Tag: ہر لمحہ پرجوش

کراچی: معروف پاکستانی اداکار منیب بٹ نے کہا ہے کہ اداکارہ منال خان کے ساتھ کبھی کام نہیں کرسکتا کیونکہ لوگوں کو پتا ہی نہیں چلے گا کہ یہ ایمن ہے یا منال خان ہے۔

تفصیلات کے مطابق معروف اداکار منیب بٹ نے اے آر وائی نیوز کے پروگرام ’ہر لمحہ پرجوش‘ میں میزبان وسیم بادامی کے معصومانہ سوالات کے جوابات دئیے۔

منیب بٹ نے کہا کہ سوشل میڈیا پر مجھ پر تین مرتبہ تنقید کی گئی ایک واقعے پر بہت زیادہ حیران تھا، میں یورپ میں تھا اور سوشل میڈیا پر جہیز کے خلاف مہم چلائی جارہی تھی میں نے بھی اس میں حصہ لیا تو لوگوں نے تنقید شروع کردی اور کہا کہ آپ کیسے یہ بول سکتے ہو آپ نے تو اپنی شادی میں اتنا پیسہ خرچ کیا ہے۔

اداکار کا کہنا تھا کہ میں نے اپنی شادی میں جہیز نہیں لیا، میں نے خود اس پر عمل کیا پھر بھی مجھ پر لوگ
تنقید کرنے آگئے کہ آپ نے اپنی شادی میں اتنی فضول خرچی کیوں کی۔

منیب بٹ کا کہنا تھا کہ اگر کسی کے پاس پیسے نہیں ہیں تو اس باپ کو مجبور نہیں کیا جانا چاہئے کہ فلاں چیز چاہئے تاہم اگر کسی کے پاس وسائل ہیں تو وہ اپنی خوشی سے شادی میں زیادہ پیسے خرچ کرسکتا ہے۔

منیب بٹ نے کہا کہ شادی اتنی دھوم دھام سے کرنے کی ایک وجہ یہ بھی تھی کہ اہلیہ ایمن کے گھر کی پہلی شادی تھی اورمیرے گھر کی آخری شادی تھی۔

انہوں نے کہا کہ میرا فلم میں کام کرنے کا تجربہ اس لیے اچھا نہیں رہا کہ اس وقت مجھے پتا نہیں تھا کہ کس طرح کام کرنا ہے، میں انڈسٹری میں نیا نیا آیا تھا۔

سیاست کے حوالے سے سوال کا جواب دیتے ہوئے منیب بٹ نے کہا کہ عمران خان لیڈر ہیں، آصف زرداری اچھا کھیلتے ہیں جبکہ فضل الرحمان کی وہ مثال ہے کہ میں نہیں کھیلوں گا تو کوئی نہیں کھیلے گا۔

اداکار منیب بٹ نے ابھرتے ہوئے اداکار بلال عباس کو مستقبل کا فواد خان قرار دیا جبکہ میزبان و اداکار فیصل قریشی کو وزن کم کرنے کا مشورہ بھی دے دیا۔

کراچی: معروف اداکار و میزبان یاسر حسین نے کہا ہے کہ میں شادی کے لیے تیار ہوں لیکن وہ نہیں مان رہی، وہ کون ہے اس کا جواب انہوں نے تاحال نہیں دیا۔

تفصیلات کے مطابق اداکار و میزبان یاسر حسین نے اے آر وائی نیوز کے پروگرام ’ہر لمحہ پرجوش‘ میں میزبان وسیم بادمی کے معصومانہ سوالات کا سامنا کرتے ہوئے مختلف سوالات کے جوابات دئیے۔

وسیم بادامی نے اقرا عزیز کا نام لیے بغیر جب یہ پوچھا کہ ’وہ جو شادی کے حوالے سے تاثر سے عام لوگوں میں وہ غلط ہے؟ جس کے جواب میں یاسر حسین نے کہا کہ مجھے نہیں معلوم لوگ کیا سوچتے ہیں۔

ایک سوال کے جواب میں یاسر حسین نے کہا کہ ایسا نہیں ہے کہ میں مذاق کروں تو کوئی بات نہیں اگر مجھ سے کوئی مذاق کرے تو میں برا منا لیتا ہوں، ان کا کہنا تھا کہ ہم لوگوں کو تنقید کرنی آتی نہیں ہے ہم بدتمیز ہوجاتے ہیں۔

