Tag: گوجرانوالہ

اسلام آباد: حکومت نے فلاحی ریاست کی جانب ایک اور قدم اٹھاتے ہوئے گوجرانوالہ میں بھی 2 لنگر خانے کھولنے کا فیصلہ کیا ہے۔

تفصیلات کے مطابق حکومت نے گوجرانوالہ میں بھی 2 لنگر خانے کھولنے کا فیصلہ کر لیا، اس سلسلے میں وزیر اعظم کے معاون خصوصی ڈاکٹر ظفر مرزا نے گوجرانوالہ لاری اڈہ پر پناہ گاہ بنانے کے حوالے سے دورہ کیا۔

ظفر مرزا نے اس موقع پر گفتگو کرتے ہوئے کہا کہ وزیر اعظم عمران خان کا خواب ہے کہ پاکستان میں کوئی نادار اور غریب بھوکا نہ سوئے، اس لیے گوجرانوالہ میں بھی 2 لنگر خانے کھولے جا رہے ہیں، فروری تک یہ لنگر خانے قائم کر دیے جائیں گے۔

معاون خصوصی نے کہا کہ وزیر اعظم احساس پروگرام کے تحت نچلے اور نادار طبقے کو اٹھانا چاہتے ہیں، ان کا وژن ایک فلاحی ریاست پر مشتمل ہے۔

یاد رہے کہ وزیر اعظم عمران خان نے 7 اکتوبر کو اسلام آباد میں احساس سیلانی لنگر اسکیم کا افتتاح کیا تھا، لنگر اسکیم سماجی و فلاحی بہبود کے جامع پروگرام احساس کا اہم جزو ہے۔ وزیر اعظم نے لنگر خانہ پروگرام کو ملک بھر کے پس ماندہ علاقوں تک وسعت دینے کا فیصلہ کیا تھا۔ پروگرام کے تحت سندھ کے ضلع تھرپارکر میں بھی لنگر خانے کھولے جانے کا فیصلہ کیا گیا تھا۔

گوجرانوالہ: پنجاب کی ایک تحصیل نوشہرہ ورکاں میں باپ بیٹے سمیت 4 افراد کو فائرنگ کر کے قتل کر دیا گیا۔

تفصیلات کے مطابق ضلع گوجرانوالہ کی تحصیل نوشہرہ ورکاں میں ملزمان نے کار پر فائرنگ کر کے باپ بیٹے سمیت چار افراد کو قتل کر دیا، پولیس کا کہنا ہے کہ جاں بحق افراد میں اعظم، بیٹا توقیر اور 2 گن مین شامل ہیں، جنھیں پیشی پر جاتے ہوئے نشانہ بنایا گیا، فائرنگ کرنے والے موٹر سائیکل پر سوار تھے۔

پولیس کے مطابق قتل ہونے والے افراد کی اپنے رشتہ دار اقبال اور دیگر کے ساتھ مقدمے بازی کے معاملے پر دشمنی چل رہی تھی، مقتول اعظم کچھ روز قبل ہی قتل کے مقدمے سے ضمانت پر رہا ہوا تھا۔

یہ بھی پڑھیں:  گوجرانوالہ میں 8 سالہ بچی زیادتی کے بعد قتل

وزیر اعلیٰ پنجاب عثمان بزدار نے نوشہرہ ورکاں میں 4 افراد کے قتل کے واقعے کا نوٹس لے لیا ہے، انھوں نے آر پی او گوجرانوالہ سے واقعے کی رپورٹ طلب کر لی اور واقعے میں ملوث ملزمان کی جلد گرفتار ی کا حکم بھی جاری کیا۔

وزیر اعلیٰ نے ہدایت کی کہ مقتولین کے لواحقین کو انصاف کی فراہمی یقینی بنائی جائے۔

