امریکی بمباری سے مشرق وسطیٰ میں وسیع تر تنازعے کا خدشہ پیدا ہو گیا ہے، جس کی وجہ سے خلیجی ریاستیں ہائی الرٹ ہو گئی ہیں۔
الجزیرہ کے مطابق خلیجی ریاستیں، جہاں متعدد امریکی فوجی اڈے ہیں، ایران پر ہونے والی بمباری کے بعد مشرق وسطیٰ میں جنگ کے وسیع ہونے کا امکان پیدا ہونے کے بعد ہائی الرٹ ہیں۔ سعودی عرب سمیت خلیجی ممالک میں سیکیورٹی ہائی الرٹ کر دی گئی ہے، بحرین میں گاڑیوں کو اہم شاہراہوں پر آنے سے روک دیا گیا، کویت میں بھی شیلٹرز قائم کر دیے گئے ہیں۔
عرب میڈیا رپورٹس کے مطابق متحدہ عرب امارات کے صدر، امیر قطر اور سعودی عرب کے ولی عہد شہزادہ محمد بن سلمان نے رابطے کر کے خطے اور سیکیورٹی کی صورت حال پر تبادلہ خیال کیا۔ بحرین میں ایمرجنسی صورت حال سے نمٹنے کے لیے عوامی آگاہی مہم کا آغاز کرتے ہوئے ملک بھر میں سائرن سسٹم فعال کر دیا گیا ہے۔
تعلیمی اداروں کو بھی آن لائن کلاسز کے انعقاد کی ہدایات جاری کی گئی ہیں، تاکہ طلبہ کی تعلیم متاثر نہ ہو۔ کویت میں بھی دفاعی کونسل کا اجلاس بلایا جا چکا ہے، منسٹریز کمپلیکس میں شیلٹرز بھی قائم کر دیے گئے ہیں۔ کویتی حکومت نے اعلان کیا ہے کہ ملک کی ڈیفنس کونسل مسلسل سیشن میں رہے گی تاکہ بدلتی ہوئی صورت حال پر فوری ردعمل دیا جا سکے۔
بحرین نے 70 فی صد سرکاری ملازمین کو اگلے نوٹس تک گھر سے کام کرنے کو کہا ہے۔ بحرین کی وزارت داخلہ نے X پر ایک پوسٹ میں کہا ’’علاقائی سلامتی کی صورت حال کو دیکھتے ہوئے شہریوں کو ہدایت کی جاتی ہے کہ وہ صرف اس وقت اہم سڑکیں استعمال کریں جب متعلقہ حکام کی جانب سے اجازت مل جائے، یہ عوام کے تحفظ کے لیے ہے۔‘‘
انٹرنیشنل انسٹی ٹیوٹ فار سٹریٹیجک اسٹڈیز میں مشرق وسطیٰ کی پالیسی کے سینئر فیلو حسن الاحسن نے کہا کہ امریکا اور ایران کے درمیان کھلے تنازع کا خطرہ خطے کو تباہ کن اور ممکنہ طور پر طویل تنازعہ کی طرف لے جا سکتا ہے۔
ایران اسرائیل کشیدگی سے متعلق تمام خبریں
انھوں نے کہا کہ اگرچہ جنگ اب تک اسرائیل اور ایران کے درمیان براہ راست دشمنی پر مشتمل ہے، تاہم امریکا کی براہ راست شمولیت سے اب بحرین، کویت اور قطر کے تنازع میں گھسیٹے جانے کا خطرہ پیدا ہو گیا ہے، کیوں کہ یہ خلیجی ریاستیں بڑی امریکی فوجی تنصیبات کی میزبانی کرتی ہیں۔
