اسلام آباد (31 جولائی 2025): شہریوں کی آسانی کیلیے حکومت نے کراچی سے گوادر کیلیے پروازوں میں اضافہ کرنے کا اعلان کر دیا۔
وفاقی وزیر بحری امور جنید انوار چوہدری کی کاوشوں سے گوادر کیلیے مزید 2 پروازیں بحال کرنے کا فیصلہ کیا گیا، پی آئی اے کی کراچی سے گوادر نئی پروازیں اگست کے پہلے ہفتے سے شروع ہوں گی۔
جنید انوار چوہدری نے اپنے بیان میں بتایا کہ تجارتی سرگرمیوں کے فروغ کیلیے فضائی رابطے میں توسیع ناگزیر ہے، صرف ایک پرواز چل رہی تھی پروازوں کا اضافہ اہم پیشرفت ہے۔
وفاقی وزیر نے کہا کہ پروازوں کی بحالی وزیر اعظم شہباز شریف کے کاروبار دوست وژن کا عملی اظہار ہے، گوادر فری زونز کی فعالی میں بہتر فضائی رسائی بنیادی حیثیت رکھتی ہے۔
انہوں نے مزید کہا کہ فضائی سہولیات سے سرمایہ کاری اور تجارت کے مواقع بڑھیں گے، تاجر برادری، پورٹ عملے اور لاجسٹکس سیکٹر کو سہولت دینا حکومت کی ترجیح ہے۔
ان کا کہنا تھا کہ سی پیک منصوبوں کی بروقت تکمیل کیلیے فضائی روابط ناگزیر ہیں، پروازوں کا اضافہ گوادر میں معاشی ترقی کا نیا باب ہے۔
(27 جولائی 2025): گوادر کے کھلے سمندر میں پیش آنے والے حادثے میں 6 ماہی گیر ڈوب گئے تھے، جن میں سے ایک کو زندہ بچا لیا گیا۔
تفصیلات کے مطابق کراچی سے تعلق رکھنے والے ماہی گیروں کی کشتی بلوچستان میں گوادر کے قریب ڈوب گئی تھی، جس میں 5 ماہی گیر جاں بحق جبکہ ایک کو زندہ بچا لیا گیا ہے۔
گوادر کے سمندر میں ڈوبنے والے چھ ماہی گیروں میں سے ایک ماہی گیر کی لاش کل ملی تھی جبکہ آج مزید چار لاشیں نکالی گئیں، دو لاشیں کراچی پہنچا دی گئیں جبکہ تین لاشیں ایدھی کے پاس گوادر میں موجود ہیں۔
ابراہیم حیدری علی اکبر شاہ گوٹھ کے ایک ماہی گیر کی لاش ورثا کے حوالے کر دی گئی ہے، ان کی نماز جنازہ بعد نماز ظہر ادا کردی گئی۔
پیپلز پارٹی کے جنرل کونسلر شمس عالم فاروقی متاثرہ خاندانوں کی مدد میں مصروف ہیں اور حکومت سندھ سے امداد کی اپیل کی ہے۔
اسلام آباد : پاکستان نے گوادر سے خلیجی ممالک تک فیری سروس شروع کرنے کا اعلان کردیا، سروس سے سمندری سفر آسان اور سستا ہوگا۔
تفصیلات کے مطابق وفاقی وزیر بحری امور جنید انوارچوہدری کی زیر صدارت گوادر پورٹ پر اجلاس ہوا، جس میں انھوں نے کہا کہ گوادر بندرگاہ مکمل طور پر فعال ہوچکی ہے، گوادر سے خلیجی ممالک کیلئے نئی فیری سروس کا آغاز ہوگا۔
جنید انوار چوہدری کا کہنا تھا کہ فیری سروس سے سمندری سفر آسان اور سستا ہوگااور ساتھ ہی خلیجی ممالک کے ساتھ عوامی رابطے مضبوط ہوں گے۔
