Tag: گورنر پنجاب

مانچسٹر: گورنر پنجاب چوہدری سرور نے کہا ہے کہ اب فیصلے ملک میں ہوں گے، ملک سے باہر نہیں۔

تفصیلات کے مطابق برطانیہ کے شہر مانچسٹر میں اے آر وائی نیوز سے خصوصی گفتگو کرتے ہوئے گورنر پنجاب چوہدری سرور نے لندن میں ن لیگی اجلاس پر ردِ عمل میں کہا کہ کوئی بھی جماعت ہو وہ اپنے اجلاس ملک میں کرے۔

گورنر پنجاب کا کہنا تھا کہ اب فیصلے میں ملک میں ہوں گے باہر نہیں، ملکی حالات کو ملک کے اندر ہی زیر بحث لایا جائے تو بہتر ہے۔

یاد رہے کہ گزشتہ روز مسلم لیگ ن کی مرکزی قیادت نے برطانوی دارالحکومت میں بیٹھک سجائی، یہ اجلاس ایجویئر روڈ پر مقامی ریسٹورنٹ میں منعقد کیا گیا، جس میں شہباز شریف، ایاز صادق، خواجہ آصف، احسن اقبال، پرویزرشید، اسحاق ڈار، خرم دستگیر، مریم اورنگ زیب اور دیگر نے شرکت کی۔

یہ بھی پڑھیں:  ن لیگ کی مرکزی قیادت کی لندن کے ریسٹورنٹ میں بیٹھک

شہباز شریف نے کہا تھا کہ ہم چیف الیکشن کمشنر کے معاملے پر اتفاق رائے چاہتے ہیں لیکن پی ٹی آئی حکومت سے ماضی قریب کا تجربہ مایوس کن ہے، نواز شریف صحت یابی کے بعد ڈاکٹرز کے مشورے سے پاکستان جائیں گے۔

دوسری طرف لندن میں نواز شریف کی رہایش گاہ کے باہر مظاہرین نے احتجاج کیا، مظاہرین نے پارک لین فلیٹس کا گیٹ توڑنے کی کوشش بھی کی، پولیس نے گیٹ توڑنے کی کوشش کرنے والوں کو پیچھے ہٹا دیا، تحریک انصاف نے مظاہروں سے لا تعلقی کا اعلان کیا۔

لندن: گورنر پنجاب چوہدری سرور نے کہا ہے کہ ہم اوورسیز پاکستانیوں کے مسائل کے حل کے لیے کوشاں ہیں۔

تفصیلات کے مطابق گورنر پنجاب چوہدری سرور کے اعزاز میں پاک برطانیہ چیمبر آف کامرس نے عشائیہ دیا، تقریب سے خطاب کرتے ہوئے انھوں نے کہا کہ اوورسیز پنجاب کمیشن مسائل کے حل کے لیے کوشاں ہے۔

گورنر پنجاب کا کہنا تھا ہائی کورٹ نے اوورسیز پاکستانیوں کے مقدمات 6 ماہ میں نمٹانے کا فیصلہ کیا تھا، 20 ہزار مقدمات میں سے 60 فی صد پر فیصلے ہو چکے ہیں، نئے پاکستان میں قبضہ مافیا ضلعی افسر سے بھی کم زور ہو چکا ہے، پاکستان کی تاریخ میں پہلی دفعہ قبضہ مافیا کو شکست ہو رہی ہے۔

یہ بھی پڑھیں:  اوورسیز پاکستانیوں کیلئے خوشخبری، وطن واپسی پر ہوائی ٹکٹ سستا کرنے کا فیصلہ

چوہدری سرور نے کہا کہ صاف اور سرسبز پاکستان کا سفر جاری ہے، ملک میں مہنگائی کے باوجود معیشت بہتر ہو رہی ہے۔

یاد رہے گزشتہ ہفتے حکومت پاکستان نے بیرون ملک مقیم پاکستانیوں کے لیے رعایتی نرخوں پر ہوائی ٹکٹ فراہم کرنے کا فیصلہ کیا تھا، 7 سال سے زائد عرصہ کام کرنے والے افراد اسکیم سے مستفید ہو سکیں گے۔ وزیر اعظم کی معاون خصوصی برائے انسداد غربت اور سماجی تحفظ ڈاکٹر ثانیہ نشتر نے میڈیا سے گفتگو کرتے ہوئے کہا تھا کہ حکومت کم تنخوا دار افراد کے لیے رعایتی نرخوں پر ہوائی ٹکٹ فراہم کرے گی تاکہ وہ بہ آسانی اپنے گھروں کو لوٹ سکیں۔