بھارت میں بگ باس او ٹی ٹی (ہندی) سیزن-2 کے فاتح اور سوشل میڈیا انفلوئنسر ایلویش یادو کے گھر پر نامعلوم مسلح افراد نے فائرنگ کی ہے، جبکہ حملہ آور با آسانی فرار ہونے میں کامیاب ہوگئے۔
بھارتی میڈیا رپورٹس کے مطابق ایلویش یادو کے گھر پر فائرنگ کا واقعہ صبح ساڑھے 5 بجے گڑ گاؤں میں پیش آیا، جب 3 نامعلوم افراد موٹر سائیکل پر ان کے گھر کے باہر پہنچے، کچھ دیر رکے اور پھر ایلویش کے گھر پر 12 گولیاں چلائیں اور فرار ہو گئے۔
رپورٹس کے مطابق پولیس نے اطلاع ملتے ہی موقع پر پہنچ کر فارنزک ٹیم کی مدد سے تحقیقات کا آغاز کردیا ہے، حملے میں کسی کو کوئی نقصان نہیں پہنچا۔
پولیس کے مطابق ایلویش اور اس کا خاندان عمارت کے دوسرے اور تیسرے فلور پر رہائش پذیر ہیں، اور فائرنگ کے دوران گولیاں پہلے فلور تک پہنچی تھیں۔ اس وقت گھر میں ایلویش موجود نہیں تھے، تاہم ان کے خاندان کے افراد اور کیئر ٹیکر موجود تھے۔
پولیس نے مقدمہ درج کرکے سی سی ٹی وی فوٹیج کی مدد سے تحقیقات کا آغاز کردیا ہے اور ملزمان کو گرفتار کرنے کے لیے تلاش جاری ہے۔
ایلویش یادو کے گھر والوں کا کہنا ہے کہ حملے سے پہلے ایلویش کو کسی بھی قسم کی دھمکیاں موصول نہیں ہوئی تھیں۔
روس کی سابق مس یونیورس ماڈل کار حادثے میں ہلاک
دوسری جانب سوشل میڈیا پر ایک پوسٹ وائرل ہوئی ہے جس میں بیرونِ ملک مقیم گینگسٹر ہمانشو بھاؤ اور نیرج فریدپوریا نے اس فائرنگ کی ذمہ داری قبول کرنے کا دعویٰ کیا ہے۔
واضح رہے کہ ممبئی پولیس نے معروف کامیڈین کپل شرما کو لارنس بشنوئی گینگ کی جانب سے دھمکیاں ملنے اور کیفے پر حملوں کے بعد ان کی سیکیورٹی میں اضافہ کردیا ہے۔
