ہرنائی : شاہرگ میں مزدوروں کی گاڑی کے قریب دھماکے نتیجے میں 10 کان کن جاں بحق اور چھ زخمی ہوگئے۔
تفصیلات کے مطابق ہرنائی کی شاہرگ کوئل مائنز ایریا ٹاکری میں گاڑی کے قریب دھماکا ہوا، دھماکے سے گاڑی میں سوار 10 افراد جاں بحق اور چھ افراد زخمی ہوگئے۔
ڈپٹی کمشنر کا کہنا ہے گاڑی میں سوار افراد کوئلے کی کانوں میں کام کرنے جارہے تھے تاہم لاشوں اورزخمیوں کو رورل ہیلتھ سینٹر شاہرگ منتقل کردیا گیا ہے۔
وزیراعظم شہباز شریف نے ہرنائی دھماکے میں کان کنوں کے جاں بحق ہونے پر اظہار افسوس کرتے ہوئے زخمیوں کی جلد صحتیابی کی دعا کی اور ہر ممکن طبی امداد فراہم کرنے کی ہدایت کردی۔
وزیراعظم نے کہا کہ شہریوں کی جان ومال کو نقصان پہنچانے والے درندوں کو سخت قیمت ادا کرنی پڑے گی، ملک سے دہشت گردی کے عفریت کے خاتمے کے لیے سرگرم عمل ہیں۔
وفاقی وزیرداخلہ کی شاہرگ میں مزدوروں کی گاڑی کے قریب دھماکے کی شدید مذمت کرتے ہوئے مزدوروں کے جاں بحق ہونے کے واقعے پر افسوس کا اظہار کیا۔
محسن نقوی نے کہا کہ زخمی مزدوروں کی جلد صحت یابی کیلئے دعا گو ہوں اور لواحقین کے غم میں برابر کے شریک ہیں ، دکھ کی گھڑی میں سوگوار خاندانوں کے ساتھ کھڑے ہیں۔
ان کا کہنا تھا کہ معصوم لوگوں کو نشانہ بنانے والے درندے کسی رعایت کے مستحق نہیں۔.
وزیر خوارک بلوچستان نورمحمد دمڑ نے ہرنائی میں دھماکے کی شدید مذمت کرتے ہوئے 10 مزدوروں کے شہید ہونے پر افسوس کا اظہار کیا۔
نورمحمد خان دمڑ کا کہنا تھا کہ زخمی مزدوروں کی جلد صحتیابی کیلئے دعاگو ہوں ، معصوم لوگوں کو نشانہ بنانے والے کسی رعایت کے مستحق نہیں ، زخمیوں کو علاج کی تمام سہولتوں کی فراہمی جاری ہے۔
