کراچی: ویری فیکیشن ایپ کے افتتاح کے بعد شہری گھر بیٹھے اسلحہ لائسنس، ایئرپورٹ انٹری کیلئے درخواست جمع، وصول کرسکیں گے۔
آئی جی سندھ غلام نبی میمن نے اسپیشل برانچ سندھ کا دورہ کیا، جہاں انھوں نے ویری فیکیشن ایپ کا افتتاح کیا، غلام نبی میمن کو بریفنگ میں بتایا گیا کہ اب شہریوں کو یہ سہولت میسر ہوگی کہ وہ گھر بیٹھے اسلحہ لائسنس اور ایئرپورٹ انٹری کیلئے درخواست جمع اور وصول کرسکیں۔
ڈی آئی جی اسپیشل برانچ نے محکمے کی کارکردگی پر تفصیلی بریفنگ دی، بریفنگ میں بتایا گیا کہ گزشتہ سال کی نسبت اسٹریٹ کرائمز میں واضح کمی دیکھنے میں آئی۔
مؤثر انٹیلی جنس کے باعث منظم جرائم اور اسمگلنگ کم ہوئی، اسپیشل برانچ کی رپورٹ کے نتیجےمیں متعدد اسکریپ ڈیلرز گرفتار ہوئے۔
آئی جی سندھ نے کہا کہ اسپیشل برانچ کو کرمنلز کے خلاف ڈیجیٹل ڈیٹا بینک قائم کرنے کی ضرورت ہے۔
غلام نبی میمن کا مزید کہنا تھا کہ دور حاضر کی ضروریات کو مدنظر رکھتے ہوئے محکمہ کی تنظیم نو کی بھی ضرورت ہے۔