اسلام آباد : بانی پی ٹی آئی کی بہن علیمہ خان نے ایف آئی اے نوٹسز کو ہائی کورٹ میں چیلنج کر دیا۔
تفصیلات کے مطابق بانی پی ٹی آئی کی بہن علیمہ خان نے ایف آئی اے نوٹسز کیخلاف اسلام آباد ہائی کورٹ میں درخواست دائر کردی۔
علیمہ خان نے ایڈووکیٹ شیراز رانجھا کے ذریعےسے درخواستیں دائر کیں، علیمہ خان کی جانب سے 2 الگ درخواستوں میں ایف آئی اے کو فریق بنایا گیا ہے اور آج ہی سماعت کی استدعا کی گئی ہے۔
درخواست میں ایف آئی اے سائبر کرائم ،انسداددہشتگردی ونگ کےنوٹسزمعطل کرنے کی استدعا کرتے ہوئے کہا ہے کہ 2 فروری کو جاری کئے گئے نوٹسز معطل کرکےمتعلقہ ریکارڈطلب کیاجائے۔
درخواست میں کہا گیا کہ عدالت فریقین کو انکوائری سے متعلق شواہد بھی پیش کرنے کا حکم دے،بتایا جائے کیا الزامات اور شواہد ہیں تاکہ قانونی دفاع کا حق مل سکے۔
یاد رہے ایف آئی اے انسداد دہشت گردی ونگ نے بانی پی ٹی آئی کی بہن علیمہ خان کو نوٹس جاری کیا تھا ، نوٹس میں علیمہ خان کو 6 فروری کو دن 11 بجے سی ٹی ڈبلیو میں طلب کیا گیا تھا۔
علیمہ خانم پر ریاست مخالف بیانیہ پھیلانے اور اداروں کو متنازع کرنے کا بھی الزام ہے۔
