واشنگٹن : کینیڈا میں خالصتان تحریک کے رہنما ہردیپ سنگھ کے قتل میں ملوث ملزمان کی گرفتاری کیلئے امریکا میں بھی سکھ برادری سڑکوں پر نکل آئی۔
ہردیپ سنگھ کے قتل میں بھارتی ایجنسیوں کے ملوث ہونے کی تصدیق کے بعد سکھ برادری کی جانب سے احتجاجی مظاہرے شدت اور زور پکڑنے لگے۔
اس موقع پر امریکی دارالحکومت واشنگٹن ڈی سی خالصتان کے نعروں سے گونج اٹھا، امریکا بھر سے سکھ رہنماؤں نے واشنگٹن میں بھارتی سفارتخانے کا گھیراؤ کرکے خوب نعرے بازی کی۔
سکھ کمیونٹی نے کینیڈا میں قتل ہونے والے خالصتانی رہنما ہردیپ سنگھار نجار کے قتل میں ملوث بھارتی انٹیلی جنس اہلکاروں کی گرفتاری کا مطالبہ کیا۔
یاد رہے کہ اس سے قبل رواں برس اپریل میں سکھ رہنما امرت پال سنگھ کی گرفتاری کے بعد بھی بھارت میں آزاد خالصتان تحریک سے وابستہ رہنما اور کارکنان متحرک ہوگئے تھے۔
فروری 2023 میں آسٹریلیا کے شہر برسبین میں 60 ہزار سکھوں نے آزاد خالصتان کے حق میں ووٹ ڈالا تھا، مارچ 2023 میں لندن میں بھارتی ہائی کمیشن کی عمارت پر سکھ مظاہرین نے خالصتانی پرچم لہرایا تھا۔
