تنویر ڈار کا شمار اپنے دور کے ہاکی کے بہترین کھلاڑیوں میں ہوتا تھا۔ وہ 11 فروری 1998ء کو کراچی میں وفات پاگئے تھے۔ کھیل کے میدان میں پنالٹی کارنر ان کی وجہِ شہرت ہیں۔
ہاکی کے اس مشہور پاکستانی کھلاڑی کا تعلق امرتسر سے تھا جہاں وہ 4 جون 1937ء کو پیدا ہوئے تھے۔ اپنے بڑے بھائی منیر ڈار کی ہاکی سے ریٹائرمنٹ کے بعد تنویر ڈار پاکستان کی ہاکی ٹیم کے مستقل فل بیک بن گئے۔ انھوں نے 1968ء کے اولمپکس، 1970ء کے ایشیائی کھیلوں اور 1971ء کے عالمی کپ میں زبردست کھیل کا مظاہرہ کیا۔ ان تینوں ٹورنامنٹس میں پاکستان نے پہلی پوزیشن حاصل کی تھی۔
تنویر ڈار نے مجموعی طور پر 80 بین الاقوامی سطح کے میچ کھیلے اور 48 گول اسکور کیے۔ 1971ء کے عالمی کپ میں انھوں نے تین ہیٹ ٹرکس اسکور کیں اور ریکارڈ بنایا۔
14 اگست 1971ء کو انھیں حکومتِ پاکستان کی جانب سے صدارتی تمغہ برائے حسنِ کارکردگی عطا کیا گیا تھا۔
