کراچی : یومِ پاکستان کے موقع پر گورنر ہاؤس میں مختلف شعبہ ہائے زندگی میں نمایاں کارکردگی کا مظاہرہ کرنے والی سول شخصیات کو انعامات سے نوازا گیا۔

تفصیلات کے مطابق یوم پاکستان کے موقع پر گورنر سندھ محمد زبیر نے گورنر ہاﺅس کراچی میں ایک پر وقار تقریب میں مختلف شعبہ جات زندگی میں نمایاں کارکردگی دکھانے والے سماجی شخصیات میں اعزازات تقسیم کیئے۔

اس حوالے سے گورنر سندھ محمد زبیر نے یوسف شاھین کو ادب ،شہناز وزیر علی اور پروفیسر دانشمند کو تعلیم کے شعبہ میں ستارہ امتیاز ،انیس الحسنین شاہ کو شعبہ موسیقی، حمیرہ چنہ کو گلوکاری،انور شعور کو ادب میں خدمات پر صدارتی اعزازبرائے حسن کارکردگی دیا گیا۔

اسی طرح تقریب میں غازی صلاح الدین کو ادب و صحافت اور سعید اللہ خان کو خدمات عامہ کے شعبوں میں خدمات پر تمغہ برائے حسن کارکردگی جب کہ حنیف لاشاری کو موسیقی کے شعبہ میں نمایاں کارکردگی پر تمغہ امتیاز کا اعزاز دیا گیا۔

یاد رہے یوم پاکستان کے موقع پر ہر سال نمایاں خدمات انجام دینے والی سماجی ادبی اور فنون لطیفہ سے تعلق رکھنے شخصیات کو اعزازات و انعامات سے نوازا جاتا ہے۔

کراچی : وزیراعظم پاکستان نواز شریف نے کہا ہے کہ حکومت سنبھالی تو مختلف چیلینجز کا سامان تھا جس کا موثر منصوبہ بندی کے ذریعے مقابلہ کیا جس کے نتیجے میں آج پاکستان ترقی اور خوشحالی کے راستے پرگامزن ہے۔

وزیراعظم نوازشریف گورنر ہاؤس میں تاجروں کے وفد سےگفتگو کر رہے تھے انہوں نے کہا کہ کاروباری سرگرمیاں معمول کےمطابق چل رہی ہیں کیوں کہ شہر میں امن و امان بحال ہوچکا ہے جس کے لیے سیکیورٹی اداروں کا کردار قابل ستائش رہا ہے۔

انہوں نے کہا کہ عالمی سرمایہ کاروں کی دلچسپی پاکستان میں بڑھ رہی ہے اور معاشی ترقی کی شرح مسلسل بلند ہو رہی ہے جس کے ثمرات پورے ملک میں دیکھے جا سکتے ہیں۔

اسی سے متعلق : نبی کریم ﷺکی شان میں کسی بھی طرح کی گستاخی ناقابلِ معافی ہے،وزیراعظم

وزیراعظم نوازشریف نے کہا کہ پاک چین اقتصادی راہداری میں ہونے والی سرمایہ کاری اور تجارتی سرگرمیوں سے روزگار کے نئےمواقع فراہم ہوں گے اور ملک میں بیروزگاری کی شرح میں نمایاں کمی واقع ہو گی۔

انہوں نے کہا کہ حکومت سستی اورماحول دوست توانائی کے لیےکوشاں ہیں جس کے لیے کئی منصوبوں پر کام شروع کر رکھا ہے جس سے نہ صرف ملک میں لوڈ شیڈنگ کا خاتمہ ہوگا بلکہ عوام کو مناسب نرخوں پر بجلی میئسر ہو سکے گی۔

ممتاز صنعت کار عقیل کریم ڈھیڈی نے اجلاس کے اختتام پر میڈیا سے گفتگو کرتے ہوئے کہا کہ وزیراعظم نے کراچی پیکج کے لیے مزید 5 ارب روپے دینےکی یقین دہانی کرائی ہے جس سے پانی، سیوریج اور کچرے کےمسائل حل کیے جائیں گے۔

عقیل کریم نے کہا کہ کراچی میں امن کی بحالی پر تاجروں نے وزیراعظم کا شکریہ ادا کیا اور وزیراعظم سےمطالبہ کیا کہ آپ 1992 کے وزیراعظم بن جائیں جب آپ اپنے احکامات پر سختی سے عمل درآمد کرواتے تھے۔

عقیل کریم ڈھیڈی نے بتایا کہ تاجروں نے وزیراعظم پاکستان نواز شریف کو تجویز دی ہے کہ سندھ کے بڑے منصوبوں کو پاک چین اقتصادی راہداری میں شامل شامل کیا جائے تاکہ سندھ بھی اس منصوبے سے مستفید ہو اور کاروباری سرگرمیوں میں مزید اضافہ ہوگا۔

کراچی: گورنر سندھ نے کہا ہے کہ شنگھائی الیکٹرک پاور کمپنی جلد ’’کےالیکٹر ک‘‘ کا نظم و نسق سنبھال لے گی جو کہ کراچی کے عوام کے لیے ایک اچھی خبر ہے۔

