کراچی: گورنرہاؤس میں مزید 10 ہزار امیدواروں کا آئی ٹی کورسز کا ٹیسٹ کل ہوگا ، آئی ٹی کورسز سے نوجوان 15سے 20 لاکھ ماہانہ کما سکیں گے۔
تفصیلات کے مطابق گورنر ہاﺅس میں مزید 10000 امیدواروں کا آئی ٹی کورسز کا ٹیسٹ جمعرات 20 کو منعقد ہوگا، رجسٹریشن نمبر 10001 سے 20000 صبح 11 بجے ٹیسٹ میں شریک ہوں گے۔
گورنر سندھ کامران خان ٹیسوری نے گورنر ہاﺅس کے باہر سیکورٹی اور ٹریفک انتظامات کے حوالے سے افسران کو ہدایت کرتے ہوئے کہا کہ آئی ٹی کورسز کے ٹیسٹ نوجوانوں کے مستقبل کے لئے اچھی خبر ہے ۔
گورنر سندھ کا کہنا تھا کہ آرٹیفیشل انٹیلی جنس، میٹاورس اور ویب تھری کورسز کرکے نوجوان 15 سے 20 لاکھ ماہانہ کما سکیں گے۔
اس سے قبل گذشتہ اتوار کو گورنر ہاﺅس میں مفت جدید آئی ٹی کورسز کے لئے ٹیسٹ ہوا تھا ، جس میں7ہزار 500 نوجوان نے شرکت کی تھی۔
یاد رہے گورنر سندھ کامران ٹیسوری کا کہنا تھا کہ جدید ترین آئی ٹی کورسز کرانے کے منصوبے میں ساڑھے پانچ لاکھ نوجوانوں نے رجسٹریشن کرائی ہے، ہم نے کسی لیڈر کے لیے وعدہ نہیں کیا تھا لیکن کرکے دکھایا گیا، گورنر ہاؤس کویونیورسٹی تو پچھلی حکومت نہ بنا سکی لیکن ہم نے درسگاہ کا درجہ دے دیا۔