یاد رہے کہ چند دن قبل گوجرانوالہ میں 8 سالہ معصوم بچی مریم کو مبینہ زیادتی کے بعد گلا دبا کر قتل کیا گیا تھا، پولیس نے شک کی بنیاد پر ہمسائے عبد الغنی کو حراست میں لے کر تفتیش کی تو اس نے قتل کا اعتراف کیا اور اس کی نشان دہی پر کھیتوں سے تین دن پرانی لاش برآمد کی۔

گوجرانوالہ: کاؤنٹر ٹیرر ازم ڈیپارٹمنٹ (سی ٹی ڈی) نے حساس اداروں کے افسران کو نشانہ بنانے کی منصوبہ بندی کرنے والے 2 دہشت گردوں کو گرفتار کر لیا۔

تفصیلات کے مطابق سی ٹی ڈی نے علی پور چوک گوجرانوالہ میں کارروائی کرتے ہوئے 2 دہشت گرد گرفتار کر لیے ہیں۔

سی ٹی ڈی ترجمان کا کہنا ہے کہ گرفتار دہشت گردوں محمد اکمل اور غلام حسین کا تعلق کالعدم تنظیم سے ہے، دہشت گردوں سے دھماکا خیز مواد، نفرت انگیز لٹریچر اور نقدی برآمد کی گئی۔

ترجمان سی ٹی ڈی کے مطابق دہشت گردوں نے حساس اداروں کے افسران کو نشانہ بنانے کی منصوبہ بندی کی تھی لیکن بر وقت کارروائی کرتے ہوئے انھیں گرفتار کر لیا گیا۔

یہ بھی پڑھیں:  کوئٹہ میں سی ٹی ڈی کی کارروائی ، دو خودکش حملہ آوروں سمیت چھ دہشت گرد ہلاک

یاد رہے کہ تین دن قبل بلوچستان کے صوبائی دارالحکومت کوئٹہ کے علاقے مشرقی بائی پاس پر سی ٹی ڈی اور حساس اداروں نے مشترکہ کاروائی میں 2 خود کش حملہ آوروں اور خاتون سمیت 6 دہشت گرد ہلاک کر دیے تھے۔

اس سے قبل جولائی میں راولپنڈی میں سی ٹی ڈی اہل کاروں نے کالعدم تنظیم سے تعلق رکھنے والے ایک دہشت گرد کو گرفتار کر کے اس کے قبضے سے بارودی مواد اور دیگر سامان برآمد کیا تھا۔

ترجمان سی ٹی ڈی کے مطابق دہشت گرد راولپنڈی میں تخریبی کارروائی کرنا چاہتا تھا، سی ٹی ڈی حکام نے خفیہ اطلاع پر راولپنڈی کے علاقہ منکیال میں کام یاب کارروائی کر کے اسے پکڑا۔

اسلام آباد: گوجرانوالہ میں گزشتہ رات گرفتار ہونے والے بھارتی شہری پنجم تیواری کا ایف آئی اے نے پانچ روزہ جسمانی ریمانڈ حاصل کر لیا۔

تفصیلات کے مطابق فیڈرل انویسٹی گیشن ایجنسی (ایف آئی اے) نے گوجرانوالہ میں گرفتار ہونے والے بھارتی شہری کا جسمانی ریمانڈ حاصل کر لیا ہے۔

ایف آئی اے کا کہنا ہے کہ بھارتی شہری پنجم تیواری سے مختلف زاویوں سے تحقیقات کی جا رہی ہے۔

ملزم بھارتی شہری کا کہنا ہے کہ اس نے اسلام قبول کر لیا ہے، اور وہ اب پاکستان ہی میں رہنا چاہتا ہے۔ پنجم تیواری نے کہا میں بہ طور مسلمان یہیں زندگی گزارنا چاہتا ہوں، بھارت نہیں جانا چاہتا۔

ایف آئی اے کا کہنا ہے کہ پنجم تیواری نے 2009 میں دبئی میں پاکستانی شہری کامران کے ساتھ مل کر کاروبار کیا پھر اسلام قبول بھی کر لیا۔