یہ بات انہوں نے آج شنگھائی الیکٹرک پاور کمپنی کے وفد سے کی گئی ملاقات کے دوران کہی، ملاقات کے دوران شنگھائی الیکٹرک پاور کمپنی کی جانب سے  ’’کے الیکٹرک‘‘ کا کنٹرول سنبھالنے کے معاہدے پر تفصیلی تبادلہ خیال کیا گیا۔

گورنر سندھ کا کہنا تھا کہ اس معاہدے سے کراچی کے عوام کو بجلی کی فراہمی میں بہتری آئے گی اور یہ کراچی کے عوام کے لیے ایک اچھی خبر ہے جس کے اثرات گھریلو صارفین کے ساتھ ساتھ صنعتی علاقوں تک بھی پہنچیں گے اور معیشت میں خوشگوار تبدیلی رونما ہو گی۔

گورنر سندھ محمد زبیر نے شنگھائی الیکٹرک پاور کمپنی کے وفد کو سیکیورٹی کی مکمل فراہمی کی یقین دہانی کرواتے ہوئے کہا کہ پاک چین دوستی بے مثل ہے جسے مزید مستحکم اور سود مند بنانے کے لیے چین کےسرمایہ کاروں کو ہر قسم کا تحفظ دیا جائے گا۔

انہوں نے کہا کہ پاک چین دوستی میں وقت کے ساتھ ساتھ مزید اضافہ ہو رہا ہے اور دونوں ممالک میں مزیدتعاون کےوسیع مواقع موجود ہیں جس کے لیے وزیر اعظم اقتصادی شعبے پر خصوصی توجہ دے رہے ہیں۔

گورنر سندھ نے کہا کہ وزیراعظم کی پالیسیوں سےسرمایہ کاری کے نمایاں مواقع پیدا ہوئے ہیں اور ملک کی معیشت ترقی کی شاہراہ پر گامزن ہے جس کی روشن مثال پاک چین اقتصادی راہداری منصوبے کی کامیابی ہے۔

گورنر سندھ نے چینی کمپنی کے وفد سے گفتگو کے دوران کراچی کی تعمیر و ترقی اور امن و امان کی بحالی سے متعلق حکومتی پروجیکٹس کی تفصیلات بتاتے ہوئے کہا کہ کراچی میں سرمایہ کاری کے لئے فضا نہایت سازگار ہے اور حکومت اس شہر میں سرمایہ کاری کرنے والوں کی حوصلہ افزائی کرے گی۔

کراچی : گورنر سندھ محمد زبیر نے کہا کہ ہے کہ ملک کی مجموعی قومی پیداوار کو 7 فی صد سالانہ تک کرنے کے خواب کا حصول کراچی کی ترقی میں مضمر ہے۔

ان خیالات کا اظہار انہوں نے کراچی انڈسٹریل فورم اور کراچی کے 7 صنعتی علاقوں کی ایسوسی ایشنز کے عہدیداروں سے ملاقات کے دوران کیا، انہوں نے کہا کہ کراچی ترقی کرے گا تو ملک ترقی کرے گا یہی وجہ ہے کہ سند ھ میں پائیدار امن و امان کے لیے خصوصی اقدامات کیے جارہے ہیں۔

دورانِ ملاقات گورنر سندھ نے صنعت کاروں کو بتایا کہ وزیرِ اعظم پاکستان صنعت کاروں اور تاجروں کو بہت زیادہ اہمیت دیتے ہیں اور کل ہونے والی ملاقات میں انہوں نے ہدایت کی ہے کہ تاجروں اور صنعت کاروں کے مسائل کے حل کے لیے ترجیحی بنیادوں پر اقدامات کیے جائیں۔

گورنر سندھ محمد زبیر نے کہا کہ صنعتی علاقوں میں بنیادی ڈھانچے کی بہتری اور بنیادی سہولیات کی فراہمی کو یقینی بنانے خصوصاً بجلی ، گیس اور پانی کی سہولیات فراہم کرنے کے لیے اقدامات کیے جائیں گے۔

گورنر سندھ نے مختلف یوٹیلٹی اداروں کی جانب سے مسائل کی نشاندہی کے باوجود توجہ نہ دیے جانے کی شکایات کا نوٹس لیتے ہوئے انہیں یقین دلایا کہ موجودہ حکومت اس ضمن میں خصوصی اقدامات کرے گی اور تاجروں کی شکایات کا ازالہ کیا جائے گا۔

انہوں نے صنعت کاروں پر زور دیا کہ وہ صوبہ سندھ کوصنعتی ترقی کا مرکز بنانے کے لئے مزید اقدامات کریں کیوں کہ سندھ اور بالخصوص کراچی کی ترقی پورے پاکستان کی ترقی ہے

ذرائع کے مطابق گورنر سندھ محمد زبیر سے معروف صنعت کار رہنما سراج قاسم تیلی کی سربراہی میں ہونے والی ملاقات زبیر موتی والا، ہلال شیخ، جاوید بلوانی، میاں محمد احمد، مسعود نقی، زین بشیر، یونس بنیر، اخلاق خلیل، اسد نثار اور سلیمان چاؤلہ بھی شامل تھے۔