وفاقی وزیر بحری امور نے کہا کہ گوادر پورٹ سے نئی شپنگ لائنز جلد فعال ہوں گی، جس سے وسط ایشیا اور مشرق وسطیٰ کیساتھ تجارتی روابط مضبوط ہوں گے۔
ان کا مزید کہنا تھا کہ گوادر سے مال برداری میں نمایاں اضافہ متوقع ہے، فیری سروس سے بلوچستان میں روزگار ،سرمایہ کاری بڑھے گی اور نئی شپنگ لائنز سے بندرگاہوں پر دباؤ کم ہوگا۔
جنید انوار نے مزید کہا کہ میری ٹائم شعبے میں ترقی قومی معیشت کوتقویت دےگی، نجی سرمایہ کاری کی حوصلہ افزائی کیلئےاقدامات جاری ہیں، گوادر کو تجارتی مرکز بنانے کیلئےہر ممکن اقدام کیا جائے گا۔
گوادر: بلوچستان حکومت کے ترجمان نے کہا ہے کہ گوادر میں ایک گھر پر دستی بم حملے میں تین افراد زخمی ہوگئے۔
تفصیلات کے مطابق بلوچستان حکومت کے ترجمان شاہد رند نے بتایا کہ دہشت گردوں نے گوادر میں بلال مسجد کے قریب ایک گھر پر دستی بم پھینکا جس کے نتیجے میں پنجاب سے تعلق رکھنے والے تین افراد زخمی ہوگئے۔
حکومتی ترجمان نے کہا کہ پولیس نے فرار ہونے والے حملہ آوروں کو پکڑ لیا اور ان میں سے ایک مقابلے میں ہلاک ہوگیا، جب کہ دوسرا زخمی ہوا ہے۔
حکومتی ترجمان نے کہا کہ پولیس اہلکار محمد خماری فرض کی ادائیگی کے دوران شہید ہوئے، ہلاک حملہ آور کی شناخت شاہجہان، زخمی کی شہزاد کے نام سے ہوئی ہے۔
گوادر: کوسٹل ہائی وے پر مسلح افراد نے فائرنگ کرکے 6 مسافروں کو قتل کردیا ، جاں بحق افراد گوادر سے کراچی جا رہے تھے۔
تفصیلات کے مطابق گوادر میں افسوسناک واقعہ پیش آیا ، کوسٹل ہائی وے پر مسلح افراد نے فائرنگ کردی ، جس کے نتیجے میں 6 مسافر جاں بحق ہوگئے۔
سیکورٹی ذرائع نے بتایا گزشتہ شب گوادر کوسٹل ہائی وے پر دہشتگردوں کی جانب سے گاڑیاں روک کر مسافروں کی شناخت پریڈ کی گئی اور ناکہ بندی کے دوران فائرنگ کرکے 6 مسافروں کو قتل کیا گیا اور تین مسافروں کو یرغمال بنا کر ساتھ لے گئے۔
سیکورٹی ذرائع کا کہنا تھا کہ ناکہ بندی کوسٹل ہائی وے کلمت کے مقام پر گئی حملہ آوروں نے دو باوزرز گاڑیوں کو بھی نذر آتش کردیا، سیکورٹی فورسز کا علاقے سرچ آپریشن جاری ہے۔
ڈپٹی کمشنر گوادر نے بتایا کہ واقعہ کلمت کےمقام پر پیش آیا اور حملہ آوروں نے گوادر سے کراچی جانے والے مسافروں پر فائرنگ کی تاہم فورسزکی نفری حادثے کی جگہ روانہ کردی گئی ہے۔
پولیس کا کہنا ہے کہ جاں بحق افراد گوادر سے کراچی جا رہے تھے جس میں سے ایک شخص کا تعلق ملتان سے ہے جبکہ دیگر کی شناخت کا عمل جاری ہے۔
وزیراعظم شہباز شریف نے کلمت میں مسافروں پرفائرنگ کے واقعے کی شدید الفاظ میں مذمت کرتے ہوئے 5 افراد کے جاں بحق ہونے پر گہرے دکھ اور رنج کا اظہار کیا۔