ہانیہ عامر کے چہرے پر ایکنی کے حوالے سے یاسر حسین نے کمنٹس ’دانے دار‘ کرنے پر یاسر حسین نے کہا کہ ہانیہ میری ابھی بھی اچھی دوست ہے، میں نے ایک مذاق کیا تھا۔

واضح رہے کہ ایک ڈرامے میں بچوں کے جنسی استحصال پر جب اداکار احسن خان کو منفی کردار پر ایوارڈ دیا گیا تو یاسر حسین نے کہا تھا کہ کاش میں بھی ایک بچہ ہوتا، جب ان سے اس بارے میں پوچھا گیا تو انہوں نے کہا کہ میں نے ایسا کچھ نہیں کہا۔

یاسر حسین نے کہا تھا کہ کسی نے مجھ پر غصہ نکالا اور ٹویٹ کردیا اور لوگوں نے اس پر تبصرہ کرنا شروع کردیا تھا۔

ریپڈ فائر کا جواب دیتے ہوئے یاسر حسین نے کہا کہ ہانیہ عامر، عاصم اظہر، اقرا عزیز بہت اچھی اداکارہ ہیں، صبا قمر میری پہلی اداکارہ، حدیقہ کیانی پاپ اسٹار ہیں، ماہر خان سپر اسٹار ہیں۔

انہوں نے کہا کہ شوبز انڈسٹری کے کچھ اداکار بہت سیاسی ہیں اور مجھے دوستوں اور دشمنوں کی پہچان نہیں ہے، عمران عباس کو میں اداکار نہیں مانتا ہوں، اداکار احسن خان کو میزبانی نہیں کرنی چاہئے۔

کراچی: معروف پاکستانی اداکارہ نادیہ خان نے کہا ہے کہ مرد عورتوں کو لے کر اِن سکیور ہوتے ہیں اور عورتوں کی کامیابی مردوں کو ہضم نہیں ہوتی۔

تفصیلات کے مطابق معروف پاکستانی اداکارہ نادیہ خان نے گزشتہ روز اے آر وائی نیوز کے پروگرام ’ہر لمحہ پرجوش‘ میں شرکت کی اور وسیم بادامی کے معصومانہ سوالات کا سامنا کیا۔

نادیہ خان نے کہا کہ عورت کامیاب ہو تو مرد اور عورتوں کے درمیان فرق پیدا ہوجاتا ہے، ان کا کہنا تھا کہ شادی کی کامیابی میں نصیب کا عمل دخل بھی ہوتا ہے، ایسا بھی ہوتا ہے کہ پہلی شادی کامیاب نہیں ہوتی اس کے بعد دوسری شادی کامیابی سے ہم کنار ہوتی ہے۔

مارننگ شوز کے حوالے سے گفتگو کرتے ہوئے نادیہ خان نے کہا کہ میں نے جب مارننگ شو کیا اس میں کوئی پروگرام ایسا نہیں تھا جو متنازع ہو، میں نے کبھی اگلے روز معافی نہیں مانگی۔

ان کا کہنا تھا کہ میرے شو کے خلاف کوئی مہم نہیں چلائی گئی تھی، میرے مارننگ شو میں سب لوگ آئے تھے اور جو لوگ رہ گئے تھے وہ بعد میں شو کا حصہ بنے۔

نادیہ خان نے کہا کہ اگر میرے مارننگ شو میں کسی کو کوئی بات بری لگی ہو تو ان کی مرضی ہے اس میں کچھ نہیں کہہ سکتی۔

ایک سوال کے جواب میں نادیہ خان نے کہا کہ آج کل مارننگ شوز کہاں ہیں، ختم ہورہے ہیں، مارننگ شوز ختم نہیں ہونے چاہئیں، صبح ٹی وی دیکھنے بیٹھتے ہیں تو بہت کم آُپشن ہوتا ہے پہلے ہر چینل پر شو ہوتا تھا مزہ آتا تھا کہیں نہ کہیں اپنی پسند کی چیز مل جاتی تھی۔

نادیہ خان نے اعتراف کیا کہ پہلے ان کا رویہ کافی خراب تھا مگر اس میں تبدیلی آگئی ہے، پروڈیوسر جب ہوتے ہیں تو رویہ مختلف ہوتا ہے جب آپ اداکاری کررہے ہوں تو اس کو انجوائے کرتے ہیں۔

واضح رہے کہ نادیہ خان نے 2003 میں اے آر وائی ڈیجیٹل پر مارننگ شو کی میزبانی کی تھی جس کا نام بریک فاسٹ نادیہ خان کے ساتھ تھا۔