کراچی : وزیر داخلہ چوہدری نثار نے کہا ہے اختیارات کے بغیر رینجرز کو کراچی کی سڑکوں اورچوراہوں پر نہیں کھڑا کر سکتے اگراختیارات کے سلسلے میں ہر مرتبہ لیت و لعل سے کام لیا گیا تو کراچی میں قائم  امن کو شدید خطرات لاحق ہو سکتے ہیں۔

یہ بات انھوں نے گورنرسندھ محمد زبیر سے ملاقات کے دوران وفاقی وزیر داخلہ کا مزید کہنا تھا کہ کراچی کے امن و امان میں رینجرز کی قربانیاں کسی سے پوشیدہ نہیں ہیں۔

انہوں نے کہا کہ شہر کےحالات میں بہتری تمام سیکیورٹی اداروں کی مشترکہ کاوشوں کا نتیجہ ہے جس میں رینجرز کا کردار سر فہرست ہے جسے نظر انداز کرنے کا مطلب دوبارہ سے کراچی کو بد امنی کی جانب دھکیلنا ہے۔

اسی سے متعلق : رینجرز اختیارات، فیصلہ کابینہ اجلاس میں کیا جائے گا

وزیر داخلہ چوہدری نثار نے کہا کہ وفاقی حکومت کراچی کے تمام اسٹیک ہولڈرز کے واضح مطالبے، ملکی مفاد اورعوام کی فلاح و بہبود کے لئے شروع کیےگئےآپریشن کو منطقی انجام تک پہنچانے کے لیے پُرعزم ہے اور اس میں حائل رکاوٹوں کو دور کیا جائے گا۔

 یہ بھی پڑھیں : مزید انتظار نہیں کیا جائے گا، رینجرز کو اختیارات آج ہی دیئے جائیں، مصطفی کمال

واضح رہے سندھ میں رینجرز کو حاصل خصوصی اختیارات کی معیاد 15 اپریل کو ختم ہو چکی ہے لیکن تاحال سندھ حکومت نے اس میں توسیع کی سمری پر دستخط نہیں کیے ہیں اور اب توسیع کا معاملہ سندھ کابینہ کے اجلاس تک موخر کردیا ہے جو 21 اپریل ہوگا۔

دوسری جانب کراچی کے کاروباری حضرات، سیاسی و دینی حلقے اور سول سوسائٹی سندھ حکومت پر دباؤ ڈالنے کے لیے اپنی سی کوشش کر رہے ہیں تاہم سندھ حکومت اس دباؤ کو سنجیدگی سے لیتی نظر نہیں آرہی ہے۔