کراچی : گورنر سندھ ڈاکٹر عشرت العباد خان نے کہا ہے کہ 25 جون تک شہر سے تمام خطرناک اور غیر قانونی ہورڈنگز اور بل بورڈز ختم کردیئے جائیں گے تاکہ شہریوں کے تحفظ کو یقینی بنایا جاسکے، غیر قانونی ہائیڈرینٹس کے خلاف کاروائی جاری رہے گی اور اس سلسلہ میں کوئی دباؤ برداشت نہیں کیا جائے گا۔ زمینوں پر قبضہ کرنے والے افراد اور مافیا کے خلاف بھرپور کاروائی کی جارہی ہے۔
ان خیالات کا اظہار انہوں نے شہر کے مختلف علاقوں کی تفصیلی دورہ کے بعد شہید بے نظیر بھٹو پارک کلفٹن میں صحافیوں سے بات چیت کرتے ہوئے کیا۔
گورنر سندھ لکی اسٹار صدر، شاہراہ قائدین، شاہراہ فیصل، کارساز ، ناتھا خان پل ، کورنگی روڈ ، بوٹ بیسن گئے اور ترقیاتی منصوبوں پر کام کی رفتار کے ساتھ ساتھ مختلف علاقوں میں سپریم کورٹ کے احکامات پر بل بورڈز اور ہورڈنگز لگانے کے کام کا جائزہ لیا۔
اسٹیشن کمانڈر کراچی، کمشنر کراچی ، ایڈمنسٹریٹر کراچی اور متعلقہ ڈپٹی کمشنرز بھی گورنر سندھ کے ہمراہ تھے۔ انہوں نے کہا کہ تمام خطرناک اور غیر قانونی ہورڈنگز اور بل بورڈز کو ہر صورت میں ہٹادیا جائے گا اور اس تاریخ کے بعد جن اداروں کے بورڈز لگے ہوئے پائے گئے ان کے خلاف قانون کے مطابق کاروائی کی جائے گی۔
شہر میں پانی کی کمی کے حوالے سے پوچھے گئے ایک سوال کے جواب میں گورنر سندھ نے کہا کہ شہر میں پینے کے پانی کی طلب کے مطابق پانی دستیاب نہیں ہے ، یہی وجہ ہے کہ کراچی میں پانی کی کمی کو پورا کرنے کے لئے کے فور منصوبہ شروع کیا جارہا ہے۔
انہوں نے کہا کہ اس کے علاوہ پانی کی چوری روکنے اور لائنوں سے ہونے والے رساؤ پر قابو پانے کیلئے بھی اقدامات کئے جارہے ہیں ایک سوال پر گورنر سندھ نے کہا کہ کوئی فرد خواہ کتنا بااثر کیوں نہ ہو قانون سے بالا تر نہیں اور کراچی آپریشن اس بات کا ثبوت ہے کہ جرائم اور غیر قانونی سرگرمیوں میں ملوث تمام افراد کے خلاف بلا تفریق کاروانی کی جارہی ہے۔
