دنیا بھر میں مشہور گیم آف تھرونز کے پریکوئل ہاؤس آف ڈریگن کے دوسرے سیزن کی شوٹنگ شروع ہوچکی ہے جسے اگلے برس ریلیز کردیا جائے گا۔
امریکی ٹی وی نیٹ ورک ایچ بی او کی سیریز ہاؤس آف ڈریگن کے دوسرے سیزن کی شوٹنگ برطانیہ میں شروع ہو چکی ہے اور اسے 2024 میں نشر کیا جائے گا۔
ہالی ووڈ پر رپورٹنگ کرنے والی ویب سائٹ ڈیڈ لائن کے مطابق سیریز کا دوسرا سیزن پہلے سیزن کے مقابلے میں مختصر ہوگا۔
متعدد ذرائع کی طرف سے یہ دعویٰ بھی کیا جا رہا ہے کہ ایچ بی او کی جانب سے ہاؤس آف ڈریگن کا تیسرا سیزن بھی بنایا جائے گا، ایچ بی او کی ایک ترجمان نے بتایا کہ سیزن 2 میں دو اقساط کم کرنے کا فیصلہ سٹوری کو دیکھتے ہوئے کیا گیا ہے۔
خیال رہے ہاؤس آف ڈریگن ایچ بی او کے مشہور زمانہ شو گیم آف تھرونز کا پریکوئل اور اس میں دکھائے گئے واقعات سے تقریباً 200 سال پہلے کی کہانی ہے جب ٹارگیریئن خاندان کی حکومت کا آغاز ہوا تھا۔
ہاؤس آف ٹارگیریئن وہی خاندان ہے جس سے گیم آف تھرونز میں ڈینیرس ٹارگیریئن عرف ملکہ کھلیسی تعلق رکھتی ہیں اور اس سیریز میں ملکہ کھلیسی کے آباؤ اجداد کی بادشاہت کی کہانی بتائی گئی ہے۔
اس خاندان کی خاص بات یہ ہے کہ ملکہ کے بطن سے ڈریگن پیدا ہوتے ہیں جنہیں پال کر ان سے کام لیا جاتا ہے، ہاؤس آف دی ڈریگن کی پہلی قسط میں بھی ٹارگیریئن ہاؤس کے ڈریگن دکھائے گئے ہیں۔
ہاؤس آف دی ڈریگن کی مرکزی کاسٹ میں ملی اے کلاک، میٹ سمتھ، ایما ڈارسی، اولویا کک اور پیڈی کونسیڈائن شامل ہیں جبکہ اس کہانی کو بھی جارج آر آر مارٹن کی کتاب فائر اینڈ بلڈ سے ہی لیا گیا ہے۔
گزشتہ سال اگست میں ہاؤس آف دی ڈریگن کی ریلیز ہونے والی پہلی قسط نے ہی مداحوں کو اپنے سحر میں جکڑ لیا تھا، جبکہ فلموں اور سیریز کی ریٹنگ کی ویب سائٹ آئی ایم ڈی بی پر اسے 9.1 ریٹ کیا گیا۔
