مقبول ترین امریکی گلوکارہ ٹیلر سوئفٹ کے 34 گانے محض ایک منٹ میں شناخت کرنے کا ریکارڈ بنا کر پاکستانی نوجوان بلال الیاس جھنڈیر نے سابقہ ریکارڈ توڑ دیا۔
تفصیلات کے مطابق ٹیلر سوئفٹ کے ایک پاکستانی پرستار نے ایک منٹ میں 34 گانوں کو درست طریقے سے پہچان کر گنیز ورلڈ ریکارڈ توڑ دیا، 20 سالہ بلال الیاس جھنڈیر کو میوزک کے بغیر صرف گانوں کے بول سن کر انھیں پہچاننا تھا۔
ریکارڈ کے لیے ٹیلر سوئفٹ کے سب سے زیادہ فروخت ہونے والے 50 گانے منتخب کیے گئے تھے، اور ایک شخص نے بغیر کسی ترتیب کے بلال کے سامنے ان گانوں کے بول دہرائے، اور بلال ایک منٹ میں 34 گانوں کی شناخت کرنے میں کامیاب ہوا، یوں اس نے 2019 میں ڈین سمپسن کے قائم کردہ 27 گانوں کا ریکارڈ توڑ دیا۔
بلال جھنڈیر نے گنیز ورلڈ ریکارڈ کو بتایا کہ وہ بچپن سے ٹیلر سوئفٹ کو سنتا آ رہا ہے، اور اس کا سخت پرستار ہے، بلال نے کہا ’’میں نے ٹیلر سوئفٹ کا ہر گانا سنا ہے، میں ان کے ہر گانے کو اس کے بول سے پہچان سکتا ہوں۔‘‘
مس جاپان بننے والی یوکرینی ماڈل کی پیدائش کو لے کر سوشل میڈیا پر ہنگامہ برپا ہو گیا
واضح رہے کہ بلال جھنڈیر نے اس سے قبل بھی کئی ریکارڈ قائم کیے ہیں، جن میں ایک منٹ میں جانوروں کی آوازوں سے سب سے زیادہ جانوروں (23) کی شناخت کا ریکارڈ بھی شامل ہے، اور بلال نے جسٹن بیبر کے 29 گانے بھی ایک منٹ میں شناخت کر کے ریکارڈ قائم کیا تھا۔
