گلگت: گلگت بلتستان کے گورنر مہدی شاہ نے پارٹی کارکن سے سوشل میڈیا اکاؤنٹ واپس لینے کے لیے ایف آئی اے سے رجوع کر لیا ہے۔
تفصیلات کے مطابق گورنر گلگت بلتستان نے اپنی ہی پارٹی کارکن کے خلاف ایف آئی اے سے رجوع کر لیا ہے، ایف آئی اے ذرائع کا کہنا ہے کہ گورنر کی جانب سے شکایت موصول ہوئی ہے، اور اب یہ معاملہ زیر تفتیش ہے۔
ذرائع کے مطابق ایف آئی اے میں یہ شکایت پیپلز پارٹی اسکردو کے سیکریٹری اطلاعات خواجہ مہدی جُو کے خلاف درج کرائی گئی ہے۔
گورنر سیکریٹریٹ نے اس کیس پر باقاعدہ پریس ریلیز بھی جاری کر دی ہے، پارٹی ذرائع کا کہنا ہے کہ جب مہدی شاہ گورنر نہیں بنے تھے تو ان کا سوشل میڈیا اکاؤنٹ پارٹی کارکن خواجہ مہدی چلاتے تھے، خواجہ مہدی گورنر کا سوشل میڈیا اکاؤنٹ رجسٹرڈ سم پر چلا رہے تھے۔
ذرائع نے بتایا کہ گورنر بننے کے بعد بھی خواجہ مہدی وہی سوشل میڈیا پیج چلاتے رہے، اور پھر اس سوشل میڈیا اکاؤنٹ سے گورنر کے سیاسی حریف کی پوسٹ شیئر کی گئی۔
گورنر سیکریٹریٹ کا کہنا ہے کہ یہ مسئلہ خالصتاً ادارہ جاتی نظم و نسق اور ڈیجیٹل سیکیورٹی کا ہے، اس اکاؤنٹ کی نگرانی نظریاتی کارکن کے سپرد تھی لیکن پھر خواجہ مہدی نے اکاؤنٹ واپسی کے مطالبے کو مسترد کیا، جس پر قانونی تقاضوں کے تحت سائبر سیکیورٹی سے رابطہ کیا گیا، اور ایف آئی اے سائبر سیکیورٹی نے اس پر قانونی کارروائی کی۔
گورنر گلگت بلتستان مہدی شاہ نے کہا کہ پارٹی قیادت نے بطور گورنر اکاؤنٹ استعمال کیا، اس اکاؤنٹ کو احسن طریقے سے میرے اسٹاف کو منتقل کیا جانا چاہیے۔ ادھر گورنر کے ترجمان نے اپیل کی ہے کہ سیاسی کارکن، میڈیا اور سوشل میڈیا اس مسئلے کو سیاسی رنگ نہ دیں۔