وزیراعظم نے واقعے کی تحقیقات کر کے ذمہ داران کا تعین اور قرارواقعی سزایقینی بنانےکی ہدایت کرتے ہوئے کہا کہ شرپسندعناصر بلوچستان کے امن و ترقی کے دشمن ہیں۔
شہباز شریف کا کہنا تھا کہ شرپسندعناصرکی معصوم لوگوں کےخلاف بزدلانہ کارروائیاں انکی حیوانیت کی واضح عکاسی کرتی ہیں، شرپسند عناصر کے ملک دشمن عزائم کو کبھی کامیاب نہیں ہونے دیں گے۔
وزیراعظم نے قانون نافذ کرنے والے اداروں کے اہلکاروں کی دشمن عناصر کیخلاف کارروائیوں کی پذیرائی کی اور کہا سیکیورٹی فورسز کے افسران وجوان شب وروزملک دشمن عناصرکےعزائم کو خاک میں ملا رہےہیں، مجھ سمیت پوری قوم کواپنی سیکیورٹی فورسز اورقانون نافذ کرنے والے اداروں پر فخر ہے۔
دوسری جانب وزیر داخلہ محسن نقوی نے کلمت میں مسافروں پر فائرنگ کے واقعہ کی مذمت کی اورجاں بحق افراد کے لواحقین سے دلی ہمدردی تعزیت کا اظہار کیا۔
انہوں نے کہا دہشت گردوں نے بزدلانہ کارروائی کرکے معصوم لوگوں کونشانہ بنایا، بے گناہ افراد کو ناحق قتل کرنا انسانیت سوز جرم ہے، شناخت کرکے مسافروں کو نشانہ بنانا بربریت اور درندگی ہے۔
وفاقی وزیر کا مزید کہنا تھا کہ جاں بحق افراد کے لواحقین کے غم میں برابر کے شریک ہیں،بزدلانہ کارروائیاں دہشتگردی کیخلاف پختہ عزم کو کمزور نہیں کر سکتیں۔
اسلام آباد : وزارت خوراک کے حکام کا کہنا ہے کہ گوادر میں گدھوں کا سلاٹر ہاؤس قائم کردیا گیا، چینی کمپنی کام کرے گی۔
تفصیلات کے مطابق قومی اسمبلی کی قائمہ کمیٹی برائے خوراک و تحفظ کے اجلاس میں حکام نے بتایا کہ گوادر میں گدھوں کا سلاٹر ہاؤس قائم کردیا گیا ہے اور پیداوار بھی شروع کر دی ، گودار میں چینی کمپنی یہ کام کرے گی۔
رکن کمیٹی رانا محمد حیات نے کہا کہ پاکستان میں گدھوں کا استعمال کم ہو رہا ہے، لوڈر رکشوں نے جگہ لے لی ہے، اچھی نسل کے گدھوں کی بریڈنگ ہونی چاہیے۔
چیئرمین قائمہ کمیٹی نے پوچھا کہ زندہ گدھوں کو چین ایکسپورٹ کیوں نہیں کرتے، جس پر حکام وزارت خوراک و تحفظ نے بتایا کہ زندہ گدھوں کی ایکسپورٹ مشکل کام ہے، ملک کے دوسرے حصوں میں بھی گدھوں کے سلاٹر ہاؤس کیلئے درخواستیں آرہی ہیں اور مزید چینی کمپنیوں کے ساتھ بات چیت جاری ہے۔
وزارت خوراک کے حکام نے قومی اسمبلی کی قائمہ کمیٹی برائے فوڈ سیکیورٹی کو بتایا کہ چین کے ساتھ گدھے کی کھالوں اور ہڈیوں کی برآمد کا معاہدہ کیا گیا ہے۔
یاد رہے گذشتہ سال اقتصادی سروے میں بتایا گیا تھا کہ ملک میں ایک سال کے دوران ایک لاکھ گدھے بڑھ گئے، گدھوں کی تعداد 58 سے بڑھ کر 59 لاکھ تک پہنچ گئی تھی جبکہ گزشتہ مالی سال ملک میں گدھوں کی تعداد 58 لاکھ تھی۔
