Tag: گھریلو ملازمہ تشدد کیس

گوجرانوالہ: گھریلو ملازمہ پر تشدد کیس نے نیا رخ اختیار کر لیا،12 سالہ رخسار سے جنسی زیادتی کا بھی انکشاف ہوا ہے جس کی ڈاکٹروں نے تصدیق کردی،ملزمان کے خلاف جنسی تشدد اور جبری مشقت کی دفعات کے تحت مقدمہ درج کرلیا گیا۔

تفصیلات کے مطابق منگل کو 12 سالہ لڑکی کے چہرے پر گرم چائے پھینکی گئی تاہم بدھ کو یہ کیس نیا رخ اختیار کرگیا،12 سالہ رخسار کو آج طبی معائنے کے لیے سول اسپتال منتقل کیا گیا جہاں ڈاکٹروں نے طبی معائنے کے بعد 12 سالہ بچی پر جنسی تشدد کا انکشاف کیا۔

رپورٹ ملنے پر تھانہ اروپ پولیس نے ملزم آصف اور ملزم عمران کے خلاف جنسی تشدد اور جبری مشقت کی دفعات کے تحت مقدمہ درج کرلیا، پولیس کے مطابق ملزم عمران کو گذشتہ روز حراست میں لے لیا گیا تھا جبکہ ملزم آصف کو بھی جلد گرفتار کرلیا جائے گا۔

مزید پڑھیں : چائے لانے میں تاخیر ، مالک نے گھریلو ملازمہ کے چہرے پر چائے پھینک دی

واضح رہے کہ گزشتہ روز گوجرانوالہ میں گھریلو ملازمہ 12 سالہ رخسار پر محض چائے دیر سے لانے پر مالک نے طیش میں آکر اس کے چہرے پر ہی گرم چائے انڈیل دی تھی جس سے 12 سالہ معصوم رخسار کا چہرہ جھلس کر رہ گیا۔

پولیس نے مکان مالک آصف کے بھائی عمران کو حراست میں لے لیا تھا جبکہ ملزم آصف موقع سے فرار ہوگیا جس کی تلاش جاری ہے۔