پاکستان کے بیٹر بابر اعظم اپنے کیریئر کے بدترین دور سے گزر رہے ہیں سابق بھارتی کپتان گواسکر نے انہیں فارم بحالی کے لیے مشورہ دیا ہے۔
پاکستان کی موجودہ کرکٹ ٹیم کے سب سے بڑے بیٹر بابر اعظم ان دنوں اپنے کیریئر کے بدترین دور سے گزر رہے ہیں اور طویل عرصہ سے ان کا بلا ماضی کی طرح رنز نہیں اگل رہا ہے۔
حالیہ ایک سال کی ناقص فارم کے ساتھ چیمپئنز ٹرافی میں نیوزی لینڈ کے خلاف سست ترین بیٹنگ اور بھارت کے خلاف بھی ناکامی کے بعد سابق کرکٹرز اور شائقین کرکٹ بابر اعظم کو کڑی تنقید کا نشانہ بنا رہے ہیں۔
ایسے میں پڑوسی ملک بھارت کے سابق کپتان لیجنڈ سنیل گواسکر بابر اعظم کی حمایت میں سامنے آئے ہیں اور انہوں نے قومی بیٹر کو فارم کی بحالی کے لیے کچھ تکنیکی مشورے دیےی ہیں۔
سنیل گواسکر سابق پاکستانی کرکٹر باسط علی کے یوٹیوب چینل پر گفتگو کے دوران بابر اعظم پر پاکستانی شائقین اور سابق کرکٹرز کی تنقید پر نالاں دکھائی دیے اور کہا کہ کسی کھلاڑی پر برا وقت آئے تو قوم کو اسے گالیاں دینے کے بجائے سپورٹ کرنا چاہیے، کوہلی بھی ایک ڈیڑھ سال کیلیے آؤٹ آف فارم رہے لیکن ہم نے انہیں گالیاں نہیں دیں بلکہ سپورٹ کیا۔
لیجنڈری انڈین کرکٹر نے بابر کو فارم کی بحالی کے لیے مشورہ دیتے ہوئے کہا کہ اس وقت ان کا اسٹانس کافی پھیلا ہوا ہے۔ اگر وہ اپنے پیروں کے درمیان فاصلے کو تھوڑا کم کریں تو اس سے انہیں شاٹس کھیلنے میں آسانی ہوگی۔
انہوں نے کہا کہ جب کسی بیٹر کے قدموں کے درمیان فاصلہ زیادہ ہوتا ہے تو اس کو آگے پیچھے پوزیشن لینے میں دشواری ہوتی ہے، لیکن یہ گیپ کم کرنے سے بیٹر کا قد تھوڑا اوپر ہو جاتا ہے اور وہ گیند کو بہتر انداز میں سمجھ سکتا ہے۔
سنیل گواسکر نے مزید کہا کہ اگر بابر اعظم ان کے اس مشورے پر عمل کرنے کی کوشش کریں گے تو اس سے ان کی رنز اسکور کرنے کی صلاحیت بحال ہوگی جسکا فائدہ صرف پاکستان کو نہیں ملے گا بلکہ پوری دنیا کے شائقین کرکٹ کو انکی بیٹنگ دیکھنے میں لطف آئے گا کیونکہ ان کی بیٹنگ اور خاص طور پر کور ڈرائیو انتہائی شاندار ہے۔
https://urdu.arynews.tv/sidhu-tell-story-about-babar-azam-failure-and-criticism/
