سکھر: گھوٹکی میں سڑک کنارے 1500 میٹر کے فاصلے تک گنے کی کاشت پر پابندی عائد کر دی گئی ہے۔
تفصیلات کے مطابق سکھر کے کمشنر نے ایک انوکھا حکم جاری کیا ہے، گھوٹکی شہر کے مقامی کاشت کاروں کو کہا گیا ہے کہ وہ سڑک کنارے پندرہ سو میٹر کے فاصلے تک گنے کی کاشت نہیں کریں گے۔
کمشنر سکھر فیاض عباسی نے کہا ’’موٹر وے، قومی شاہراہ سے 1500 میٹر کے فاصلے تک گنے کی کاشت نہ کی جائے، گنے کی فصل کی وجہ سے واردات کے بعد ملزمان آسانی سے فرار ہو جاتے ہیں۔‘‘
انھوں نے بتایا کہ یہ پابندی ڈپٹی کمشنر گھوٹکی اور ایس ایس پی کی سفارش پر لگائی گئی ہے، اور امن و امان کی صورت حال کو مد نظر رکھتے ہوئے یہ فیصلہ کیا گیا ہے۔
واضح رہے کہ اس وقت صوبہ سندھ میں کچے کے علاقے کے ڈاکو حکومت اور انتظامیہ کے لیے درد سر بنے ہوئے ہیں، متعدد آپریشنز کے باوجود پولیس اور رینجرز ڈاکوؤں پر قابو نہیں پا سکے ہیں، دوسری طرف کچے کے ڈاکوؤں کی وارداتیں تسلسل کے ساتھ جاری ہیں، نہ صرف سندھ بلکہ پنجاب اور کے پی کے مختلف علاقوں سے بھی شہریوں کے اغوا کی وارداتیں ہو رہی ہیں۔