اکنامک سروے کے مطابق سال 2021-22 میں گدھوں کی تعداد 57 لاکھ تھی جبکہ دو سال میں گدھوں کی تعداد میں دو لاکھ کا اضافہ ہوا تھا۔
بلوچستان کا ساحلی شہر پورٹ سٹی گوادر پاکستان سپر لیگ کے 10 ویں ایڈیشن کے پلیئر ڈرافٹ کی میزبانی کرے گا۔
پاکستان کرکٹ بورڈ کے مطابق پاکستان سپر لیگ کے 10 ویں ایڈیشن کا آغاز کرنے والی پلیئر ڈرافٹ کی یہ تقریب 11 جنوری 2025ء بروز ہفتہ منعقد کی جائے گی۔
ایچ بی ایل پی ایس ایل کے چیف ایگزیکٹیو آفیسر سلمان نصیر کا کہنا تھا کہ یہ اقدام پی ایس ایل کو پاکستان کے کونے کونے تک پھیلانے کی عکاسی کرتا ہے جبکہ گوادر میں تقریب ہونا پاکستان کی خوبصورتی کو دنیا کے سامنے دکھانے کے عزم کی عکاسی ہے۔
چیئرمین پی سی بی محسن نقوی نے اس موقع پر کہا کہ گوادر اپنی شاندار ساحلی پٹی اور اسٹریٹجک اہمیت کے ساتھ پاکستان کے معاشی مستقبل کے دل کی حیثیت رکھتا ہے۔
انہوں نے کہا کہ میں 11 جنوری کو خوبصورت شہر گوادر میں تمام فرنچائزز اور متعلقہ اسٹیک ہولڈرز کا خیر مقدم کرنے کا منتظر ہوں۔
چیئرمین پی سی بی نے کہا کہ یہاں ایچ بی ایل پی ایس ایل پلیئر ڈرافٹ کی میزبانی کر کے ہمارا مقصد اس کی ثقافتی اور اقتصادی اہمیت کو اجاگر کرنا ہے، ساتھ میں ہماری قوم کو متحد رکھنے والے کرکٹ کے کھیل کا جشن بھی منانا ہے۔
محسن نقوی نے کہا کہ یہ اقدام پاکستان سپر لیگ کی رسائی کو پاکستان کے کونے کونے تک پھیلانے اور پاکستان کی خوبصورتی کو دنیا کے سامنے دکھانے کے ہمارے عزم کی عکاسی کرتا ہے۔
گوادر : شرپسندوں کے حملے میں شہید سپاہی شبیر بلوچ کی نماز جنازہ ادا کردی گئی اور جسدِ خاکی آبائی علاقے روانہ کردیا گیا۔
تفصیلات کے مطابق پاک فوج کے شعبہ تعلقات عامہ (آئی ایس پی آر) کے جانب سے جاری بیان میں کہا گیا کہ نام نہاد بلوچ راجی مچی کی آڑ میں پر تشدد ہجوم کے حملے میں شہید سپاہی شبیربلوچ کی نمازجنازہ گوادر میں اداکردی گئی۔
ضلع نصیرآباد بلوچستان کے تیس سالہ سپاہی کی نماز جنازہ میں وزیر داخلہ بلوچستان میر ضیاء اللہ لانگو، پاک فوج کے افسران، جوان، سول اور سماجی شخصیات نے شرکت کی۔
نماز جنازہ کے بعد شہید کے جسدِ خاکی کو آبائی علاقے روانہ کردیا گیا، جہاں انہیں مکمل فوجی اعزاز کے ساتھ سپرد خاک کیا جائے گا۔
انتیس جولائی کونام نہاد بلوچ راجی مچی کی آڑ میں ایک پر تشدد ہجوم نے سیکیورٹی فورسز کے اہلکاروں پر حملہ کیا تھا، شرپسندوں کے حملے میں ضلع نصیرآباد بلوچستان کے تیس سالہ سپاہی نے جامِ شہادت نوش کیا تھا۔
