کراچی: مصطفیٰ کمال اور فاروق ستار سے ملاقات کے بعد گورنر سندھ نے خصوصی انٹرویو میں کہا ہے کہ رہنماؤں نے انھیں شہر میں اختلافات ختم کیے جانے کا یقین دلایا ہے، میں چاہتا ہوں کہ سیاسی جماعتیں مل کر عوام کے مفاد کے لیے کام کریں۔
تفصیلات کے مطابق کامران ٹیسوری کے گورنر بننے کے بعد سے وہ کراچی کے مختلف سیاسی رہنماؤں کے ساتھ ملاقاتیں کر رہے ہیں، گزشتہ دنوں پاک سرزمین پارٹی کے سربراہ مصطفیٰ کمال اور ڈاکٹر فاروق ستار سے بھی ملاقات کی تھی، جس کے بعد یہ سوال اٹھ رہا تھا کہ کراچی کی سیاست میں کیا ہونے جا رہا ہے؟
اس سلسلے میں گورنر سندھ کامران ٹیسوری نے اے آر وائی کو خصوصی انٹرویو میں بتایا کہ مصطفیٰ کمال اور فاروق ستار نے انھیں یقین دلایا ہے کہ اختلافات اور نفرتیں ختم ہونی چاہیئں، وہ دونوں بھی چاہتے ہیں کہ شہر دوبارہ سے روشنیوں کا شہر بنے، یہ ملاقاتیں اسی سلسلے کی کڑی ہیں۔
کامران ٹیسوری کا کہنا تھا کہ صوبے، شہر اور عوام کے وسیع تر مفاد میں کام کرنے کی ضرورت ہے، لوگوں کو کام چاہیے، لوگ نہیں سننا چاہتے کہ ہم ایک دوسرے کو ٹھیک کریں، وہ چاہتے ہیں ہم اس شہر کو ٹھیک کریں۔
گورنر سندھ کے واضح کیا کہ ان کا مشن تمام سیاسی جماعتوں کے درمیان ہم آہنگی پیدا کرنا ہے، انھوں نے کہا ’’چاہتا ہوں تمام سیاسی جماعتیں ایک میز پر بیٹھ کر عوام کے مفاد کے لیے کام کریں۔‘‘
’’کیا سب کو ایک جگہ بٹھانے کی آپ کی یہ کوشش کامیاب ہو جائے گی؟‘‘ اے آر وائی کے اس سوال پر گورنر سندھ نے کہا ’’کوشش کی جائے اور اس کا فوری حل نہ نکلے تو وہ صرف کوشش ہی رہ جاتی ہے، مجھے یقین ہے کہ سب محبت سے مل جل کر صوبے میں رہیں گے اور رونقوں کو بحال کریں گے۔‘‘
ایم کیو ایم کے ساتھ پیپلز پارٹی کے معاہدوں پر انھوں نے کہا کہ جس نے وعدے اور معاہدے کیے ان کو پورا کرنے چاہیئں، جو معاہدہ دستخط شدہ ہو اور اس کے ضامن شہباز شریف، بلاول بھٹو اور زرداری ہوں تو اس پر عمل ہونا چاہیے، میرا کام ہے کہ میں معاہدے پورے نہ ہونے پر یاد دہانی کراتا رہوں، باقی کام سیاسی جماعتوں کی قیادت کا ہے کہ وہ بات چیت کا سلسلہ جاری رکھیں۔
کراچی میں اسٹریٹ کرائم کا جن کے قابو، سفاک ڈکیت نے مزاحمت پر ایک اور شہری کو قتل کردیا
اسٹریٹ کرائمز پر گورنر سندھ نے کہا ’’میں کیا کوئی خاموش نہیں بیٹھے گا، اس پر جلد قابو نہ کیا گیا تو حالات کنٹرول سے باہر ہو جائیں گے، کراچی کے شہری بے چین ہیں تو میں بھی سکون سے نہیں بیٹھوں گا۔‘‘
کامران ٹیسوری کا کہنا تھا کہ مصطفیٰ کمال اور فاروق ستار سب کی باڈی لینگویج ایک ہے، اب یہ وقت اس شہر اور صوبے کو مل کر چلانے کا ہے، جہاں تک بات ایم کیو ایم میں واپسی کا ہے، تو کون پارٹی میں کب آئے گا اس کا فیصلہ ایم کیو ایم قیادت نے کرنا ہے، خالد مقبول فیصلہ کریں گے کون کس طرح اور کب واپس ہوگا۔
