وقت تکلیف محسوس نہ ہو۔
گلے کی اندرونی سطح نہایت نرم بافتوں سے بنی ہوئی ہیں جنہیں صحت مند رکھنے کے لیے اسے نم رکھنا بےحد ضروری ہے۔ کوشش کریں کہ کیفین سے بھرپور مشروبات سے دور رہیں جوجسم کو ہائیڈریٹ رکھنے میں رکاوٹ کا سبب بنتے ہیں۔
نظام تنفس کے اوپر کے حصہ کی بیماریاں یا تو وائرس کی وجہ سے ہوتی ہیں یا پھر بیکٹیریا کی وجہ سے۔ ان میں مریض بے چین ہوتا ہے۔ بخار کی وجہ سے جسم گرم محسوس ہوتا ہے، ٹانسل اور نظام تنفس کے اوپر والے حصے کے دوسرے حصے سوجے اور پھولے نظر آتے ہیں۔ جس کی وجہ سے سانس لینے میں دشواری ہوتی ہے۔
پیاس لگنے کی صورت میں سافٹ ڈرنک کے بجائے پانی پینے کو اپنی عادت بنائیں۔ ماہرین صحت کا مشورہ ہے کہ روزانہ 6 سے 8 گلاس پانی لازمی پیجیے اور اگر آپ ایسی جگہ کام کر رہے ہیں جہاں کا موسم خشک ہے یا ایئر کنڈیشنڈ چل رہا ہو تو پانی کا استعمال بڑھا دیں۔
اس کے علاوہ بنیادی حفظان صحت کے طریقے جیسے کہ کھانے سے پہلے ہاتھ دھونا اور کھانے کے برتن اور دیگر ذاتی اشیاء کا اشتراک نہ کرنا، گلے کی خراش کو روکنے میں کافی حد تک معاون ثابت ہوسکتا ہے اس طرح وائرل یا بیکٹیریل گلے کے مسائل دوسروں تک نہیں پھیلیں گے۔
