کراچی: سندھ اسمبلی کے اسپیکر آغا سراج کی رہائش گاہ کو ان کے لیے سب جیل قرار دے دیا گیا۔
تفصیلات کے مطابق اسپیکر سندھ اسمبلی آغا سراج درانی کی رہائش گاہ کو سب جیل قرار دے دیا گیا ہے۔
ذرائع کا کہنا ہے کہ محکمہ داخلہ سندھ اسپیکر کےگھر کو سب جیل قرار دینے کا حکم کچھ دیر میں جاری کرے گا، یہ فیصلہ وزیر اعلیٰ سندھ مراد علی شاہ کی منظوری سے کیا گیا ہے۔
ذرائع کے مطابق آغا سراج درانی کو آج لانڈھی جیل سے ڈیفنس میں واقع گھر منتقل کیا جائے گا، یہ فیصلہ سندھ اسمبلی اجلاس کے دوران اسپیکر کی آمد و رفت میں خطرات کے پیش نظر کیا گیا۔
آغا سراج درانی کے اثاثوں اور بے نامی جائیداد کی تفصیلات سامنے آگئیں
اسپیکر آغا سراج درانی آمدن سے زائد اثاثہ جات کیس میں نیب کی حراست میں ہیں، نیب نے انھیں 3 دسمبر کو سپریم کورٹ کے باہر سے گرفتار کیا تھا، سپریم کورٹ نے انھیں سرنڈر کرنے کا حکم دیا تھا، وہ ضمانت کے لیے دائر کیس کی سماعت کے لیے عدالت حاضر ہوئے تھے۔
آغا سراج درانی کے اثاثوں اور بے نامی جائیداد کی تفصیلات بھی سامنے لائی جا چکی ہیں، نیب کے مطابق ان کی بے نامی جائیداد کی مالیت 1 ارب 4 کروڑ 50 لاکھ روپے ہے۔