لاہور : پی ڈی ایم کے سربراہ مولانا فضل الرحمان کے بعد بلوچستان نیشنل پارٹی نے بھی دبئی کی ملاقات پر اعتراض اٹھادیا اور کہا مولانا حق بجانب ہیں، بی این پی کو بھی اعتماد میں نہ لینا مناسب نہیں۔
تفصیلات کے مطابق بلوچستان نیشنل پارٹی کے رہنما ہاشم نوتیزئی نے اے آر وائی نیوز سے خصوصی گفتگو کرتے ہوئے کہا دبئی ملاقات کے حوالے سے کہا کہ دو بڑی حکومتی جماعتوں کی ملاقات پرفضل الرحمان کا اعتراض درست ہے، ہرسیاسی ،آئینی معاملے پر اتحادیوں کواعتماد میں لینا ضروری ہوتاہے۔
ہاشم نوتیزئی کا کہنا تھا کہ مولانا حق بجانب ہیں،بی این پی کو بھی اعتمادمیں نہ لینامناسب نہیں ، ن لیگ اور پی پی چھوٹی جماعتوں کواعتمادمیں نہیں لیتیں تویہ سیاسی غلطی ہوگی۔
رہنما بی این پی نے کہا کہ یہی چھوٹی جماعتیں برےوقت میں ساتھ تھیں اورآگے ساتھ لیکرچلیں، بی این پی شہبازشریف کوووٹ نہ دیتی توانکے ووٹ پورے نہیں تھے۔
انتخابات کے حوالے سے سوال پر ان کا کہنا تھا کہ آئینی حساب سےہم الیکشن کوبروقت ہونےسےنہیں روک سکتے، بحیثیت سیاسی رہنما کہتا ہوں آئین کی خلاف ورزی نہیں ہونی چاہیے، 2 دن پہلے اسمبلیاں تحلیل کی گئیں تو یہ آئین کی خلاف ورزی ہوگی، آئین کے مطابق 12 اور 13 اگست کے درمیان اسمبلیاں خودبخود تحلیل ہوجائیں گی۔
ہاشم نوتیزئی نے کہا کہ اگر 5 سال میں عوام کےلیے کچھ نہیں کرسکے تو ایک ماہ میں کیا کریں گے، پی ڈی ایم جماعتیں چاہتی ہیں انتخابات وقت پرہوں۔
