لاہور : ہیئر کے علاقے میں گھریلو جھگڑے پر ایک شخص نے بیوی اور بیٹی سمیت 4 افراد کو قتل کردیا، واردات کے بعد ملزم فرار ہوگیا۔
اس حوالے سے کینٹ پولیس کا کہنا ہے کہ ملزم عمران نے گھریلو ناچاقی پر اپنی بیوی،14 سالہ بیٹی،15 سالہ بھتیجے اور سسر کو قتل کردیا اور موقع واردات سے فرار ہونے میں کامیاب ہوگیا۔
اطلاع ملتے ہی پولیس ٹیم جائے وقوعہ پر پہنچی اور مقتولین کی لاشوں کو تحویل میں لے کر پوسٹ مارٹم کیلئے اسپتال منتقل کردیا۔
جاں بحق ہونے والوں میں ملزم کی بیوی فوزیہ، 14 سالہ بیٹی زینب، 15 سالہ بھتیجا رضا اور 55سالہ سسر مرزا شامل ہیں۔
ایس پی کینٹ قاضی علی نے اے آر وائی نیوز کو بتایا کہ مقتولہ کے بھائی کی مدعیت میں ملزم عمران کیخلاف مقدمہ درج کیا گیا ہے۔
انہوں نے بتایا کہ ملزم کی گرفتاری کیلئے خصوصی ٹیم تشکیل دے کر مختلف مقامات پر چھاپے مارے جارہے ہیں، امید ہے بہت جلد ملزم کو حراست میں لے لیا جائے گا۔
ایس پی کینٹ کا کہنا ہے کہ قانون ہاتھ میں لینے والوں سے آہنی ہاتھوں سے نمٹا جائے گا، ملزم کو گرفتار کرکے قانون کے کٹہرے میں لایا جائے گا۔