یہ بھی پڑھیں:  ایک اور مبینہ بھارتی جاسوس ڈیرہ غازی خان سے گرفتار

ملزم کا کہنا ہے کامران نے پاکستان میں رہنے اور بہن سے شادی کی پیش کش کی تو انسانی اسمگلرز کے ذریعے سمندری راستے سے کراچی پہنچا اور شناختی کارڈ حاصل کر لیا، اس کے بعد کامران کی بہن سے شادی ہوئی جس سے تین بچے ہیں۔

واضح رہے کہ ایف آئی اے کے ہاتھوں گرفتار بھارتی شہری دس سال سے گوجرانوالہ میں جعلی پاسپورٹ اور جعلی کاغذات کے ساتھ رہ رہا تھا، پنجم تیواری بھارتی ریاست اتر پردیش کے شہر بنارس کا رہایشی ہے۔

ایف آئی اے کے مطابق ملزم تیواری نے اپنا اسلامی نام بلال رکھا ہے، ایف آئی اے نے تیواری اور کامران سمیت پانچ افراد کے خلاف مقدمہ درج کر لیا ہے۔

گوجرانوالہ: وزیر اعظم عمران خان نے کہا ہے کہ پچھلے ایک سال میں جتنا ٹیکس اکٹھا کیا گیا ہے اس کا آدھا قرضوں کے سود میں چلا گیا، ملک اس طرح نہیں چل سکتا۔

تفصیلات کے مطابق وزیر اعظم عمران خان گوجرانوالہ چیمبر آف کامرس کی تقریب سے خطاب کر رہے تھے، انھوں نے کہا کہ قرضوں کے سود پر ٹیکس کا پیسا چلا جائے تو ملک نہیں چل پاتا، 70 فی صد ٹیکس صرف 300 کمپنیاں دیتی ہیں، پاکستان کو جس طرح چلایا جا رہا تھا اب ویسے نہیں چلے گا۔

انھوں نے کہا کہ آپ آج کا دن یاد رکھیں گے کہ ہم نے خود کو کس طرح بدلا، ہم نے کوشش کی ہے کہ سب ٹیکس نیٹ میں آ جائیں، لیکن ڈیمانڈ آ رہی ہے کہ ہم سے پیسے لے لیں اور ٹیکس نیٹ میں نہ ڈالیں۔

وزیر اعظم کا کہنا تھا کہ لوگوں کو ٹیکس نیٹ میں لانے کے لیے خصوصی ایپلی کیشن تیار کریں گے، اس سلسلے میں آسانیاں پیدا کر رہے ہیں، سابق وزیر خزانہ نے خود کہا ایف بی آر میں 700 ارب کی چوری ہوتی ہے، 22 کروڑ میں سے صرف 15 لاکھ لوگ ٹیکس دیتے ہیں، یہ سب تھوڑا ٹیکس بھی دیں تو قرضوں کے دلدل سے نکل سکتے ہیں۔

عمران خان نے کہا کہ اسمگلنگ کے خلاف پوری طاقت کے ساتھ کریک ڈاؤن کر رہے ہیں، اس کی روک تھام کے لیے جنرل باجوہ سے بھی بات کی ہے، افغانستان سے اسمگلنگ ہو رہی ہے، افغان ٹرانزٹ ٹریڈ کی آڑ میں اسمگلنگ پر بھی افغانستان سے بات کر رہے ہیں، اسمگلنگ کو نہ روکا تو یہ انڈسٹری آگے نہیں بڑھ سکتی۔

انھوں نے کہا کہ چھوٹی انڈسٹریز کو فروغ دینے کے لیے گوجرانوالہ، گجرات اور سیالکوٹ کا گولڈن ٹرائی اینگل بنا رہے ہیں، قوم کی ریڑھ کی ہڈی درمیانی اور چھوٹی انڈسٹریاں ہوتی ہیں، لیکن یہاں پیسے والا صنعت کار تو پیسے دے کر اپنا کام نکلوا لیتا ہے، چھوٹے کاروبار کرنے والے جگہ جگہ رشوت دینے پر مجبور ہوتے ہیں۔