بھارت کے مہاراشٹر کے یوت مال ضلع کے دوارہا میں ایک افسوسناک واقعہ رونما ہوا، ریلوے فلائی اوور کی تعمیر کے لیے کھودے گئے ایک گہرے گڑھے میں ڈوب کر 4 بچے زندگی کی بازی ہار گئے۔
غیر ملکی ذرائع ابلاغ کے مطابق بچے فلائی اوور تعمیر کے مقام کے قریب کھیل رہے تھے۔ کھمبے لگانے کے لیے کھودا گیا بڑا گڑھا بارش کے پانی سے بھر گیا تھا۔
خدشہ ہے کہ بچے کھیلتے کھیلتے اس میں گر گئے یا ممکنہ طور پر تیرنے کی کوشش میں ناکام رہنے کی وجہ سے ڈوب گئے۔ آس پاس کے لوگوں نے بچوں کو گڑھے سے نکال کر اسپتال منتقل کیا۔ جہاں انہیں مردہ قرار دے دیا گیا۔
رپورٹس کے مطابق مرنے والے بچوں کی شناخت ریحان اسلم خان (13)، گولو پانڈرنگ نارن ورے (10)، سومیا ستیش کھڈسن (10) اور ویبھو آشیش بودھلے (14) کے طور پر ہوئی ہے۔
پولیس کی جانب سے معاملے کی تحقیقات کا آغاز کردیا گیا ہے، وہیں انتظامیہ نے تعمیراتی کمپنی کی لاپروائی کی بھی تحقیقات شروع کردی ہیں۔
بھارت میں شدید بارشوں سے معمولات زندگی مفلوج، اسکول و کالج بند
بھارت کے مہاراشٹر میں موسلا دھار بارش نے بڑے پیمانے پر تباہی مچادی، اب تک ریاست میں 7 افراد زندگی کی بازی ہار چکے ہیں جبکہ دو سو سے زیادہ افراد بادل پھٹنے اور سیلابی صورتحال میں پھنس گئے ہیں۔
بھارتی میڈیا رپورٹس کے مطابق بارش سے سب سے زیادہ متاثر ممبئی ہوا ہے، جہاں موسلا دھار بارش ہورہی ہے، سڑکیں ندی نالوں کا منظر پیش کر رہی ہیں، گاڑیاں پانی میں پھنسی ہوئی ہیں۔
طوفانی بارش میں طیارے کی لینڈنگ کی ویڈیو وائرل
رپورٹس کے مطابق شدید بارش کے سبب ممبئی میونسپل کارپوریشن (بی ایم سی) نے اسکولوں اور کالجوں کو بند رکھنے کا اعلان کردیا ہے، موسم کی صورتحال دیکھتے ہوئے سبھی تعلیمی اداروں میں چھٹی کا فیصلہ کیاگیا ہے۔
محکمہ موسمیات کے مطابق 18 اگست صبح ساڑھے آٹھ بجے سے 19 اگست صبح ساڑھے پانچ بجے تک وکرولی میں 194.5 ملی میٹر، سانتا کروز میں 185 ملی میٹر، جوہو میں 173.5 ملی میٹر اور بائیکولا میں 167 ملی میٹر بارش ریکارڈ کی گئی۔