گوادر، سی پیک کے دوسرے مرحلے میں داخل ہونے کے ساتھ ہی ایک مصروف بین الاقوامی تجارتی مرکز بننے کے لیے تیار ہے۔
تفصیلات کے مطابق گوادر، سی پیک کے دوسرے مرحلے میں داخل ہونے کے ساتھ ہی ایک مصروف بین الاقوامی تجارتی مرکز بننے کے لیے تیار ہے، اربوں روپے مالیت کے نیو گوادر انٹرنیشنل ایئرپورٹ، گوادر واٹر ڈیسیلینیشن پلانٹ، گوادر پورٹ، ایسٹ بے ایکسپریس وے مکمل کرلئے گئے۔
مکمل ہو جانے والے سی پیک کے میگا پروجیکٹس میں 230 ملین ڈالر مالیت کا نیو گوادر انٹرنیشنل ایئرپورٹ، 179 ملین ڈالر مالیت کا ایسٹ بے ایکسپریس وے، 300 ملین ڈالر مالیت کا گوادر پورٹ اور 100 ملین ڈالر مالیت کا چین-پاکستان فرینڈشپ اسپتال شامل ہیں۔
دیگر تکمیل شدہ منصوبوں میں 10 ملین ڈالر مالیت کا گوادر ووکیشنل ٹریننگ سینٹر، 12.7 ملین ڈالر مالیت کا گوادر واٹر ڈیسیلینیشن پلانٹ اور فری زونز 1 اور 2 جو کہ 2,281 ایکڑ پر پھیلے ہوئے ہیں، جبکہ گرین پامز گوادر جیسی ہاؤسنگ اسکیم، جو 1065 ایکڑ پر محیط ہے۔
کوئٹہ: گوادر میں 7 مزدوروں کے قتل میں ملوث 2 دہشت گردوں کو گرفتار کرلیا گیا، وزیر داخلہ بلوچستان ضیالانگو کا کہنا ہے کہ ملزمان نےبتایاحکم تھاپنجاب سےجوبھی آئےاس کومارناہے۔
تفصیلات کے مطابق وزیرداخلہ بلوچستان ضیالانگو نے پریس کانفرنس کرتے ہوئے کہا کہ ہمارے لوگوں کو پیسے دے کر ورغلانے کی کوشش کی گئی ، دشمن ملک کی وجہ سے ہمیں پہلے ہی ہزاروں جانوں کا نقصان ہوچکاہے، وزیراعلیٰ کا مؤقف واضح ہے دہشت گردی برداشت نہیں کی جائے گی۔
انھوں نے بتایا کہ گوادر میں ہمارے 7مزدوروں کو قتل کیاگیا،غریب مزدوروں کیلئےپروپیگنڈاکیاگیا کہ یہ انٹیلی جنس کےلوگ تھے، گوادر میں مزدوروں کو قتل کرنیوالے 2قاتلوں کو پکڑ لیا ہے، گرفتار دونوں قاتلوں سے ہتھیار بھی برآمد ہوئے ہیں،ملزمان نے بتایا کہ حکم تھا پنجاب سے جو بھی آئے اس کو مارنا ہے۔
وزیر داخلہ بلوچستان کا کہنا تھا کہ گرفتاردونوں دہشتگردوں کا تعلق کالعدم بی ایل اے سے ہے، ہم اپنے مزید لوگوں کو قتل ہوتے نہیں دیکھ سکتے، ہم اپنے عوام کو کہناچاہتے ہیں کہ یہ وقت پاکستان بنانے کا ہے ، پاکستان اور ہمارے لوگوں نے بہت مشکلات برداشت کی ہیں، یہ لوگ دہشتگردی کررہےہیں اور دشمن ملک کےاشارے پر چلانا چاہتے ہیں۔
انھوں نے گوادر میں غریب مزدوروں کےقاتلوں کو پکڑنے پرسی ٹی ڈی کو مبارکباد دیتے ہوئے کہا کہ جو بلوچستان کے حقوق کی بات کرے گا ہم اس کیلئے ہرجگہ جائیں گے۔
صوبائی وزیر داخلہ نے مزید کہا کہ بندوق کا استعمال ، نہتے لوگوں اور فورسز پرحملے کرنا دہشتگردی ہے، پاکستان کی طرف میلی آنکھ سے دیکھنےوالوں کو ان کی اوقات دکھائیں گے۔
