گوجرانوالہ: تھانہ اروپ کے علاقے گوندلانوالہ میں چچا چچی نے کم عمربھتیجوں پر تشدد کیا جس کے نتیجے میں ایک بھتیجا جاں بحق جبکہ دوسرا زخمی ہوگیا۔
تفصیلات کے مطابق گوجرانوالہ میں چچا اور چچی نے کم عمر بھتیجوں، 7 سالہ سلطان اور 2 سالہ ثقلین کو تشدد کا نشانا بنا ڈالا، تشدد سے سلطان کی حالت بگڑنے پر اسے اسپتال لے گئے جہاں وہ دوران علاج دم توڑ گیا۔
پولیس کے مطابق سلطان اور ثقلین کے والدین منشیات کے الزام میں جیل میں ہیں، ماں باپ جیل چلے گئے تو بچوں کو چچا غلام دستگیر اپنے گھر لے گیا تھا، غلام دستگیر اور اس کی بیوی معمولی باتوں پر بچوں پر تشدد کرتے تھے اور کچھ روز پہلے دونوں بچوں پر ڈنڈوں سے تشدد کیا گیا، اور معاملے کو خفیہ رکھا گیا۔
پولیس کے مطابق سلطان کی حالت بگڑنے پر چچا اسے اسپتال لے گیا اور ڈاکٹر کو بتایا کہ بچہ ٹریفک حادثے میں زخمی ہوا ہے، زخموں کی نوعیت دیکھ کر ڈاکٹرز نے پولیس کو اطلاع دی۔
پولیس نے بتایا کہ دوران علاج سلطان دم توڑ گیا جس کے بعد چچا اور چچی کو گرفتار کر لیا گیا ہے جبکہ دونوں کے خلاف مقدمہ بھی درج کر لیا گیا۔
